މާލޭގެ ގޭގޭގައި ނައްތައިލަން ހުރި ކީރިތި ޤުރުއާނުގެ މުޞްޙަފްތަކާއި، ވަކިވަކި އާޔަތްތައް ހުރި ނަމަ މާލޭ ސިޓީ ކައުންސިލާ ހަވާލުކުރުމަށް އިތުރު ހަފުތާއެއް ދީފިއެވެ.
މާލޭގެ ގޭގޭގައި ނައްތައިލަން ހުރި މުސްހަފުތައް ސިޓީ ކައުންސިލާ ހަވާލުކުރަން ހުޅުވާލީ މިދިޔަ ބުރާސްފަތި ދުވަހެވެ، އަދި ހުޅުވާލި ފުރަތަމަ މުއްދަތު ހަމަވާނީ މިއަދަށެވެ.
ސިޓީ ކައުންސިލުން މިއަދު ކުރި އިއުލާނެއްގައިވަނީ، އެ މުއްދަތު އެއް ހަފުތާއަށް އިތުރުކުރަން ނިންމައި، އަންނަ ހަފުތާގެ ބުރާސްފަތި ދުވަސް ކަމަށްވާ ފެބްރުވަރީ 5 އަށް މުއްދަތު އިތުރުކޮށްފައެވެ.
ކައުންސިލުގެ އިއުލާނުގައިވަނީ، މާލެގެ ގޭގޭގައި ހުރި، ނައްތާލަން ބޭނުންވާ، ބާވެ ނުވަތަ ހަލާކުވެފައިވާ މުޞްޙަފްތަކާއި ކީރިތި ޤުރުއާނުގެ އާޔަތްތަކާއި ކީރިތި ރަސޫލާގެ ޙަދީޘްތައް ލިޔެފައި ހުންނަ ފޮތްތަކާއި ލިޔުންތައް، ކައުންސިލާ ހަވާލު ކުރެވޭނެ އިންތިޒާމް ހަމަޖައްސައިފައިވާ ކަމަށެވެ.
އެގޮތުން އަންނަ ބުރާސްފަތީގެ ނިޔަލަށް، ހޮނިހިރު ދުވަހުގެ ހެނދުނު ނުވަޔަކުން މެންދުރު 12 ޖަހަންދެން، އަދި މެންދުރު 1:00 އިން ހަވީރު 5:00 އަށް ތަކެތި ބަލައިގަންނާނެ ކަމަށް އެ އިދާރާއިން ބުންޏެވެ.
އެ ތަކެތި ބަލައިގަންނާނީ:
- މާލެ: ސިނަމާލެ-3 ގެ ގޯތިތެރެ ( ގަލޮޅު މަދުރަސާ ކުރިމަތިން ބުރުޒުމަގުން ސިނަމާލެ-3 ގެ ގޯތިތެރެއަށް ވަދެވޭ ގޭޓުން އެތެރެ)
- ވިލިމާލެ: މާލޭ ސިޓީ ކައުންސިލް އިދާރާގެ ވިލިމާލެ ސެކްޝަން
- ހުޅުމާލެ: މާލޭ ސިޓީ ކައުންސިލް އިދާރާގެ ހުޅުމާލެ އޮފީސް
ބާވެފައިވާ މުސްހަފްތަކާއި، ކީރިތި ގުރުއާނުގެ އާޔަތްތައް ލިޔެފައި ހުންނަ ލިޔުންތައް ނައްތައިލުމުގެ މަސައްކަތް މީގެ ކުރިން ވެސް ކަމާ ބެހޭ އިދާރާތަކުން ކޮށްފައިވެއެވެ.