ސްޕެޝަލް އިކޮނިމިކް ޒޯން (އެސްއީޒެޑް)ގެ ގާނޫނުގެ ދަށުން ރާއްޖޭގައި ފުރަތަމަ ފަހަރަށް ހިންގާ ޓައުންޝިޕް މަޝްރޫއުގެ ބިންގާ މިއަދު އަޅައިފިއެވެ.
މި މަޝްރޫއުގެ ބިންގާ އަޅައިފައިވަނީ މިކަމަށް ޚާއްސަކޮށް މިއަދު ނ. އަތޮޅުގައި ބޭއްވި ރަސްމިއްޔާތެއްގައެވެ.
ސަރުކާރުން ބުނި ގޮތުގައި، ސްޕެޝަލް އިކޮނޮމިކް ޒޯންގެ މި މަޝްރޫއަކީ، އިގުތިސާދީ ގޮތުން ރާއްޖެއަކީ ފުދުންތެރި ގައުމަކަށް ހެދުމަށް ސަރުކާރުގެ ތަސައްވުރުގެ ތެރެއިން ކުރިއަށްގެންދާ މުހިންމު މަޝްރޫއެކެވެ. މި މަޝްރޫއަކީ މުޅި އިންޑިއާ ކަނޑުގެ ސަރަހައްދުގައި ފާހަގަކޮށްލެވޭ އަދި، ދުނިޔޭގެ ފެންވަރުގައި ފާހަގަކުރެވޭނެ ދެމެހެއްޓެނިވި ތަރައްގީގެ ނަމޫނާއަކަށް ވާނެ ކަމަށް ސަރުކާރުން ވަނީ ބުނެފައެވެ.
ޓައުންޝިޕް މަޝްރޫއު ވާނީ ރާޢްޖޭގެ ފަތުރުވެރިކަމުގެ ސިނާއަތުގެ އިތުރުން އިގުްތިސާދު ސިންދަފާތުކޮށް، އިގުްތިސާދީ ދާއިރާއަށް ބޮޑު ބަދަލެއް ގެނުވާނޭ މަޝްރޫއަކަަށް ކަމަށް ސަރުކާރުން ވަނީ ބުނެފައެވެ.
ސަސްޓެއިނަބަލް ޓައުންޝިޕް މަޝްރޫއުގެ ކުރެހުމެއް: އެ މަޝްރޫއުގެ ބިންގާ ވަނީ އަޅައިފައި -- ފޮޓޯ: ޕީއެސްއެމް ނިއުސް
މި ޕްރޮޖެކްޓް ކުރިއަށްގެންދިއުމަށް ހަމަޖެހިފައި ވަނީ ވަކިވަކި ރަށްތަކެއްގެ ގޮތުގައި، ތިން ފަޅެއް ތަރައްގީކޮށްގެންނެވެ. އެއީ ނ. އަތޮޅުގެ ދިގުފަރު ފަޅާއި، ދެކުނުފަރު އަދި ކުރަމާދޫ ހިމެނޭ ސަރަހައްދުގައެވެ.
ޕްރޮޖެކްޓް އައިލާގައި، ލަގްޒަރީ ވިލާތަކާއި ހައިއެންޑް ހޯމްސް ހިމެނޭހެން ތަރައްގީކުރާ ރިއަލްއެސްޓޭޓް ޑިވޮލޮޕްމެންޓް މަޝްރޫތައް ހިމެނެއެވެ. އަދި ބައިނަލްއަގްވާމީ ފެންވަރުގެ ސިއްޚީ ޚިދުމަތްދޭ މަރުކަޒެއް ގާއިމްކުރުމާއި، ބައިނަލްއަގްވާމީ ފެންވަރުގެ ހޮސްޕިޓާލިޓީ ތަމްރީނުދޭ މަރުކަޒެއް ގާއިމްކުރުމަށް ހަމަޖެހިފައިވާއިރު އަލްޓްރާ ލަގްޒަރީ ޓޫރިސްޓް ރިޒޯޓް ހޮޓެލް އަދި މެރީނާ ގާއިމްކުރުމަށް ވަނީ ހަމަޖެހިފައެވެ.
ފާހަގަކޮށްލެވޭޭ ގޮތުގައި ޓައުންޝިޕް މަޝްރޫއަކީ ފަތުރުވެރިކަމަށާއި ދިގު މުއްދަތަކަށް ރާއްޖޭގައި ދިރިއުޅެން ބޭނުންވާ މީހުންނަށް ވެސް ޚާއްސަކޮށްގެން ކުރިއަށްގެންދާ މަސައްކަތެކެވެ.
ސަސްޓެއިނަބަލް ޓައުންޝިޕް މަޝްރޫއުގެ ބިންގާ އެޅުން: އެއީ 790 މިލިޔަން ޑޮލަރުގެ މަޝްރޫއެއް -- ފޮޓޯ/ ރައީސް އޮފީސް
ޕްރޮޖެކްޓް އައިލާގެ ދަށުން ހުއްދަދެވޭ އިތުރު ކަންތައްތަކަށް ބަލާލާއިރު، ރިޒޯޓް، ހޮޓެލް އަދި މެރީނާ ތަރައްގީކުރުމުގެ އިތުރުން އެ ޒޯނުގައި ކުނި މެނޭޖުކުރުމަށް ގާއިމްކުރެވޭ އިންފްރާސްޓްރަކްޗާ ވަސީލަތްތައް ގާއިމުކުރުން ހިމެނެއެވެ. އަދި ދިވެހިރާއްޖެއަށް އިމްޕޯޓުކުރާ ކާބޯތަކެތީގެ ބާވަތްތައް މަދުކުރުމުގެ ގޮތުން އެގްރިކަލްޗަރަލް އަދި މެރިކަލްޗަރަލް ބައެއް ބަސައްކަތްތައް ކުރިއަށް ގެންދިއުމަށް ވަނީ ހަމަޖެހިފައެވެ.
ކްރިސްޓަލް ހޯލްޑިންގްސް ޕްރައިވެޓް ލިމިޓެޑާ ހަވާލުކޮށްގެން ކުރިއަށްގެންދާ 790 މިލިޔަން ޑޮލަރު ނުވަތަ 12.2 ބިލިޔަން ރުފިޔާގެ މި މަސައްކަތް ފަށާފައި ވާއިރު، ސަރުކާރުގެ އަމާޒަކީ އަންނަ އަހަރު ނިންމާ، 2028 ވަނަ އަހަރުގެ ނިމުމުގެ ކުރިން ސަސްޓެއިނަބަލް ޓައުންޝިޕް އޮޕަރޭޝަނަށް ގެނައުމެވެ.
މި މަޝްރޫއު ފެށުމަށް އެއްބަސްވުމުގައި ސޮއިކޮށް، މަޝްރޫއު ކުރިއަށްގެންދިއުމަށް ދޭންޖެހޭ ހުއްދަތައް ސަރުކާރުން މަޝްރޫއު ކުރިއަށްގެންދާ ކްރިސްޓަލް މޯލްޑިވްސްއަށް ހަވާލުކޮށްފައިވަނީ މިދިޔަ އަހަރުގެ ޑިސެމްބަރު މަހުގައެވެ.