އާންމުން އެދޭ ފަދަ ކުރިމަގެއް މި ގައުމަށް ހޯދައިދެވޭނީ ދަރިވަރުން ތަރުބިއްޔަތުކުރުމުގައި އެންމެން އެއްބާރުލައި އިޚުލާސްތެރިވީ ވަރަކުން ކަމަށް، ރައީސް ޑރ. މުޙައްމަދު މުޢިއްުޒު މިއަދު ވިދާޅުވެއްޖެއެވެ.
ސްކޫލުތަކުގެ ދަރިވަރުންނަށް ލިބުނު ބޮޑު ބަންދަށް ފަހު، މިއަދު ރާއްޖޭގެ ހުރިހާ ސްކޫލެއްގައި ދިރާސީ އާ އަހަރުގެ ކިޔެވުން ވަނީ ރަސްމީކޮށް ފަށައިފައެވެ.
އެހެންވެ، ދަރިވަރުންނަށާއި މުދައްރިސުންނަށް ދިރާސީ އާ އަހަރުގެ ތަހުނިޔާ ފޮނުއްވައި ރައީސް 'އެކްސް'ގައި ލިޔުއްވި ޕޯސްޓެއްގައިވަނީ، އިސްލާމްދީނަށާއި ދިވެހި ގައުމަށް ލޯބިކުރާ، އުޅުމާއި ސުލޫކު ރަނގަޅު، ހަރުދަނާ އަދި ހީވާގި ދަރިންތަކެއް މި ގައުމުގައި ބިނާކުރެވޭނީ، ތައުލީމާއި ތަރުބިއްޔަތަށް އަހައްމިއްޔަތުކަން ދީގެން ކަމަށެވެ.
ތައުލީމު އުނގެނުމާއި އުނގަންނައިދިނުމަކީ ބޮޑު ޒިންމާއެއްކަން ރައީސް ފާހަގަކުރެއްވިއެވެ.
"ދިވެހީން އެދޭ ފާގަތި ކުރިމަގު މި ޤައުމަށް ހޯދައިދެވޭނީ މި ޒިންމާ އަދާކުރުމުގައި އަޅުގަނޑުމެން އެންމެން އެއްބާރުލައި އިޚްލާޞްތެރިވީ މިންވަރަކުން،" އެމަނިކުފާނު ލިޔުއްވާފައިވެއެވެ.
މީގެ ކުރިން އެޑިއުކޭޝަން މިނިސްޓްރީން އާންމުކުރި ތަފާސްހިސާބުތަކުގައި ވާގޮތުން މި އަހަރު 80،000 އަށްވުރެ ގިނަ ދަރިވަރުން ތައުލީމު ހާސިލުކުރާނެއެވެ.
އެ ގޮތުން، މި އަހަރު 4،790 ދަރިވަރުން ވަނީ އަލަށް ސަރުކާރު ސްކޫލުތަކުގެ ގްރޭޑް އެކެއްގައި ކިޔަވަން އެދިފައެވެ. އޭގެ ތެރޭގައި ހިމެނެނީ އަތޮޅުތަކުގެ ގްރޭޑް އެކަކަށް ވަންނަން އެދުނު 3،042 ދަރިވަރުންނާއި މާލޭ ސްކޫލުތަކަށް ވަންނަން އެދުނު 1،748 ދަރިވަރުންނެވެ.
އިމާދުއްދީން ސްކޫލުގެ ދަރިވަރުން ލައިނެއްގައި: މިއަދު މިއަހަރުގެ ދިރާސީ އަހަރުގެ ކިޔެވުން ވަނީ ފަށައިފަ --- ސަން ފޮޓޯ: މުޙައްމަދު ޢަފްވާން ޞަލާޙް
މިނިސްޓްރީން މީގެ ކުރިން ބުނި ގޮތުގައި މި އަހަރު މާލެއަށް އަތޮޅުތަކުން 1،530 ދަރިވަރުން ވަނީ ބަދަލުވެފައެވެ.
ދަރިވަރުން މިއަދު އެނބުރި ސްކޫލަށް ދިޔައިރު، އެ ދަރިވަރުންނަށް ރޯދަމަހުގެ ފުރަތަމަ ހަފުތާއަށް ފަހު ސްކޫލުތައް ބަންދުވާނެއެވެ. އެ ގޮތުން، ރޯދަމަހު ކިޔަވައިދޭނީ އެންމެ ހަފުތާއެއްގައި ކަމަށް އެޑިއުކޭޝަން މިނިސްޓްރީގެ ދިރާސީ އަހަރުގެ ކަލަންޑަރުގައިވެއެވެ.
ފުރަތަމަ ޓާމް ނިންމައި މި އަހަރުގެ ޖުލައި މަހުގެ 17 ވަނަ ދުވަހު ދަރިވަރުންނަށް ޓާމު ޗުއްޓީ ލިބޭނެއެވެ. ދެވަނަ ޓާމުގެ ކިޔެވުން ފަށާނީ އޮގަސްޓް މަހުގެ ދެވަނަ ދުވަހެވެ. މި އަހަރު ވެސް ދަރިވަރުންނަށް އަހަރު ނިންމައި ބޮޑު ޗުއްޓީ ލިބޭނީ ޑިސެންބަރުގައެވެ.
އެ ގޮތުން، ޑިސެންބަރު 18 ގައި މި އަހަރުގެ ކިޔެވުން ނިމޭނެއެވެ. އަދި، އަންނަ ދިރާސީ އަހަރުގެ ކިޔެވުން ފަށާނީ ޖަނަވަރީ 17، 2027 ގައެވެ.