ފިލްމު އިންޑަސްޓްރީގައި މަސައްކަތްކުރާ ވަރަށް ގިނަ ބަތަލާއިންނަށް ޕްރޮޑިއުސަރުން "އެކްސްޕަޔަރީ ޑޭޓް"އެއް ދީފައިވާ ކަމަށް ބަތަލާ މޯނާ ސިންގް ބުނެފިއެވެ.
ފިލްމުފެއާއަށް ދިން އިންޓަވިއުއެއްގައި މޯނާ ބުނީ، ދެ ޖިންސުގެ ފަންނާނުންނަށް ފުރުސަތު ދޭ ދިނުމުގައި އުމުރުގެ ފަރަގަށް ވަރަށް ބޮޑަށް ބަލާ ކަމަށާއި އެ ކަމުގައި ބާކީ ވަނީ ވެސް އަންހެން ފަންނާނުން ކަމަށެވެ.
އިންޑަސްޓްރީގައި މަސައްކަތްކުރާ އުމުރުން 60 އަހަރުގެ ފިރިހެން ތަރިންނަށް ވެސް ފިލްމުތަކުގެ ހީރޯގެ ރޯލް ކުޅުމުގެ ފުރުސަތު ދޭއިރު ބަތަލާއިން އުމުރުން 50 އާ ކައިރިވުމުން ބާކީކޮށް، ވަރަށް ކުޑަ ރޯލްތައް ކުޅެން ފުރުސަތު ދިނުމަކީ ބަލައިގަންނަ ކަމެއް ނޫން ކަމަށް މޯނާ ވަނީ ބުނެފައެވެ.
އާމިރު ޚާން އަދި މޯނާ ސިންގް ފިލްމު "ލާލް ސިންގް ޗައްދާ"ގެ މަންޒަރެއްގައި--ފޮޓޯ/އެންޑީޓީވީ
މޯނާއަށް ލިބޭ ފުރުސަތުތަކުގައި ބައެއް ފަހަރު އުމުރަށްވުރެ މާ މަތީ މީހެއްގެ ކެރެކްޓާ ވެސް ކުޅެން ލިބިފައި އެބަހުރި ކަމަށާއި އޮން ސްކްރީންއިން އެ ދައްކާ އުމުރާ މެދު އެއްވެސް ވަރަކަށް ނުވިސްނާ ކަމަށް ބަތަލާ ވަނީ ބުނެފައެވެ.
އުމުރުން 44 އަހަރުގެ ބަތަލާ ކުޅެފައިވާ ބައެއް ކެރެކްޓާތަކުގައި އުމުރަށްވުރެ އެތައް އަހަރު ދޮށީ މީހުންގެ މަންމަގެ ރޯލް ވެސް ހިމެނެއެވެ. އޭގެ ތެރޭގައި އާމިރު ޚާނާ އެކު ކުޅުނު "ލާލް ސިންގް ޗައްދާ"ގައި މޯނާ ކުޅެފައިވަނީ އާމިރު ޚާންގެ މަންމަގެ ރޯލެވެ.
ހަމައެއާއެކު މިދިޔަ އަހަރު ނެޓްފްލިކްސްއިން ގެނެސްދިން ވެބް ސީރީޒް "ބޭޑްސް އޮފް ދަ ބޮލީވުޑް"ގައި މޯނާ ކުޅެފައި ވަނީ ބަތަލާއަށްވުރެ 15 އަހަރު ހަގު އެކްޓަރެއްގެ މަންމަގެ ރޯލެވެ.
ނަމަވެސް، ބަތަލާއިންގެ އުމުރު މަތިވުމުން ބަތަލުންނަށް ހުށަހަޅާ ރޯލް ދިނުމުގައި ފަސްޖެހޭ ކަމަކީ ބޮލީވުޑްގައި ގެންގުޅޭ "ޑަބަލް ސްޓެންޑަޑް" ވިސްނުން ކަމަށާއި އެ ވިސްނުން ބަދަލުކުރަން ޖެހޭ ކަމަށް މޯނާ ވަނީ ބުނެފައެވެ.
ޓެލެވިޒަން ދާއިރާއިން އާއްމުންގެ މަގުބޫލުކަން ހޯދުމަށް ފިލްމު އިންޑަސްޓްރީއާ ގުޅުނު ބަތަލާ އެންމެ ފަހުން ބެލުންތެރިންނަށް ފެނިފައިވަނީ ބޮކްސް އޮފީހުގައި ބޮޑު ކާމިޔާބީއެއް ހޯދަމުން އަންނަ ފިލްމު "ބޯޑާ 2"ގެ ރޯލަކުންނެވެ.