ކ. ގިރާވަރުފަޅުގެ ލޭންޑްޔޫސް ޕްލޭނަށް ބަދަލު ގެނެސް، ޕްލޭނިން މިނިސްޓްރީން މިއަދު އާންމުކޮށްފިއެވެ.
އެ މިނިސްޓްރީން މިއަދު ބުނީ، އޮކްޓޫބަރު 15، 2024ގައި ގެޒެޓުކުރި ގިރާވަރުފަޅުގެ ލޭންޑްޔޫސް ޕްލޭނަށް ބަދަލު އައިސްފައިވާ ކަމަށެވެ.
މިއަދު އެ މިނިސްޓްރީން އާންމުކުރި ލޭންޑްޔޫސް ޕްލޭނުގައި ވަނީ، އެކި ބޭނުންތަކަށް ޚާއްސަ ތަންތަން އެކި ކުލަތަކުން ފާހަގަކޮށްފައެވެ. އެގޮތުން، ކޮމާޝަލް ބޭނުންތަކާއި ކޮމިއުނިޓީ ޒޯނަށް ޚާއްސަ ސަރަހައްދުތަކާއި ސުކޫލުތަކާއި ހޮސްޕިޓަލަށް ޚާއްސަ ތަންތަން ފާހަގަކޮށްފައިވެއެވެ.
ކުރީގެ ރައީސް އިބްރާހީމް މުހައްމަދު ޞާލިޙްގެ ސަރުކާރުގައި ގޯތި ދޭން އިއުލާންކުރި ގިރާވަރުފަޅުން، ގޯތި ދީފައި ވަނީ ޚިދުމަތްތަކަށް ޖާގައެއް ކަނޑަނާޅައި ކަމަށް ބުނެ، ގިރާވަރަށް އާ ލޭންޑް ޔޫޒް ޕްލޭނެއް ހަދާނެ ކަމަށް މި ސަރުކާރުން އޮތީ މީގެ ކުރިން އިއުލާންކޮށްފައެވެ.
އެ ސަރަހައްދުގެ ލޭންޑްޔޫސް ޕްލޭނަށް ބަދަލު ގެނެސް އާންމުކުރިއިރު، ގިރާވަރުފަޅު ހިއްކުމުގެ މަސައްކަތް ސަރުކާރުން އަންނަނީ ކުރަމުންނެވެ.
ބަދަލު ގެނެސް، އާންމުކުރި ގިރާވަރުފަޅުގެ ލޭންޑްޔޫސް ޕްލޭން ---
ކުރިއަށް އޮތް ތިން މަސްތެރޭ ގިރާވަރު ފަޅާއި، ހުޅުމާލެ ތިންވަނަ ފިޔަވަހި ހިއްކައި ނިމޭނެ ކަމަށް ބެލެވޭ ކަމަށް ރައީސް ޑރ. މުޙައްމަދު މުއިއްޒު މިދިޔަ ނޮވެންބަރު 25ގައި ވަނީ ވިދާޅުވެފައެވެ. އެ ތަން ހިއްކާނީ ހުޅުމާލެ ތިން ވަނަ ފިޔަވަހި ހިއްކަން ބޭނުންކުރި ދެ ޑްރަޖަރުން ކަމަށް އޭރު އެ މަނިކުފާނު ވިދާޅުވިއެވެ.
ފާހަގަކުރެވޭ ގޮތުގައި، ކުރީ ސަރުކާރުން ފެށި ބިންވެރިޔާ ސްކީމުގެ ދަށުން ގިރާވަރުފަޅުން ފުރަތަމަ ނިންމީ 2،000 ގޯއްޗެވެ.
އެކަމަކު، ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ، ބާކީ ގޯތި ގުޅިފަޅުން ދޭން ސަރުކާރުން ނިންމައި، ގޯތި ބަދަލުކުރުމަށް އެދި ހުށަހެޅުމަށް އޭޕްރީލް ހަތެއް، 2024ގައި ހުޅުވާލިއެވެ.
އެ ފުރުސަތުގައި ގުޅީފަޅަށް ގޯތި ބަދަލު ކުރުމަށް 2210 މީހުން އެދުނެވެ. އެ މީހުންގެ މެދުގައި ޖޫން މަހު ވަނީ، ގުރު ނަގާފައެވެ.