ބައިނަލްއަގުވާމީ ފިއްތުންތަކާ އެކު، ފަލަސްތީނުގެ ނޫސްވެރިޔާ ބިސާންގެ ޓިކްޓޮކް އެކައުންޓް އަލުން އިއާދަކޮށްފިއެވެ.
ޣައްޒާގައި ހިނގަމުންދާ ހަނގުރާމައިގެ ހަގީގަތް ދުނިޔެއަށް ހާމަކޮށްދިނުމުގައި ފާހަގަކޮށްލެވޭ އެވޯޑް ހާސިލްކޮށްފައިވާ ނޫސްވެރިޔާ ބިސާން އައުދާގެ ޓިކްޓޮކް އެކައުންޓް އަލުން އިއާދަ ކޮށްދީފައި މިވަނީ ބޭންކުރިތާ އެއް ދުވަސް ފަހުން، އާންމުންގެ ބޮޑު ކަންބޮޑުވުންތަކަކާއި ބައިނަލްއަގުވާމީ ފިއްތުންތަކެއް ކުރިމަތިވުމުންނެވެ.
ބުރާސްފަތި ދުވަހު އަލްޖަޒީރާއާ ވާހަކަދައްކަމުން ބިސާން ބުނީ، އޭނާގެ އެކައުންޓް އަލުން ލިބުނީ ބައިނަލްއަގުވާމީ މީޑިއާތަކުގެ ސަމާލުކަމާއި ޖަމިއްޔާތަކުން ކުރި ޕްރެޝަރުގެ ސަބަބުން ކަމަށް ގަބޫލުކުރާ ކަމަށެވެ. ނަމަވެސް، އެކައުންޓް އިއާދަކުރި ނަމަވެސް ބައެއް ހުރަސްތައް އަދިވެސް ހުރިކަން އޭނާ ފާހަގަކުރިއެވެ. އެ ގޮތުން، މިހާރު އޭނާގެ އެކައުންޓް ފެންނަނީ ސާޗް ބާގައި އޭނާގެ ފުރިހަމަ ޔޫޒާނޭމް ޖެހުމުން އެކަނި ކަމަށާއި އޭނާގެ ގިނަ ވީޑިއޯތަކަކީ އެހެން މީހުންނަށް ފެންނަ ގޮތަށް ޕްލެޓްފޯމުން "ރެކޮމެންޑް"ކުރާނެ ވީޑިއޯތަކެއް ނޫން ކަމަށް ޓިކްޓޮކުން އަންގާފައިވާ ކަމަށް ބިސާން ބުންޏެވެ.
ޓިކްޓޮކްގެ ތަރުޖަމާނަކު ބުނި ގޮތުގައި، ބިސާންގެ އެކައުންޓް ވަގުތީ ގޮތުން ހިފެހެއްޓީ އެއީ އެހެން މީހަކު އޭނާގެ ނަމުގައި ހިންގާ އެކައުންޓެއް ކަމަށް ޝައްކު ކުރެވިގެން ކަމަށެވެ. އަދި، އިތުރަށް ބެލުމަށް ފަހު މިހާރު އެކައުންޓް އާންމު ހާލަތަށް ގެނެސްފައިވާ ކަމަށް އެ ކުންފުނިން ބުނެއެވެ.
ބިސާން އައުދާއަކީ ޣައްޒާގެ ހަނގުރާމައިގެ ތެރެއިން "އިޓްސް ބިސާން ފްރޮމް ޣައްޒާ - އެންޑް އައި އެމް ސްޓިލް އެލައިވް" މި ޖުމުލައާ އެކު ކޮންމެ ދުވަހަކު ވީޑިއޯ ޑައިރީތައް އާންމުކުރަމުންދާ ނޫސްވެރިއެކެވެ. އޭނާގެ މަސައްކަތްތަކަށް ވަނީ އެމީ އެވޯޑް، ޕީބޮޑީ އެވޯޑް އަދި އެޑްވާޑް އާރް. މުރޯ ފަދަ ޝަރަފުވެރި ނޫސްވެރިކަމުގެ އެވޯޑްތައް ލިބިފައެވެ.
ބިސާންގެ އެކައުންޓް ބޭންކުރި މައްސަލަ ފެންމަތިވީ، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޓިކްޓޮކް ގަތުމުގެ މުއާމަލާތާ ގުޅޭގޮތުން ވާހަކަދައްކަމުން، އެއީ ވަރަށް މުހިންމު ނަތީޖާތަކެއް ނުކުމެދާނެ ކަމެއް ކަމަށް ބުނެފައިވާ ދަނޑިވަޅެއްގައެވެ.
މީގެ އިތުރުން، އެމެރިކާގެ ބައެއް ކުންފުނިތަކުން ޓިކްޓޮކްގެ އާ ކޮންޓްރޯލް ހޯދުމުގެ މަސައްކަތް ކުރަމުންދާކަން ވެސް ފާހަގަކޮށްލެވެއެވެ.
ޣައްޒާގައި ނޫސްވެރިންނަށް ކުރިމަތިވަމުންދާ ނުރައްކާތައް އިތުރުވަމުންދާއިރު، ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ)އިން ބުނާ ގޮތުގައި 2023 ވަނަ އަހަރުގެ އޮކްޓޯބަރު މަހުން ފެށިގެން މިހާތަނަށް ފަލަސްތީނުގެ 207 އަށްވުރެ ގިނަ ނޫސްވެރިން ވަނީ ޝަހީދުކޮށްލާފައެވެ. މީގެ ތެރެއިން ގިނަ މީހުން ޝަހީދުކޮށްލާފައިވަނީ އިސްރާއީލު ސިފައިން ދިން ހަމަލާތަކުގައެވެ.