މީހުން ސަލާމަތް ކުރުމަށް ކަނޑުގެ ސަރަހައްދުގައި ހިންގާނެ އޮޕަރޭޝަންތަކުގައި ބޭނުންކުރެވޭނެ ވަސީލަތްތަކެއް އުރީދޫން، އެމްއެންޑީއެފަށް މިއަދު ހަދިޔާކޮށްފިއެވެ.
އުރީދޫން ހަދިޔާކުރި ތަކެތީގެ ތެރޭގައި ހިމެނެނީ، އޯޝަން ރީފް އެމް 105 ޑިޖިޓަލް ޑުއަލް ޗެނަލް ކޮމިއުނިކޭޝަން އިކުއިޕްމަންޓަކާއި ލޫބެލް ލެބް އަންޑާ ވޯޓާ ލައުޑްސްޕީކަރަކާއި ތިން އޯޝަން ރީފް ފުލް ފޭސް، ފޭސް ޓޫ ޑައިވިން މާސްކެވެ.
ބަންޑާރަ ކޮށީގައި މިއަދު އޮތް ރަސްމިއްޔާތެއްގައި އެމްއެންޑީއެފާ ތަކެތި ހަވާލުކޮށްދެއްވީ، އުރީދޫގެ މެނޭޖިން ޑިރެކްޓަރު އަދި ސީއީއޯ، ޚާލިދު އަލް ހަމާދީއެވެ. އެމްއެންޑީއެފްގެ ފަރާތުން މި ތަކެއްޗާ ހަވާލުވެވަޑައިގެންނެވީ ޑިފެންސް މިނިސްޓަރު މުޙައްމަދު ޣައްސާން މައުމޫނެވެ.
އުރީދޫއިން މިއަދު ހަދިޔާކުރި ތަކެއްޗާއި މިނިސްޓަރު ހަވާލުވެވަޑައިގަންނަވަނީ --- ފޮޓޯ/ އެމްއެންޑީއެފް
އެމްއެންޑީއެފުން ބުނީ، އެ ތަކެއްޗަކީ ކަނޑުއަޑީގައި މުއާމަލާތް ކުރުމަށާއި ޑައިވަރުންގެ ސަލާމަތާއި ރައްކާތެރިކަމުގެ އިތުރުން އޮޕަރޭޝަންތަކުގެ ފެންވަރު ރަނގަޅު ކުރުމަށް ފަރުމާކޮށްފައިވާ ތަކެތި ކަމަށެވެ.
އެއާއެކު، ކޯސްޓްގާޑުން ރާއްޖޭގެ ކަނޑުގެ ސަރަހައްދުގައި މީހުން ސަލާމަތްކުރުމަށް ހިންގާ އޮޕަރޭޝަންތަކަށް އެ ތަކެތިން ބޮޑު އެހީތެރިކަމެއް ލިބޭނެކަން އެމްއެންޑީއެފުން ފާހަގަކުރިއެވެ.
މި ރަސްމިއްޔާތުގައި ޗީފް އޮފް ޑިފެންސް ފޯސް މޭޖަ ޖެނެރަލް އިބްރާހީމް ޙިލްމީ ވަނީ، އުރީދޫންވި ދީލަތި އެހީއަށްޓަކައި ޝުކުރު ދަންނަވާފައެވެ.
މިގޮތުން، ކަނޑުގެ މާހައުލަށް ބިނާވެފައިވާ ރާއްޖެ ފަދަ ގައުމެއްގައި ކޯސްޓްގާޑުގެ ސާޗް އެންޑް ރެސްކިއުއާއި ކަނޑުއަޑީގެ އޮޕަރޭޝަންތައް ވަރުގަދަކުރުމަށް އެ އިކުއިޕްމަންޓްތައް ވަރަށް ބޭނުންތެރި ވާނެކަން ހިލްމީ ފާހަގަކުރެއްވިއެވެ.
ކަނޑުގެ ސަލާމަތާއި ރައްކާތެރިކަމަށް އުރީދޫއިންދޭ އެއްބާރުލުން ހިލްމީގެ ވާހަކަފުޅުގައި ވަނީ ފާހަގަކުރައްވާފައެވެ.
މިއަދު ބަންޑާރަ ކޮށީގައި ބޭއްވި ރަސްމިއްޔާތުގައި ސިފައިންގެ އިސްވެރިން --- ފޮޓޯ/ އެމްއެންޑީއެފް
އުރީދޫ މޯލްޑިވްސްގެ ސީއީއޯގެ ވާހަކަފުޅުގައި ވަނީ، ރާއްޖޭގެ ކަނޑަކީ ދިރިއުޅުމުގެ މުހިންމު ބައެއް ކަމާއި އެމްއެންޑީއެފުން ކުރާ މަސައްކަތަކީ ގައުމީ ސަލާމަތަށް ނުހަނު މުހިންމު މަސައްކަތެއްކަން ފާހަގަކުރައްވާފައެވެ.
ޑައިވަރުންގެ ސަލާމަތާއި ކަނޑުއަޑީގެ އޮޕަރޭޝަންތަކަށް އެހީތެރިވުމަށް އެ ތަކެތި ހަދިޔާކުރުމަކީ ފަޚުރުވެރިވާ ކަމެއް ކަމަށް އޭނާ ވިދާޅުވިއެވެ. އަދި، އުރީދޫގެ އަމާޒަކީ މުޖުތަމަޢުއަށް ފައިދާހުރި، ދެމެހެއްޓެނިވި އެހީތެރިކަން ފޯރުކޮށްދިނުން ކަން ވަނީ ފާހަގަކުރައްވާފައެވެ.