އިންޑިއާގެ އިތުރުން ދުނިޔޭގެ އެތައް ބައެއްގެ މެދުގައި މަގުބޫލު ލަވަކިޔުންތެރިޔާ އަރިޖިތު ސިންގް ފިލްމުތަކަށް ލަވަކިޔުން ހުއްޓާލިކަން އިއުލާނުކޮށްފިއެވެ.
އަރިޖިތު އިންސްޓަގްރާމް މެދުވެރިކޮށް ކުރި ޕޯސްޓުގައި ލަވަކިޔުން ހުއްޓާލިކަން އިއުލާނުކުރީ އާ އަހަރުގެ ތަހުނިޔާ ވެސް ސަޕޯޓަރުންނަށް ރައްދު ކުރަމުންނެވެ.
މި ޕޯސްޓުގައި އަރިޖިތު ވަނީ ފާއިތުވެދިޔަ އަހަރުތަކުގައި އެހުންތެރިންގެ ފަރާތުން ލިބުނު ލޯތްބަށް ޝުކުރު އަދާކޮށްފައެވެ.
ކުރިއަށް އޮތް ތަނުގައި އެއްވެސް ފިލްމަކަށް ނުވަތަ 'ޕްލޭބެކް ވޮކަލިސްޓް'އެއްގެ ހައިސިއްޔަތުން އެއްވެސް އާ ޕްރޮޖެކްޓެއް ނުނަގާނެ ކަމަށް އަރިޖިތުގެ ޕޯސްޓުގައި ވަނީ ބަޔާންކޮށްފައެވެ.
ފިލްމުތަކަށް ލަވަކިޔުމުގައި ދެމިހުރުމަށްޓަކައި ކުރި ދަތުރަކީ ވަރަށް އުފާވެރި ދަތުރެއް ކަމަށާއި ނަމަވެސް އެ މަސައްކަތާ ދުރަށް ދާން ނިންމިކަން އިންސްޓަގްރާމް މެދުވެރިކޮށް އަރިޖިތު ވަނީ އިއުލާނުކޮށްފައެވެ.
އަރިޖިތު ސިންގް އިނގިރޭސި ލަވަކިޔުންތެރިޔާ އެޑް ޝީރަންއާ އެކު--ފޮޓޯ/ބޮލީވުޑްހަންގާމާ
އަރިޖިތުގެ އެ ނިންމުމާ އެކު ވަރަށް ގިނަ ބަޔަކަށް މާޔޫސްކަން ލިބި ސޯޝަލް މީޑިއާގައި ވަނީ އެކި ކަހަލަ ޝުއޫރުތައް ފާޅުކޮށްފައެވެ. ބައެއް ސަޕޯޓަރުން ބުނެފައި ވަނީ މިއީ އެއްގޮތަކަށް ވެސް އެ މީހުން ތައްޔާރުވެތިބި ނިންމުމެއް ނޫން ކަމަށާއި އަރިޖިތު 1.4 ބިލިއަން މީހުންގެ ހިތް ރޮއްވާލައިފި ކަމަށެވެ.
ދެ ފަހަރު ނެޝަނަލް އެވޯޑު ހާސިލުކޮށްފައިވާ ލަވަކިޔުންތެރިޔާގެ މި ނިންމުމަކީ 'ބްރޭކްއަޕް' ލަވައެއް ކަމަށް އިހުސާސް ކުރެވުނު ކަމަށް ވެސް ސަޕޯޓަރަކު ވަނީ ބުނެފައެވެ.
ސަޕޯޓަރުންގެ މި މެސެޖުތަކަށް ރައްދު ދެމުން އަރިޖިތު ބުނީ ލަވަކިޔުން ހުއްޓާލި ނަމަވެސް އޭނާ މިއުޒިކީ ދާއިރާއާ ގުޅުންހުރި މަސައްކަތްތައް ކުރުމުގައި ދެމިހުންނާނެ ކަމަށެވެ.
ލަވަކިޔުން ހުއްޓާލަން ނިންމުމަކީ މިއުޒިކުން ރިޓަޔާވީ ނޫން ކަމަށާއި ނަމަވެސް މިވަގުތު އިސްކަންދެނީ އަމިއްލަ މީހާގެ ކުރިއެރުމަށް މަސައްކަތް ކުރުމަށް ކަމަށާއި އުފެއްދުންތެރި މިއުޒިކް މިނިވަންކަމާ އެކު ތައްޔާރު ކުރުމުގެ މަސައްކަތްތައް ކުރުމަށް އޭނާ ބްރޭކެއް ނެގީ ކަމަށް އަރިޖިތު ވަނީ ބުނެފައެވެ.
ލަވަކިޔުން ހުއްޓާލުމަށްފަހު ދެން ބޮޑަށް އިސްކަންދޭނީ މީގެކުރިންވެސް މަސައްކަތް ކުރަމުންދިޔަ އިންޑިއަން ކްލެސިކަލް މިއުޒިކް އުފެއްދުމަށް ކަމަށް ވެސް ލަވަކިޔުންތެރިޔާ ވަނީ ބުނެފައެވެ.
އަރިޖިތު ލަވަކިޔުން ހުއްޓާލިކަން އިއުލާނުކުރުމާ ގުޅިގެން ލަވަކިޔުންތެރިޔާއާ އެކު އެކީގައި މަސައްކަތްކޮށްފައިވާ މިއުޒިކް ކޮމްޕޯސަރ އަދި ލަވަކިޔުންތެރިޔާ އަމާލް މަލިކް ބުނީ އެ ޚަބަރާ އެކު ބުނާނެ އެއްޗެއް ނޭނގި ހުއްޓުން އެރި ކަމަށެވެ. ނަމަވެސް އަރިޖިތުގެ ނިންމުމަށް އިހުތިރާމްކުރާ ކަމަށާއި އަރިޖިތުއާ އެކު މަސައްކަތް ކުރަން ލިބުނު ފުރުސަތުތަކީ އަބަދުވެސް ޝުކުރުވެރިވާނެ ފުރުސަތުތަކެއް ކަމަށެވެ.
ފިލްމީ ޚަބަރުތައް ގެނެސްދޭ ޕިންކްވިލާގެ ރިޕޯޓެއްގައި ބުނެފައިވާ ގޮތުން އަރިޖިތު އަންނަނީ ފިލްމު ޑައިރެކްޝަނާއި ޕްރޮޑަކްޝަންގެ މަސައްކަތް ފެށުމަށް ވެސް ތައްޔާރުވަމުންނެވެ. އެގޮތުން އަރިޖިތު ޑައިރެކްޓަރެއްގެ ގޮތުގައި ފުރަތަމަ ފަހަރަށް ގެނެސްދޭނީ ހިންދީ ޖަންގަލް އެޑްވެންޗާއެއް ކަމަށް ވެސް ޕިންކްވިލާގައި ބުނެފައިވެއެވެ.
މި ފިލްމުގެ ކޯ-ޕްރޮޑިއުސަރެއްގެ ގޮތުގައި މަސައްކަތްކުރާނީ ފިލްމުގެ ސްކްރިޕްޓް ތައްޔާރު ކުރުމުގެ ޓީމުގައި ވެސް ހިއްސާވާ އަރިޖިތުގެ އަންހެނުން ކޮއެލް ސިންގްއެވެ. މިއީ އަރިޖިތު އާއި ކޮއެލްގެ ފިރިހެން ދަރިފުޅު އަދި އެކްޓަރު ނަވާޒުއްދީނު ސިއްދީގީގެ ދަރިފުޅު ޝޯރާ ފިލްމީ ދާއިރާއަށް ތައާރަފްވާނެ ފިލްމު ކަމަށް ވެސް ޕިންކްވިލާގައި ވަނީ ބުނެފައެވެ.
ނަމަވެސް މިކަން އަރިޖިތުގެ ޓީމުން މިހާތަނަށް ކަށަވަރުކޮށްދީފައެއް ނުވެއެވެ.
ހިންދީ ފިލްމު މިއުޒިކް އިންޑަސްޓްރީގެ އެންމެ ކާމިޔާބު އަދި ހުނަރުވެރި ލަވަކިޔުންތެރިއަކު މިނިވަންކަމާ އެކު އަމިއްލަ އުފެއްދުންތައް އުފެއްދުންތަކަށް އިސްކަންދީ ކޮމާޝަލް މިއުޒިކް ދޫކޮށްލުމަކީ އެ އިންޑަސްޓްރީއިން ވަރަށް މަދުން ނޫނީ ނުފެންނަ މަންޒަރެއް ކަމަށް ގިނަ ބަޔަކު ވަނީ ބުނެފައެވެ.
މިދިޔަ އަހަރު ޕަދްމާ ޝްރީ އެވޯޑުގެ ޝަރަފު ވެސް އިންޑިއާގެ ސަރުކާރުން އަރުވާފައިވާ ލަވަކިޔުންތެރިޔާ އަކީ މަޝްހޫރު މިއުޒިކް އެޕްލިކޭޝަން ސްޕޮޓިފައިގައި 169 މިލިއަން ފޮލޮވަސް ތިބި ހަމައެކަނި އިންޑިއާގެ މިއުޒިކު އާޓިސްޓެވެ.
ވަރަށް އާދައިގެ ދިރިއުޅުމަކަށް ލޯބިކުރާ އަރިޖިތު ފަހުން ދިރިއުޅެމުން އައިސްފައި ވަނީ މުމްބާއީގެ ހަލަބޮލި މާހައުލާ ދުރުގައި ވެސްޓް ބެންގާލްގައި އޮންނަ އަމިއްލަ ޓައުން ކަމަށްވާ ޖިއަގަންޖްގައެވެ.
މިދިޔަ އަހަރު އިނގިރޭސި ލަވަކިޔުންތެރިޔާ އެޑް ޝީރަން އިންޑިއާއަށް ކުރި ޓުއާގައި އަރިޖިތުއާ ބައްދަލުކުރުމަށް ޖިއަގަންޖްއަށް ވެސް ގޮސްފައިވެއެވެ. އަރިޖިތުގެ ވަރަށް ގާތް ރަހްމަތްތެރިއެއް ކަމަށްވާ އެޑް ޝީރަން ވަނީ މި ދަތުރުގައި ދެ މީހުން ގުޅިގެން "ސެފާ"ގެ ނަމުގައި މިއުޒިކް ވީޑިއޯއެއް ވެސް ރިލީޒްކޮށްފައެވެ. އެ ވީޑިއޯއަށް މިހާތަނަށް 4.5 މިލިއަން ވިއުސް ވަނީ ލިބިފައެވެ.