ދަނޑުވެރިކަމުގެ ގައުމީ ލެބޯރެޓަރީ، ރާއްޖޭގައި ތިންވަނައަށް އެންމެ އާބާދީ ބޮޑު ފުވައްމުލަކު ސިޓީގައި މިއަދު ހުޅުވައިފިއެވެ.
މި ލެބޯރެޓަރީ އިފްތިތާހުކޮށްދެއްވީ އެކަމަށް ޓަކައި ބޭއްވި ރަސްމިއްޔާތުގައި ޑރ. މަރިޔަމް މާރިޔާއެވެ.
ފުވައްމުލަކު ސިޓީ ކައުންސިލުން ފޭސްބުކްގައި ކުރި ޕޯސްޓެއްގައިވަނީ މި ލެބޯރެޓަރީއަކީ ރާއްޖޭގެ ދަނޑުވެރިކަމުގެ ސިނާއަތުގައި ކުރިމަތިވާ އެކި ބަލިތައް ދެނެގަނެ، އެ ކަންކަމަށް ޒަމާނީ އަދި އިލްމީ ފަރުވާ ހޯދުމަށާއި، ގަސްގަހާއިގެހި މުޑުވައްކުރުމުގައި އާ ގޮތްތައް ހޯދުމަށް ފަސޭހަވެގެންދާނެ ލެބޯޓަރީއެއް ކަމަށެވެ.
ކައުންސިލުގެ ޕޯސްޓުގައިވާ ގޮތުން، މި ލެބޯރެޓަރީގައި ވެލި ޓެސްޓުކުރެވޭނެ އިންތިޒާމާއި، ބައޯ ކޮންޓްރޯލާއި ޓިޝޫ ކަލްޗަރާއި ގަސްގަހާއިގެއްސަށް ޖެހޭ ބަލިތައް ދިރާސާކުރެވޭނެ އިންތިޒާމު ހަމަޖެހިފައި ހުންނާނެއެވެ.
މި ލެބޯރެޓަރީގެ ޚިދުމަތާއެކު، ފުވައްމުލަކުގެ އަނބުގަސްތަކަށާއި އަލައޮޅުތަކަށް ކުރިމަތިވެފައިވާ ބަލިތައް ދެނެގަނެ، އެކަންކަމަށް ފަރުވާ ހޯދުމުގައި ބައޮލޮޖިކަލް ގޮތްތައް ބޭނުންކުރުމުގެ ފުރުސަތު ފުޅާވެ، ރާއްޖޭގެ އެކި ކަންކޮޅުތަކުގައި ހެދޭ ގަސްގަހާއިގެއްސަށް ޖެހޭ ބަލިތައް ދިރާސާކުރުމަށް ޓަކައި ބޭރަށް ސާމްޕަލް ގެންގޮސް ތަހުލީލުކުރަން ޖެހޭ ކުރުމަށް ނިމުން އަންނާނެ ކަމަށް، ކައުންސިލުން ބުންޏެވެ.
ލެބޯރެޓަރީ ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މާރިޔާ ވިދާޅުވީ، ފުވައްމުލަކުގައި ގާއިމްކުރި ލެބޯރެޓަރީގެ ސަބަބުން ދަނޑުވެރިކަމުގެ ޚިދުމަތްތައް ޒަމާނީ ފެންވަރަކަށް ތަރައްގީކުރުމަށާއި، ފުޑް ސެކިއުރިޓީ ކަށަވަރުކުރުމަށް ޓަކައި ކުރަމުން އަންނަ މަސައްކަތްތަކަށް މުހިއްމު ފިޔަވަޅުތައް އެޅިގެން ދާނެ ކަމަށެވެ.
ދަނޑުވެރިކަމުގެ ގައުމީ ލެބޯރެޓަރީން ދަނޑުވެރިންގެ އިތުރުން، ދިރާސާކުރާ ފަރާތްތަކަށާއި ސިޔާސަތު ކަނޑައަޅާ ފަރާތްތަކަށްވެސް ޚިދުމަތްދޭނެއެވެ.