2026 ވަނަ އަހަރު އެމެރިކާ، ކެނެޑާ އަދި މެކްސިކޯގައި ބޭއްވުމަށް ހަމަޖެހިފައިވާ ފީފާ ވޯލްޑް ކަޕްގެ ތެރެއިން އެމެރިކާގައި ކުޅޭ މެޗުތައް ބޮއިކޮޓް ކުރުމަށް ފީފާގެ ކުރީގެ ރައީސް ސެޕް ބްލެޓާ ގޮވާލައްވައިފިއެވެ.
ބްލެޓާ މިކަމަށް ގޮވާލެއްވީ އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުން ގެންގުޅޭ ހަރުކަށި ސިޔާސަތުތަކާ ގުޅިގެންނެވެ.
ސޯޝަލް މީޑިއާ ޕްލެޓްފޯމް 'އެކްސް' ގައި ކުރެއްވި ޕޯސްޓެއްގައި ބްލެޓާ ވަނީ، ކޮރަޕްޝަނާ ދެކޮޅަށް މަސައްކަތް ކުރާ ސުވިސް ވަކީލެއް ކަމަށްވާ މާކް ޕީތު ދެއްކެވި ވާހަކަތަކަށް ތާއީދު ކުރައްވާފައެވެ. ޕީތު ވިދާޅުވެފައިވަނީ އެމެރިކާގެ މިހާރުގެ ހާލަތަށް ބަލާއިރު، ސަޕޯޓަރުންނަށް އޮތް އެންމެ ރަނގަޅު ނަސޭހަތަކީ އެމެރިކާއަށް ނުދިއުން ކަމަށެވެ. އަދި އެމެރިކާއަށް ދާ ސަޕޯޓަރުން އެ ގައުމުގެ އޮފިޝަލުން ހިތްހަމަނުޖެހޭ ފަދަ ކަމެއް ކޮށްފިނަމަ، ވަގުތުން އަނބުރާ ގައުމަށް ފޮނުވާލާނެ ކަމަށް ބެލެވޭ ކަމަށްވެސް އޭނާ ވިދާޅުވިއެވެ.
އެމެރިކާގެ ރައީސް ޑޮނަލްޑް ޓްރަމްޕް -- ފޮޓޯ: އޭޕީ
ބައިނަލްއަގުވާމީ ފުޓްބޯޅަ މުޖުތަމައުގެ ކަންބޮޑުވުން އެމެރިކާއަށް އަމާޒުވެފައިވަނީ، ޓްރަމްޕްގެ ސަރުކާރުން ގްރީންލޭންޑް ހޯދުމަށް ކުރާ މަސައްކަތާއި، ބައެއް ގައުމުތަކުގެ މީހުން އެމެރިކާއަށް އެތެރެވުން މަނާކުރުމާއި، އަދި ހިޖުރަވެރިންނާ މެދު އަމަލުކުރާ ހަރުކަށި ގޮތްތަކުގެ ސަބަބުންނެވެ.
މިގޮތުން، ވޯލްޑް ކަޕަށް ކޮލިފައިވެފައިވާ ސެނެގާލް، އައިވަރީ ކޯސްޓް، އީރާން އަދި ހެއިޓީ ފަދަ ގައުމުތަކުގެ ސަޕޯޓަރުންނަށް އެމެރިކާއަށް އެތެރެވުމުގައި ބޮޑެތި ހުރަސްތަކެއް ވަނީ ކުރިމަތިވެފައެވެ.
ޖަރުމަނު ފުޓްބޯޅަ ފެޑަރޭޝަނުގެ ނައިބު ރައީސް އޯކޭ ގޮޓްލިކް ވެސް ވަނީ މި މުބާރާތް ބޮއިކޮޓް ކުރުމާ މެދު ސީރިއަސްކޮށް ވިސްނަން ޖެހޭ ކަމަށް ވިދާޅުވެފައެވެ. އޭނާ ވިދާޅުވި ގޮތުގައި، ގައުމުތަކުގެ އުސޫލުތަކާއި އިންސާނީ ހައްގުތަކަށް އަރައިގަންނަ އިރު، އެކަމާ މެދު ހިމޭނުން ތިބެގެން ނުވާނެއެވެ.
މީގެ އިތުރުން، ދެކުނު އެފްރިކާގެ އިދިކޮޅު ލީޑަރު ޖޫލިއަސް މަލޭމާ ވެސް ވަނީ އެމެރިކާގެ ސިޔާސަތުތައް އެޕާތައިޑް (ނަސްލީ ތަފާތުކުރުން) ގެ ދުވަސްވަރާ އެއްގޮތް ކަމަށް ސިފަކުރައްވައި، ދެކުނު އެފްރިކާގެ ޓީމު މުބާރާތުން ވަކިވުމަށް ގޮވާލައްވާފައެވެ. އިނގިރޭސިވިލާތުގެ ބައެއް ގާނޫނު ހަދާ މަޖިލީހުގެ މެންބަރުން ވެސް ވަނީ އިންގްލެންޑާއި ސްކޮޓްލެންޑުން މުބާރާތް ބޮއިކޮޓް ކުރުމަށް ބާރުއަޅުއްވާފައެވެ.
ނެދަލޭންޑްސްގައި ވެސް 100,000 އަށް ވުރެ ގިނަ މީހުން ވަނީ ގައުމީ ޓީމު މުބާރާތުގައި ބައިވެރިނުވުމަށް ގޮވާލާ ޕެޓިޝަނެއްގައި ސޮއިކޮށްފައެވެ. ނަމަވެސް، ނެދަލޭންޑްސްގެ ފުޓްބޯޅަ އެސޯސިއޭޝަނުން ބުނެފައިވަނީ ހާލަތު މޮނިޓަރ ކުރަމުންދާ ކަމަށާއި، އަދި މުބާރާތުން ވަކިވުމުގެ ނިންމުމެއް ނިންމާފައިނުވާ ކަމަށެވެ.
2026 ވަނަ އަހަރުގެ ވޯލްޑް ކަޕް ބޭއްވުމަށް ހަމަޖެހިފައިވަނީ ޖޫން 11 އިން ޖުލައި 19 އަށެވެ.