މިއަދު ބިންގާ އެޅިގެންދިޔަ އައިލާ މަޝްރޫއާއެކު މުޅި ފަތުރުވެރިކަމުގެ ދާއިރާ ބަދަލުކޮށްލާނެ ކަމަށް އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެއެވެ.
މިނިސްޓަރު ސައީދު މިފަދައިން ވިދާޅުވީ، ސްޕެޝަލް އިކޮނޮމިކް ޒޯނުގެ ދަށުން ރާއްޖޭގައި އެންމެ ފުރަތަމަ ތަރައްގީކުރާ ސަސްޓެއިނަބަލް ޓައުންޝިޕް ޕްރޮޖެކްޓުގެ ބިންގާ އެޅުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުންނެވެ.
މިނިސްޓަރު ސައީދު ވަނީ މި މަޝްރޫއަކީ ހަމައެކަނި ތަރައްގީގެ މަޝްރޫއެއް ނޫން ކަމަށާއި މިއީ ފަތުރުވެރިކަމާއި ދިވެހީންގެ އިގްތިސޯދީ ކުރިއެރުމާ މެދު ވިސްނާލަން ލިބިފައިވާ އިތުރު ފުރުސަތެއް ކަމަށް ވިދާޅުވެފައެވެ. އަދި މިއީ ފަތުރުވެރިަކަމުގެ ދާއިރާގައި މުޅިން އައު ސަފްހާއެއް ހުޅުވައިދޭނެ ދޮރެއް ކަމަށް މިނިސްޓަރު ވިދާޅުވިއެވެ. އަދި މި މަޝްރޫއާއެކު މުޅި ފަތުރުވެރިކަމުގެ ދާއިރާ އެއްކޮށް ބަދަލުކުރައްވާނެ ކަމަށް ސައީދު ވިދާޅުވިއެވެ.
ޓައުންޝިޕް ޕްރޮޖެކްޓުގެ ބިންގާ އެޅުމަށް މިއަދު ބޭއްވި ރަސްމިއްޔާތުގެ ތެރެއިން -- ފޮޓޯ/ ރައީސް އޮފީސް
ދިވެހިރާއްޖޭގެ ގުދުރަތީ ރީތިކަމަކީ އެހެން ތަނަކުން ނުލިބޭނޭ އެއްޗެއްކަން ފާހަގަކުރައްވައި ވަޒީރު ވަނީ އައިލާ ފަދަ މަޝްރޫއަކުން ފަތުރުވެރިކަމުގެ ދާއިރާ ސިންދަފާތުކުރަން ޖެހޭ ކަމަށް ވިދާޅުވެފައެވެ. އަދި ރާއްޖޭގެ މަޝްހޫރު ރިސޯޓު ފަތުރުވެރިކަމުގެ މައްޗަށް ބިނާކޮށް، އަދި ބާޒާރުގެ ޑިމާންޑާ އެއްގޮތަށް ފަތުރުވެރިަކަމުގެ ސިނާއަތް ކުރިއަރުވަން ސަރުކާރުން މަސައްކަތް ކުރަމުންދާ ކަމަށް ވެސް މިނިސްޓަރު ސައީދު ވިދާޅުވިއެވެ.
މި ބިންގަލުގެ މަތީގައި އަޅުގަނޑުމެން މި ބަދަލުކުރަނީ ޓޫރިޒަމްގެ މޮޑެލް. އަޅުގަނޑުމެންގެ ރިސޯޓުތަކުގެ މަޝްހޫރު ކަމާއި، ގެސްޓްހައުސް ޓޫރިޒަމްގެ ކުރިއެރުންތަކާއެކު އައިލާ ފަދަ ޕްރޮޖެކްޓުތަކުން ރާއްޖެއަށް ޒިޔާރާތްކުރާ މީހުންނަށް ލިބޭ ޚިދުމަތުގެ ފެންވަރު ވެސް މަތިވާނެ، އިކޮނޮމިކް މިނިސްޓަރު މުޙައްމަދު ސައީދު
އޭގެ އިތުރަށް ސައީދު ވިދާޅުވީ މި މަޝްރޫއާއެކު ގެދޮރު އިމާރާތް ކުރުމުގެ ދާއިރާއާއި ރީޓެއިލް އަދި ތައުލީމީ ދާޢިރާގެ އިތުރުން ސިއްޚީ ޚިދުމަތްތަކާއި އަމިއްލަ ދާއިރާތަކަށް ބޮޑު ކުރިއެރުމެއް ލިބިގެންދާނެ ކަމަށެވެ. ހަމައެއާއެކު ރާއްޖޭގެ ޓެކްނޮލަޖީ ދާއިރާއަށް ބޮޑު ކުރިއެރުމެއް ލިބި، ވަޒީފާގެ ފުރުސަތުތައް އުފެދި ރާއްޖޭގެ އުފެއްދުންތެރިކަމަށް ބޮޑު މަންފާއެއް ކުރާނެ ކަމަށް މިނިސްޓަރު ސައީދު ވަނީ ވިދާޅުވެފައެވެ.
ސަރުކާރުން ބުނި ގޮތުގައި، ސްޕެޝަލް އިކޮނޮމިކް ޒޯންގެ މި މަޝްރޫއަކީ، އިގުތިސާދީ ގޮތުން ރާއްޖެއަކީ ފުދުންތެރި ގައުމަކަށް ހެދުމަށް ސަރުކާރުގެ ތަސައްވުރުގެ ތެރެއިން ކުރިއަށްގެންދާ މުހިންމު މަޝްރޫއެކެވެ.
ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ 790 މިލިޔަން ޑޮލަރު ނުވަތަ 12.2 ބިލިޔަން ރުފިޔާގެ މި މަޝްރޫއަކީ މުޅި އިންޑިއާ ކަނޑުގެ ސަރަހައްދުގައި ފާހަގަކޮށްލެވޭ އަދި، ދުނިޔޭގެ ފެންވަރުގައި ފާހަގަކުރެވޭނެ ދެމެހެއްޓެނިވި ތަރައްގީގެ ނަމޫނާއަކަށް ވާނެ ކަމަށް ސަރުކާރުން ވަނީ ބުނެފައެވެ.
ސަރުކާރުގެ އަމާޒަކީ އަންނަ އަހަރު ނިންމާ، 2028 ވަނަ އަހަރުގެ ނިމުމުގެ ކުރިން ސަސްޓެއިނަބަލް ޓައުންޝިޕް އޮޕަރޭޝަނަށް ގެނައުމެވެ.