ޣައްޒާ ހަނގުރާމަ ނިންމާލުމުގެ އެއްބަސްވުމުގެ ފުރަތަމަ މަރުހަލާގެ ދަށުން އިސްރާއީލުން ފަލަސްތީނުގެ 15 މީހުންގެ ހަށިގަނޑު ހަވާލުކޮށްފައިވާ ކަމަށް ޣައްޒާގެ ސިއްޙަތާ ބެހޭ ވުޒާރާގެ އޮފިޝަލަކު ވިދާޅުވެއްޖެއެވެ.
މިއީ މިދިޔަ އޮކްޓޯބަރު މަހު އެމެރިކާއާއި މިސްރާއި ގަތަރު މެދުވެރިވެގެން ގާއިމުކުރި ހަނގުރާމަ ހުއްޓާލުމުގެ އެއްބަސްވުމުގެ ފުރަތަމަ މަރުހަލާގެ ދަށުން އިސްރާއީލާއި ހަމާސްއާ ދެމެދު ރަހީނުންނާއި ބަންދުކޮށްފައިވާ މީހުން ބަދަލުކުރި އެންމެ ފަހު ފަހަރެވެ.
ހަށިގަނޑުތައް ހަވާލުކުރީ ހަމާސްގެ ބެލުމުގެ ދަށުގައި އޮތް އިސްރާއީލުގެ ފުލުސް އޮފިސަރު ރަން ގްވިލީގެ ހަށިގަނޑު މި މަހުގެ ކުރީކޮޅު އިސްރާއީލާ ހަވާލުކުރުމުންނެވެ.
ހަށިގަނޑުތައް އަނބުރާ ގެންދިއުމަށް މަގުފަހިކޮށްދިނުމަށް އެހީތެރިވެދީފައިވާ ކަމަށް ބައިނަލްއަގުވާމީ ރެޑް ކޮރްސް ކޮމިޔުނިޓީން ވަނީ ބުނެފައެވެ. އަދި, ހަށިގަނޑުތައް ގެންދިޔައީ ޣައްޒާ ސިޓީގެ ޝިފާ ހޮސްޕިޓަލަށް ކަމަށް ހެލްތު މިނިސްޓްރީގެ ތަރުޖަމާނު ޒާހިރު އަލް ވަހީދީ ވިދާޅުވިއެވެ.
ހަމާސްގެ ބެލުމުގެ ދަށުގައި ތިބި އިސްރާއީލުގެ ރަހީނުންެގެ ތެރެއިން ދޫކޮށްލާ ކޮންމެ ރަހީނަކަށް ފަލަސްތީނުގެ 15 ހަށިގަނޑު އަނބުރާ ދިނުމަށް އިސްރާއީލުން އެއްބަސްވެފައިވެއެވެ.
ހަނގުރާމަ ހުއްޓާލުމުގެ އެއްބަސްވުމުގެ ދަށުން އިސްރާއީލުން ގާތްގަނޑަކަށް 2،000 ފަލަސްތީނުގެ ގައިދީން ދޫކޮށްލާފައިވާއިރު، އޭގެ ތެރެއިން ގިނަ މީހުންނަކީ ދެ އަހަރަށްވުރެ ގިނަ ދުވަސްވަންދެން ކުރި ހަނގުރާމަގައި ހައްޔަރުކޮށްފައިވާ މީހުންނެވެ.
އަދި، ފަލަސްތީނުގެ 360 މީހުންގެ ހަށިގަނޑު ޣައްޒާއާ ހަވާލުކޮށްފައިވާއިރު، އެ މީހުން ދެނެގަންނަން އޮފިޝަލުންނަށް ދަތި ކަމަށް ސިއްޙަތާ ބެހޭ ވުޒާރާއިން ބުނެއެވެ.
އިސްރާއީލުން އަދިވެސް މީހުން މަރަނީ
ހަނގުރާމަ ހުއްޓާލުމުގެ އެއްބަސްވުމުގެ ދެވަނަ މަރުހަލާ ފަށާނެކަން އެމެރިކާގެ މަންދޫބު ސްޓީވް ވިޓްކޯފް މި މަހު ކުރީކޮޅު އިއުލާން ކުރައްވާފައިވާއިރު، އިސްރާއީލުން އަދިވެސް ދަނީ ޣައްޒާގައި އެތައް ހަމަލާއެއް ދެމުންނެވެ. ގާތްގަނޑަކަށް ކޮންމެ ދުވަހަކު ވެސް ޣައްޒާގެ ހުރިހާ ހިސާބެއްގައި އާންމުން މަރުވަމުންދެއެވެ.
ޣައްޒާގެ ސިއްޙަތާ ބެހޭ ވުޒާރާއިން ހާމަަކޮށްފައިވާ ގޮތުގައި ހަނގުރާމަ ހުއްޓާލުމަށް އެއްބަސްވި ފަހުން ވެސް ފަލަސްތީނުގެ 492 މީހުން މަރާލާފައިވެއެވެ.