އިނގިރޭސިވިލާތުގެ ކުރީގެ މަޝްހޫރު ފުޓްބޯޅަ ކުޅުންތެރިޔާ ޑޭވިޑް ބެކަމް އާއި އަންހެނުން ވިކްޓޯރިއާ ބެކަމްއާ ދެކޮޅަށް ދެ މީހުންގެ ދޮށީ ދަރިފުޅު ބްރުކްލިން ސޯޝަލް މީޑިއާގައި ވާހަކަތަކެއް ދެއްކި ނަމަވެސް ވިކްޓޯރިއާއަށް ނަފުރަތު ނުކުރާނެ ކަމަށް ބަތަލާ ކަންގަނާ ރަނައުތު ބުނެފިއެވެ.
ސޯޝަލް މީޑިއާގައި މިކަމާ ގުޅޭގޮތުން ކުރި ޕޯސްޓެއްގައި ކަންގަނާ ބުނީ ޅީ ދަރިފުޅާއި މައިދަތައާއި ދެމެދު ކިތަންމެ ބޮޑު މައްސަލަތަކެއްޖެހި ޑްރާމާތަކެއް ކުޅުނު ނަމަވެސް ބަތަލާ އަބަދުވެސް ތާއީދުކުރާނީ ވިކްޓޯރިއާއަށް ކަމަށާއި ވިކްޓޯރިއާ ދެކެ ނަފުރަތު ނުކުރާނެ ކަމަށެވެ.
ކަންގަނާ ވަނީ އިންސްޓަގްރާމްގައި ވިކްޓޯރިއާ 2007 ވަނަ އަހަރު ބައިވެރިވި ރިއަލިޓީ ޓީވީ ޝޯއެއްގެ ވީޑިއޯ ކްލިޕެއް ހިއްސާކޮށްފައެވެ. އެ ވީޑިއޯގައި ވިކްޓޯރިއާ ފެންނަނީ އެމެރިކާއަށް ދިރިއުޅުން ބަދަލުކުރި ދުވަސްވަރު އެ ޤައުމުގެ ލައިސަންސް ހެއްދުމަށް ބޭނުންވާ ފޮޓޯ ނަގަން ލައިސަންސް އޮފީހުގައި ހަރަކާތްތެރިވާ މަންޒަރެވެ.
ލައިސަންސްއަށް ބޭނުންވާ ފޮޓޯ ނެގި ވަގުތު ވިކްޓޯރިއާގެ ހަރަކާތްތައް ހުރީ ފޮޓޯ ޝޫޓެއްގައި މަސައްކަތްކުރާ ގޮތަށް ކަމަށް ބުނެ ވަރަށް ގިނަ ބައެއްގެ ސަމާލުކަން އެ ވީޑިއޯއަށް އޭރު ލިބުނެވެ. މި ވީޑިއޯ ކްލިޕް ހިއްސާކުރަމުން ކަންގަނާ ބުނީ އޭރުވެސް ވިކްޓޯރިއާ އަކީ "ރިއަލް ކުއީން"އެއް ކަމަށެވެ.
ބްރޫކްލިން ބެކަމް އަނބިމީހާ ނިކޯލާއާ އެކު އަދި ވިކްޓޯރިއާ ޑޭވިޑް ބެކަމްއާ އެކު--ފޮޓޯ/އެންޑީޓީވީ
ވިކްޓޯރިއާ އާއި ޑޭވިޑްގެ ދަރިފުޅު ބްރުކްލިން ވަނީ މައިންބަފައިން އޭނާގެ އަންހެނުން ނިކޮލާގެ ގުޅުން ޚަރާބު ކުރުމުގެ މަސައްކަތް ކޮށްފައިވާ ކަމަށް ތުހުމަތުކޮށް އާއިލާތެރޭގައި ހިނގާފައިވާ ގިނަ ހަމަނުޖެހުންތަކެއްގެ ވާހަކަ ސޯޝަލް މީޑިއާ މެދުވެރިކޮށް އާއްމުކޮށްފައެވެ.
މި ވާހަކަތަކަށް މިހާތަނަށް ބެކަމްގެ އާއިލާއިން ރަސްމީކޮށް ވަކި އެއްޗެއް ބުނެފައި ނުވާއިރު ވަރަށް ގިނަ ބައެއްގެ ފާޑުކިޔުންތައް އެ އާއިލާއަށާއި ބްރުކްލިންއަށް އަންނަނީ ކުރިމަތިވަމުންނެވެ.
ދާދިފަހުން ބެކަމް ބައިވެރިވި އިވެންޓެއްގައި ނޫސްވެރިޔަކު މިކަމާ ގުޅޭގޮތުން ސުވާލުކުރުމުން ބުނީ ކުދިންނަށް ދިރިއުޅުމުގައި ގޯސްތައް ހެދޭނެ ކަމަށާއި ބެކަމްގެ ކުދިންނަށް ވެސް ގޯސްތައް ހެދޭނެ ކަމަށް ގަބޫލުކުރާ ކަމަށެވެ.
ވިކްޓޯރިއާ އާއި ބެކަމްގެ ކައިވެންޏަށް ހަތަރު ކުދިން ލިބިފައިވާއިރު ބްރުކްލިން ނޫން އެހެން ކުދިން ދިރިއުޅެމުން އަންނަނީ ޑޭވިޑް އާއި ވިކްޓޯރިއާއާ އެކުގައެވެ.