ށ. ފޭދޫ ރައްވެހިންގެ ތެރެއިން އެކި ބޭނުންތަކަށް ރަށުން ބޭރުގައި ދިރިއުޅެމުން އަންނަ މީހުންގެ މައުލޫމާތު އެއްކޮށް، ދަފްތަރެއް އެކުލަވާލުމުގެ މަސައްކަތް އެ ރަށު ކައުންސިލުން ފަށައިފިއެވެ.
ފޭދޫ ކައުންސިލުން މިއަދު ކުރި އިޢުލާނެއްގައި ބުނެފައިވަނީ، ރަށުން ބޭރުގައި ދިރިއުޅޭ ފަރާތްތަކުގެ ދަފްތަރެއް އެކުލަވާލުމުގެ މައިގަނޑު ބޭނުމަކީ ރަށުގެ ރައްވެހިން ދިރިއުޅޭ ތަންތަނާއި، އެ ފަރާތްތަކުގެ ތަފާސްހިސާބު ދެނެގަތުން ކަމަށެވެ. މިގޮތުން ރަށުން ބޭރުގައި ދިރިއުޅޭ ފަރާތެއްކަމާއި، ދިރިއުޅެމުންދާ މުއްދަތު ކައުންސިލުން ކަނޑައަޅާނީ އެ އިދާރާއަށް ހުށަހަޅާ ރަސްމީ ލިޔެކިޔުންތަކަށް ބެލުމަށްފަހުގައި ކަމަށް ބުންޏެވެ.
ރަށުން ބޭރުގައި ދިރިއުޅޭކަން ސާބިތުކޮށްދިނުމަށް ހުށަހެޅިދާނެ ލިޔެކިޔުންތަކުގެ ތެރޭގައި ހިމެނެނީ:
- ވަޒީފާގެ ލިޔުން: ޕެންޝަން ސްކީމަށް ހިއްސާކުރާ އަމިއްލަ ކުންފުނިތަކުން ނުވަތަ ސަރުކާރުގެ އިދާރާތަކުން ދޫކޮށްފައިވާ ވަޒީފާގެ ރަސްމީ ލިޔުން. މި ލިޔުމުގައި ވަޒީފާ އަދާކުރަން ފެށި ތާރީޚާއި، މުއައްސަސާގެ ސިއްކައާއި ސޮއި އޮންނަންޖެހެއެވެ. ޕެންޝަން ޤާނޫނުގެ ކުރިން ވަޒީފާ އަދާކޮށްފައިވާނަމަ، އެކަން އެނގޭނެ ރަސްމީ ލިޔުމެއް ހުށަހަޅަންޖެހެއެވެ.
- ތަޢުލީމީ ލިޔުން: ދިރިއުޅޭ ރަށެއްގެ ތަޢުލީމީ މަރުކަޒަކުން ތަޢުލީމު ހާސިލުކުރަމުންދާކަން ނުވަތަ ހާސިލުކޮށްފައިވާކަން އެނގޭނެ ލިޔުން.
ދައުލަތުގެ އިދާރާގެ ލިޔުން: ދައުލަތުގެ އިދާރާއަކުން ރަސްމީކޮށް ބަލަހައްޓާ ލިޔެކިޔުންތަކުން، އެ ރަށެއްގައި ދިރިއުޅޭކަން ސާބިތުވާ ލިޔުމެއް. - އެފިޑެވިޓް: ދިރިއުޅޭ ރަށުގައި ހުރި ގޭގެ ވެރިފަރާތުން ދީފައިވާ، ޕަބްލިކް ނޯޓަރީއެއްގެ ކުރިމަތީގައި ހުވާކޮށް ނޮޓޮރައިޒްކޮށްފައިވާ އެފިޑެވިޓެއް.
މި ދަފްތަރުގައި ރަޖިސްޓްރީވުމަށް އެދޭ ފަރާތްތަކުން ކައުންސިލުން ދީފައިވާ ލިންކް މެދުވެރިކޮށް މަޢުލޫމާތު ފުރިހަމަކުރުމަށް ކައުންސިލުން ވަނީ އެދިފައެވެ.
ފޭދޫ ކައުންސިލުން އިތުރަށް ބުނީ، މި މަސައްކަތަކީ ރަށުގެ ތަރައްޤީގެ ޕްލޭންތަކާއި ރައްޔިތުންނަށް ބޭނުންވާ ޚިދުމަތްތައް ފޯރުކޮށްދިނުމުގައި އެންމެ ފަހުގެ މަޢުލޫމާތު ހޯދުމަށް ކުރެވޭ މުހިންމު މަސައްކަތެއް ކަމަށެވެ.
މިފަދަ ދަފްތަރެއް އެކުލަވައިލުމުގެ މަސައްކަތް އެ ރަށު ކައުންސިލުން ފެށީ، ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކުރާ ބިން ނުވަތަ ފުލެޓަށް ކުރިމަތިލުމަށް ޓަކައި އެ ފަރާތަކީ މާލޭގައި، ދިރިއުޅޭ ފަރާތެއްކަން، އަންގައިދޭ ލިޔުން ހޯދުމަށް އެކި، ފަރާތްތަކުން ކައުންސިލްތަކަށް ހުށަހަޅަމުން ގެންދާ ކަމަށް ކައުންސިލްތަކުން ބުނަމުން އަންނަނިކޮށެވެ.
ނަމަވެސް ކައުންސިލެއްގައި، ބަލަހައްޓާ ރަސްމީ މަޢުލޫމާތުގެ މައްޗަށް ބިނާކޮށް އެ ފަރާތުން މާލޭގައި، ދިރިއުޅުނު މުއްދަތު ސާބިތުކޮށް ނުދެވޭނަމަ ކައުންސިލަކުން އެ ފަދަ ލިޔުމެއް އެއްވެސް ފަރާތަކަށް ދޫނުކުރުމަށް، ކައުންސިލްތަކުގެ ބެލެނިވެރި ފަރާތްކަމަށްވާ ލޯކަލް ގަވަމަންޓް އޮތޯރިޓީ (އެލްޖީއޭ)އިން ވަނީ އެދިފައެވެ.
ރަށްރަށުން ގިނަ ބަޔަކު މާލެ ސަރަހައްދަށް، އެކި ބޭނުންތަކުގައި ދިރިއުޅުން ބަދަލުކުރާއިރު، ގިނަ ބަޔަކު އުޅެނީ ބޮޑެތި ކުލިތަކުގައި ކުދިކުދި ތަންތަނުގައެވެ. މާލޭގައި މާލޭ ރައްޔިތުންގެ މެދުގައި ވެސް ބޯހިޔާވަހިކަމުގެ މައްސަލަ ބޮޑުއިރު، ބޮޑުކުލީގެ މައްސަލަ ވެސް ބޮޑެވެ.