އިންޑިއާގައި ފެތުރެމުންދާ ނުރައްކާތެރި ނިޕާ ވައިރަހަށް ފަރުވާ ކުރުމަށްޓަކައި، ކޮވިޑް-19 ބައްޔަށް ފަރުވާ ދިނުމަށް ޗައިނާގައި އުފައްދާފައިވާ ބޭހެއް ބޭނުންކުރެވިދާނެ ކަމަށް އާ ދިރާސާއަކުން ދައްކައިފިއެވެ.
ޗައިނާގެ ވޫހާން އިންސްޓިޓިއުޓް އޮފް ވައިރޮލޮޖީގެ ދިރާސާވެރިން ހާމަކުރި ގޮތުގައި، ކޮވިޑަށް ފަރުވާ ދިނުމަށް ތައްޔާރުކުރި 'VV116' ނަމަކަށް ކިޔާ ބޭސް ބޭނުންކޮށްގެން، ނިޕާ ވައިރަސް ޖެހިފައިވާ ޖަނަވާރުންގެ ތެރެއިން ތިންބައިކުޅަ ދެބައި ޖަނަވާރު ވަނީ ބަލިން ސަލާމަތްވެފައެވެ.
މި ދިރާސާގައި ބޭނުންކުރި ހެމްސްޓާތަކަށް މި ބޭސް ދިނުމުން، އެ ސޫފިތަކުގެ ފުއްޕާމޭ، އަދި ސިކުނޑީގައި ވައިރަސް އަށަގަންނަ މިންވަރު ވަރަށް ބޮޑަށް ދަށްކޮށްދީ، މަރުވުމުގެ ފުރުސަތު ކުޑަކޮށްދީފައިވާ ކަމަށް ދިރާސާވެރިން ފާހަގަކުރެއެވެ.
ނިޕާ ވައިރަހަކީ މިހާތަނަށް އެއްވެސް ފަރުވާއެއް ނުވަތަ ވެކްސިނެއް ހޯދިފައިވާ ބައްޔަކަށް ނުވާއިރު، މިއީ އިންސާނުން ބޭނުންކުރުމަށް މިހާރުވެސް ހުއްދަ ދީފައިވާ ރައްކާތެރި ބޭހަކަށް ވާތީ، މިއީ މި ބަލި ކޮންޓްރޯލް ކުރުމަށް ލިބުނު ބޮޑު ކުރިއެރުމެއް ކަމަށް ދިރާސާގައި ބުނެފައިވެއެވެ.
ދުނިޔޭގެ ސިއްހަތު ޖަމްއިއްޔާއިން މަރުވާ ރޭޓް 75 އިންސައްތައަށް އަރާ ކަމަށް ބުނާ މި ބައްޔަކީ، ވާލުގެ ޒަރީއާއިން އިންސާނުންނަށް ފެތުރޭ ބައްޔެކެވެ. އާންމުކޮށް މި ބަލި ފެތުރެނީ ވާލުގެ ކުޅު ނުވަތަ ކުޑަކަމުދާ އެއްޗެހި ޖެހިފައިވާ މޭވާ ނުވަތަ ކަދުރު ޖޫސް ބޭނުންކުރުމުންނެވެ.
ޗައިނާގެ ދިރާސާވެރިން ބުނާ ގޮތުގައި VV116 އަކީ މިހާރު ވެސް ޗައިނާ އާއި އުޒްބެކިސްތާނުގައި ކޮވިޑް ބަލީގެ މީހުންނަށް ދިނުމަށް ހުއްދަ ދީފައިވާ ބޭހަކަށް ވާތީ، މިއީ ނިޕާ ވައިރަސް ފެތުރޭ ހާލަތްތަކުގައި ސިއްހީ ޚިދުމަތްތެރިންނާއި ބަލިޖެހޭ މީހުންނަށް ދިނުމަށް ވަގުތުން ލިބެންހުރި ފަރުވާއެކެވެ.
ނިޕާ ވައިރަހާ ދެކޮޅަށް ބޭނުންކުރާނެ ވެކްސިނެއް އުފެއްދުމުގެ މަސައްކަތް ވެސް ދުނިޔޭގައި ބާރަށް ކުރިއަށްދާއިރު، އޮކްސްފޯޑް ޔުނިވަސިޓީން ތައްޔާރުކުރި ވެކްސިނެއްގެ އިންސާނުން ބޭނުންކޮށްގެން ހަދާ ދެވަނަ މަރުހަލާގެ ތަހުލީލުތައް މިހާރު ބަނގްލަދޭޝްގައި ދަނީ ކުރަމުންނެވެ.