އިންޑިއާގެ އެކްޓަރު އަރުބާޒް ޚާން އާއި މަލައިކާ އަރޯރާގެ ދަރިފުޅު އަރްހާން ޚާން ބޮލީވުޑަށް ތައާރަފްވުމަށް ތައްޔާރުވަމުން އަންނަ ކަމަށް ރިޕޯޓުތަކުން ބުނެފިއެވެ.
މީޑިއާ ރިޕޯޓުތަކުން އަރްހާޏް ފިލްމީ ދާއިރާއަށް ތައާރަފްވާން އުޅޭ ކަމަށް ބުނެފައި ވަނީ ބޮލީވުޑްގެ މަޝްހޫރު ފެޝަން ޑިޒައިނަރު ވިކްރަމް ޕަދްނިސް ދާދިފަހުން ސޯޝަލް މީޑިއާގައި ޕޯސްޓުކުރި ފޮޓޯއަކާ ގުޅިގެންނެވެ.
އަރްހާންއާ އެކު ފިލްމު ސެޓެއްގައި ނަގާފައިވާ މި ފޮޓޯގެ ކެޕްޝަންގައި ވިކްރަމް ބުނެފައި ވަނީ ކެމެރާގެ ފުރަގަހުގައި މަސައްކަތް ކުރުމަށްފަހު އެންމެފަހުން ކެމެރާގެ ލެންސް ކުރިމައްޗަށް އަރްހާން ނުކުންނަން ތައްޔާރުކަމަށާއި އޭނާގެ ހަގީގީ ދަތުރު މި ފެށުނީ ކަމަށެވެ. މި ޕޯސްޓުގައި ވިކްރަމް ވަނީ އަރްހާން ޓެގް ވެސް ކޮށްފައެވެ.
ފެޝަން ޑިޒައިނަރު ވިކްރަމް ޕަދްނިސް އަރްހާންއާ އެކު ފިލްމު ސެޓުގައި ނަގާފައިވާ ފޮޓޯއެއް--ފޮޓޯ/ފޭސްބުކް
ރިޕޯޓުތައް ބުނާގޮތުން ވިކްރަމް އަންނަނީ ވަކި ނަމެއް އަދި ހަމަޖެހިފައިނުވާ ޑްރާމާ ސީރީސްއަކަށް ތައްޔާރުވަމުންނެވެ. ނަމަވެސް އެ ސީރީސްއާ ބެހޭ އެއްވެސް މައުލޫމާތެއް މިހާތަނަށް އާއްމުކޮށްފައެއް ނުވެއެވެ.
ވިކްރަމް އިންސްޓަގްރާމްގައި ކުރި ޕޯސްޓުން އެނގޭގޮތުގައި އެއީ ފިލްމު ސެޓުގައި އެމީހުން ހޭދަކުރި 16ވަނަ ދުވަހެވެ. ބައެއް ފިލްމީ ޚަބަރުތައް ބުނާގޮތުން އަރްހާންއާ އެކު މި ޑްރާމާ ސީރީސްއިން ބަތަލާ ސައްޔާމީ ހޭރް ވެސް ފެންނާނެއެވެ.
ސައްޔާމީ ވެސް ވަނީ ފިލްމު ސެޓުގައި ނަގާފައިވާ ބައެއް ފޮޓޯތައް އިންސްޓަގްރާމްގައި ހިއްސާކޮށްފައެވެ.
ވިކްރަމްގެ މި ޕޯސްޓާ އެކު ވަރަށް ގިނަ ބަޔަކު އަރްހާން ހަގީގަތުގައި ވެސް ބޮލީވުޑަށް ނުކުންނަނީތޯ އަހާފައެވެ. ވިކްރަމްގެ ޑްރާމާ ސީރީސްއެއްގައި އަރްހާން މަސައްކަތްކުރާ ކަމަށް ރިޕޯޓުތަކުން ބުނެފައިވާއިރު ކުޅަދާނަ ފެޝަން ޑިޒައިނަރަކީ މަލައިކާގެ ވަރަށް ގާތް ރަހްމަތްތެރިއެކެވެ.
އަރްހާން ރަސްމީކޮށް އޮންސްކްރީނުން ފެނިފައި ނެތް ނަމަވެސް އޭނާ ވަނީ 2024ގައި "ޑަމްބް ބިރިޔާނީ"ގެ ނަމުގައި ހަ އެޕިސޯޑުގެ ޕޮޑްކާސްޓް ޝޯއެއް ޔޫޓިއުބް މެދުވެރިކޮށް ގެނެސްދީފައެވެ.
އަރުބާޒް ޚާން 2024ގައި މީޑިއާއަށް ދިން އިންޓަވިއުއެއްގައި ދަރިފުޅު ފިލްމީ ދާއިރާއަށް ނުކުތުމާ ގުޅޭގޮތުން ބުނީ 23 އަހަރުގެ ޒުވާނާ ފިލްމު އިންޑަސްޓްރީއާ ގުޅުމުގެ ކުރިން އެކްޓިންގްއަށް ހާއްސަ ދެ އަހަރުގެ ތަމްރީނު ޕްރޮގްރާމެއް ފުރިހަމަކުރާނެ ކަމަށެވެ.
މި އިންޓަވިއުގައި އަރުބާޒް ބުނީ އަރްހާން އެކްޓަރެއްގެ ގޮތުގައި އިންޑަސްޓްރީއަށް ނުކުންނާނެ ކަމުގެ ޔަގީންކަން އޭނާއަށް އެބައޮތް ކަމަށެވެ.