އެެމެރިކާގެ މިނެސޮޓާގައި ބޭއްވި ޓައުން ހޯލް ބައްދަލުވުމެއްގައި ވާހަކަދައްކަވަން ހުންނަވަނިކޮށް މީހަކު ގޮސް އެ ގައުމުގެ ގާނޫނު ހަދާ މަޖިލީހުގެ މެމްބަރު އިލްހާން އުމަރުގެ ގަޔަށް ގޮތް ނޭގޭ ސްޕްރޭއެއް ޖަހައިފިއެވެ.
ހާދިސާއާ ގުޅިގެން އިލްހާނަށް އެއްވެސް ގެއްލުމެއް ލިބިފައިނުވާ ކަމަށް ރިޕޯޓުތައް ބުނެއެވެ.
އެކަން ކުރި މީހާ މިހާރު ހައްޔަރުކޮށްފައިވާ ކަމަށް ފުލުހުންނާ ހަވާލާދީ ރޮއިޓާސް ނޫހުން ރިޕޯޓުކޮށްފައިވެއެވެ. ނަމަވެސް ޖެހި ސްޕްރޭއާ ގުޅޭ އެއްވެސް މައުލޫމާތެއް ހާމަކޮށްފައެއްނުވެއެވެ.
އެ ހަމަލާގެ ދިން ވަގުތު ނަގާފައިވާ ވީޑިއޯއަކުން ކަޅު ކުލައިގެ ކޯޓެއް ލައިގެން ހުރި މީހަކު އިލްހާން ވާހަކަ ދައްކަވަން ހުންނެވި ތަނަށް ދުވެފައި ގޮސް ސިރިންޖަކުން އޭނާގެ ގަޔަށް ސްޕްރޭ ކުރާތަން ފެނެއެވެ. ސްޕްރޭ ކުރި ވަގުތު އިލްހާން އިސްތިއުފާ ދޭން ޖެހޭ ކަމަށް ބުނާ އަޑުވެސް އިވެއެވެ.
އެ ވަގުތު އިލްހާން ދިޔައީ އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސް) އުވާލައި، ޑިޕާޓްމަންޓް އޮފް ހޯމްލޭންޑް ސެކިއުރިޓީގެ ސެކްރެޓަރީ ކްރިސްޓީ ނޯއެމް އިސްތިއުފާ ދެއްވުމަށް ގޮވާލައްވަމުންނެވެ.
ސްޕްރޭކުރުމާ އެކު ސެކިއުރިޓީން އެ މީހާ ހިފަހައްޓައި ބިންމައްޗަށް ވައްޓާލުމަށްފަހު އަތުގައި ކްލިޕް އެޅުވިއެވެ. އެ މީހާ ހިފެހެއްޓުމާ އެކު، އެ ބައްދަލުވުމުގައި ތިބި މީހުން ތަރުހީބުދީ އަތްޖަހަން ފެށިއެވެ.
ހަމަލާއަށް ފަހުވެސް އިލްހާން ވަނީ އޭނާގެ ވާހަކަ ކުރިއަށްގެންދަވާފައެވެ.
އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައާއި އިމިގްރޭޝަން އިސްލާހުކުރުން ފަދަ މައްސަލަތަކާ ދެކޮޅަށް ވާހަކަ ދައްކަވާތީ އެމެރިކާއަށް ހިޖްރަކޮށްފައިވާ ސޯމާލިއާއަށް އުފަން މުސްލިމެއް ކަމަށްވާ އިލްހާނަށް މީގެކުރިންވެސް ވަނީ އެމެރިކާގެ ކޮންޒަވޭޓިވުންގެ ފާޑުކިޔުން އަމާޒުވެފައެވެ.
އިލްހާނަކީ މިނެސޮޓާ ސިޓީގައި ގަވާއިދާ ހިލާފަށް އުޅޭ މީހުން ހައްޔަރު ކުރުމަށް ޑިސެމްބަރު މަހު އައިސް އިން ފެށި "އޮޕަރޭޝަން މެޓްރޯ ސާޖް" އާވެސް ވަަރަށް ބޮޑަށް ދެެކޮޅު ހައްދަވާ ބޭފުޅެކެވެ.
އިލްހާނަކީ އެމެރިކާގެ ރައީސް ޑޮނަލްޑް ޓްރަމްޕްވެސް ރުހިވަޑައިނުގަންނަވާ ބޭފުޅެކެވެ. އިލްހާނަކީ "ކުންޏެއް" ކަމަށް ވިދާޅުވެ، ސޯމާލިއާ-އެމެރިކާ ކޮމިއުނިޓީގެ މެމްބަރުން ހިމެނޭ ކަމަށް ބުނާ ކޮރަޕްޝަންގެ މައްސަލައަކާ ގުޅިގެން އޭނާގެ މާލިއްޔަތު ތަހުގީގު ކުރައްވާނެ ކަމަށްވެސް މިދިޔަ މަހު ޓްރަމްްޕް ވިދާޅުވެފައިވެއެވެ.
އިލްހާނަކީ އެމެރިކާގެ ކޮންގްރެސްއަށް އިންތިހާބުވި ފުރަތަމަ މުސްލިމް ދެ އަންހެން ބޭފުޅުންގެ ތެރޭގައި ހިމެނޭ އެއް ބޭފުޅާއެވެ. އިލްހާން މިހާރު އަދަކުރައްވަމުން ގެންދަވަނީ ގާނޫނު ހަދާ މަޖިލީހުގެ ހަތަރު ވަނަ ދައުރެވެ.