ލޯބިވެރިން ކަމަށް އިންޑިއާގެ މީޑިއާތަކުން ބުނަމުން އަންނަ ދެކުނު އިންޑިއާގެ ފިލްމީ ތަރިން ކަމަށްވާ ވިޖޭ ދެވެރަކޮންޑާއާއި ރަޝްމިކާ މަންދަންނާ އެކީގައި ކުޅޭ ތިންވަނަ ފިލްމުގެ ޓައިޓްލް ޓީޒާއާ އެކު ފިލްމުގެ ސިނަމާތަކަށް ގެންނަ ތާރީޚު އިއުލާނުކޮށްފިއެވެ.
މި ފިލްމުގެ މަސައްކަތް މިދިޔަ އަހަރުގެ ސެޕްޓެންބަރު މަހުގެ ތެރޭ ފަށާފައިވާއިރު ފިލްމަ އޭރު ވަގުތީ ގޮތުން ކިޔުނު ނަމަކީ "14VD"އެވެ. މި އަހަރުގެ ސެޕްޓެންބަރު މަހުގެ 11 ވަނަ ދުވަހު ސިނަމާތަކަށް ގެންނާނެކަން އިއުލާނުކޮށްފައިވާ ފިލްމުގެ ޓައިޓްލް ޓީޒާ ރިލީޒްކުރިއިރު ފިލްމުގެ ނަމަކީ "ރާނާބާލީ"އެވެ.
ޓީ-ސީރީސްއާއި މައިތްރީ މޫވީ މޭކާސް ގުޅިގެން ގެނެސްދޭ މި ފިލްމަކީ 19 ވަނަ ގަރުނުގެ ތެރޭގައި އިންޑިއާގައި ހިނގި ތާރީޚީ ހާދިސާތަކެއްގެ މައްޗަށް ބިނާކޮށް އުފައްދާ ފިލްމެކެވެ. މި ފިލްމުގައި 1850ގެ އަހަރުތަކުގައި ހިނގާފައިވާ ތާރީޚީ އެތައް ހާދިސާތަކެއް ހިމެނޭނެއިރު ގިނަ ވާހަކަތަކަކީ ތާރީޚީ ފޮތްތަކުން ޖާގަ ހޯދާފައިނުވާ ވާހަކަތަކެއް ކަމަށް މައިތްރީ މޫވީސްއިން ނެރުނު ޕްރެސް ނޯޓުގައި ބަޔާންކޮށްފައިވެއެވެ.
އެ ދުވަސްވަރަކީ އިނގިރޭސީންގެ ބާރުގެ ދަށުގައި އިންޑިއާ އޮތް ދުވަސްވަރަށް ވެފައި އިންޑިއާ ރައްޔިތުންނަށް އިނގިރޭސީންގެ ފަރާތުން ކުރިމަތިވި ދަތި އުނދަގޫ ދުވަސްތަކާ އެކު 40 އަހަރުވަންދެން ހިންގި ގަތުލުއާއްމު މި ފިލްމުން ވަރަށް ރަނގަޅަށް ދައްކުވައިދޭނެ ކަމަށް ޕްރެސް ނޯޓުގައި ވަނީ ބުނެފައެވެ.
ހަމައެއާއެކު އެތައް ޓްރިލިއަން ޑޮލަރެއް އިންޑިއާއިން އޭރު އިނގިރޭސި ވެރިން ބޭރުކުރި ގޮތުގެ މައްޗަށް ވެސް "ރާނާބާލީ"ގައި އަލި އަޅުވާލާފައިވާނެ ކަމަށް މައިތްރީ މޫވީސްއިން ވަނީ ބުނެފައެވެ. ވިޖޭ މި ފިލްމުގައި "ރާނާބާލީ"ގެ ކެރެކްޓާއިން ފެންނާނެއިރު ރަޝްމިކާ ފެންނާނީ 'ޖަޔައްމާ' ކިޔާ ކެރެކްޓާއަކުންނެވެ.
ފިލްމު "ރާނާބާލީ"ގެ ޓައިޓްލް ޓީޒާގެ މަންޒަރުތަކެއް--ފޮޓޯ/ހިންދުންސްތާންޓައިމްސް
މި ފިލްމުގެ ކުރިން ދެ ތަރިން އެކީގައި ކުޅެފައިވަނީ "ގީތާ ގޯވިންދަމް" އަދި "ޑިއާ ކޮމްރެޑް"ގެ ނަމުގައި ގެނެސްދިން ދެ ފިލްމެވެ. އޭގެ ތެރެއިން "ޑިއާ ކޮމްރެޑް"އަކީ ބެލުންތެރިންގެ ވަރަށް ބޮޑު މަގުބޫލުކަމެއް ހޯދި ފިލްމެކެވެ.