މާލެ ހުޅުމާލެ ހައިވޭގެ ޓްރެފިކް ލައިންތައް އާ ކުރުމުގެ މަސައްކަތް މިރޭ ދަންވަރުން ފެށިގެން ކުރިއަށް ގެންދާތީ އެކަމަށް ސަމާލުވާން ފުލުހުން އެދިއްޖެއެވެ.
ފުލުހުން ބުނީ، ހައިވޭގެ ޓްރެފިކް ލައިންތައް އާ ކުރުމުގެ މަސައްކަތް, އެކަން ނިމެންދެން ކޮންމެ ދުވަހެއްގެ ދަންވަރު 12 އިން ފެށިގެން ހެނދުނު ހައެއް ޖަހަންދެން ކުރިއަށް ދާނެ ކަމަށެވެ.
އެ މަސައްކަތް ކުރަނީ, ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އިންނެވެ.
އެހެންކަމުން ހައިވޭ ބޭނުންކުރާ ފަރާތްތަކުން އެކަމަށް ސަމާލުވާން ފުލުހުން ވަނީ އެދިފައެވެ.
ފުލުހުންގެ އެންމެ ފަހުގެ ތަފާސްހިސާބުތަކުގައިވާ ގޮތުން މިއަހަރުގެ މިހާތަނަށް 341 މައްސަލައެއް ހުށަހަޅާފައިވެއެވެ. އޭގެ ތެރެއިން 99 މައްސަލައަކީ އެކްސިޑެންޓުތަކުގެ މައްސަލަތަކެވެ. އެއީ މިއަހަރުގެ މިހާތަނަށް ހުށަހެޅި މައްސަލަތަކުގެ 29 ޕަސެންޓެވެ.
މީގެ ކުރިންވެސް މާލެ ހުޅުމާލެ ހައިވޭގައި ނުރައްކާތެރި އެކްސިޑެންޓުތައް ހިނގާފައިވެއެވެ.