އޭއައި މެދުވެރިކޮށް ދިވެހި ތާރީޚާއި، ފޯކްލޯގެ ހާދިސާތައް ވީޑިއޯގެ ގޮތުގައި ތައްޔާރުކޮށް ގެނެސްދެމުން އަންނަ އަހްމަދު މުޙައްމަދު ދީދީ (އަހަންމާ)، ދޮން ހިޔަލައާއި އަލިފުޅުގެ ވާހަކަ ވެސް އޭއައި ފިލްމެއްގެ ގޮތުގައި އުފައްދައިފިއެވެ.
އޭއައި މެދުވެރިކޮށް ވަރަށް ތަފުސީލުކޮށް މަންޒަރުތައް ގެނެސްދީފައިވާ ދޮންހިޔަލައާއި އަލިފުޅުގެ ވާހަކައިގައި ހިމެނޭ މުހިންމު ހާދިސާތައް ވެސް ވަނީ މި ފިލްމުގައި ކިޔައިދީފައެވެ. އެއީ، ކުރީގައި އުޅުނު ދެ ލޯބިވެރިންގެ ވާހަކައެކެވެ. ފޮތެއްގެ ސިފައިގައި އެ ވާހަކަ ނެރުއްވީ 1976 ވަނަ އަހަރު އަބްދުﷲ ޞާދިޤު (ސޯދުބެ)އެވެ.
އޭއައި ބޭނުންކޮށްގެން އަހަންމާ ތައްޔާރުކުރި ދޮންހިޔަލައާއި އަލިފުޅު ވާހަކައިގެ މަންޒަރެއް -- ފޮޓޯ: ވީޑިއޯ ސްނެޕްޝޮޓް
ދޮންހިޔަލައަކީ ވަރަށް ރީތި އަންހެނެކެވެ. އަލިފުޅަކީ ހިތްވަރުގަދަ މީހެކެވެ. މި ވާހަކައިގައި ދޮންހިޔަލައާއި އަލިފުޅުގެ ލޯތްބާއި، ދިމާވާ ދަތިތަކާއި އަދި މީގެ އިތުރުން ވެސް ހިތާމަވެރި ކަންތައްތައް ވެސް ހިމެނެއެވެ.
މި ވާހަކަ ހިނގި މައިގަނޑު ތަންތަނާއި، އެ ދެ މީހުންގެ މެދުގައި ލޯބީގެ ގުޅުން އުފެދުނު ގޮތާއި، ފަހުން ކުރިމަތިވި ދަތިތަކާއި، އަދި އެ ވާހަކަ ނިމޭ ގޮތް ވަރަށް ފުރިހަމައަށް މި ފިލްމުގައިވަނީ އޭއައި މެދުވެރިކޮށް ގެނެސްދީފައެވެ.
ގާތްގަނޑަކަށް 24 މިނެޓުގެ މި ފިލްމުގައި ވެސް ވަނީ މަންޒަރާ ގުޅޭ އަދި އެ މަންޒަރަކުން ގެނެސްދޭން ބޭނުންވާ އިހުސާސްތަކާ ގުޅޭހެން ބެކް މިއުޒިކް ވެސް ގެނެސްދީފައެވެ. އަދި, މި ހާދިސާއާ ގުޅޭ އޭއައި ލަވައެއް ވެސް މި ފިލްމުގައި ވަނީ ބޭނުންކޮށްފައެވެ.
އޭއައި ބޭނުންކޮށްގެން އަހަންމާ ތައްޔާރުކުރި ދޮންހިޔަލައާއި އަލިފުޅު ވާހަކައިގެ މަންޒަރެއް -- ފޮޓޯ: ވީޑިއޯ ސްނެޕްޝޮޓް
މި މަސައްކަތުގެ އިތުރަށް ވެސް އޭއައި މެދުވެރިކޮށް، މުހިންމު ބައެއް ހާދިސާތަކާއި ލަވަތައް ވެސް ދީދީ ވަނީ އުފައްދާފައެވެ. އޭގެ ތެރެއިން އެންމެ ފާހަގަކޮށްލެވެނީ އެންމެ ފަހުން އޭނާ އުފެއްދި ރެހެންދި ޚަދީޖާއާ ބެެހޭ ޑޮކިއުމަންޓްރީއެވެ.
ދޮންހިޔަލައާއި އަލިފުޅުގެ ވާހަކަ އޭއައި މެދުވެރިކޮށް ގެނެސްދިނުމަށް ކުރި މަސައްކަތާ ގުޅޭ ގޮތުން "ސަން"އާ ވާހަކަދައްކަވަމުން ދީދީ ވިދާޅުވީ، މި ވާހަކައަކީ ވަރަށް ދިގު ވާހަކައެއް ކަމަށާއި، އެހެންވެ ޖެހުނީ ވިއްސަކަށް މިނެޓަށް ކުރުކޮށް ފައްތަން ކަމަށެވެ.
އަދި އޭއައި ބޭނުންކޮށްގެން މިފަދަ އުފެއްދުމެއް އުފެއްދުމަކީ ވަރަށް އަގުބޮޑު ކަމެއް ކަމަށް ވެސް ފާހަގަކުރެއްވިއެވެ. އެއާއެކު ވެސް މިއީ މާލީ ފައިދާއެއް ހޯދުމަށް ކުރާ ކަމެއް ނޫންކަމަށާއި، މިފަދަ މަސައްކަތަށް އޮތް ލޯތްބެއްގެ ސަބަބުންނާއި، މި ވާހަކަ އާންމުންނާ ހަމައަށް ގެނެސްދޭންޖެހޭކަމަށް ގަބޫލުކުރާތީ ކުރާ ކަމެއް ކަމަށް ބުންޏެވެ.
އޭއައި ބޭނުންކޮށްގެން އަހަންމާ ތައްޔާރުކުރި ދޮންހިޔަލައާއި އަލިފުޅު ވާހަކައިގެ މަންޒަރެއް -- ފޮޓޯ: ވީޑިއޯ ސްނެޕްޝޮޓް
"ހުރިހާ ކެރެކްޓަރެއްގެ އަޑުތައް، އަންހެން ވެސް ހިމެނޭހެން އެއީ އަޅުގަނޑުގެ އަމިއްލަ އަޑު. އެ ބަދަލުކޮށްފައި އެ ހުރީ އޭއައި ބޭނުންކޮށްގެން. ރައިވަރުގެ ބަސްތައް ފިޔަވައި، ދެން ހުރީ އޭއައި އިން ހެދި ލަވަތައް. ބެކްގްރައުންޑް މިއުޒިކަކީ ވެސް އޭއައި،" އޭނާ ބުންޏެވެ.
އޭނާ ބުނީ އޭއައި މެދުވެރިކޮށް މިފަދަ ކަންކަން ކުރުމަކީ، ބޮޑު ޕްރޮޑަކްޝަން ކްރޫއަކާ އެކު މަސައްކަތްކުރުމަށްވުރެ ފަސޭހަ ކަމެއް ކަމަށެވެ. ނަމަވެސް މިއީ "އޮޓޯ" މަސައްކަތެއް ނޫން ކަމަށް ބުންޏެވެ. އެގޮތުން މި ފިލްމު ތައްޔާރުކުރުމަށް ދިރާސާކުރުމާއި، ލިޔުމަށާއި، އޭއައި ޕްރޮމްޕްޓުތައް ތައްޔާރުކޮށް ހެދުމަށް ފަސް ހަފުތާ ހޭދަވި ކަމަށް އޭނާ ބުންޏެވެ.
"އޭއައިއިން ހަމައެކަނި ނިމިފައި އޮތް ފިލްމެއް އެ އަމިއްލައަކަށް ނުއުފައްދާނެ. މި ކަން ކުރުމަށް ވިސްނުމާއި، ވަކި އޮނިގަނޑެއް އަދި ވަރަށް މަސައްކަތް ކުރަންޖެހޭ،" ދީދީ ބުންޏެވެ.
އޭއައި ބޭނުންކޮށްގެން އަހަންމާ ތައްޔާރުކުރި ދޮންހިޔަލައާއި އަލިފުޅު ވާހަކައިގެ މަންޒަރެއް -- ފޮޓޯ: ވީޑިއޯ ސްނެޕްޝޮޓް
ނަވާރަސަތޭކަ އައްޑިހައިގެ ފަހުކޮޅު ޓީވީއެމްގައި މަސައްކަތްކުރި ދީދީއަކީ ފަންނީ މަސައްކަތްތަކަށް ވަރަށް މޮޅު މީހެކެވެ. އެ ގޮތުން, ޓީވީއެމްގައި މަސައްކަތް ކުރި ދުވަސްވަރު ވެސް އޭރު ލިބެން ހުރި ވަސީލަތްތަކާ އެކު އޭނާ ވަނީ އާންމުންނަށް އޭރު ހައިރާންކަން ލިބުނު މޮޅު އުފެއްދުންތައް ގެނެސްދީފައެވެ.
އެގޮތުން ދީދީގެ މަސައްކަތްތައް 1980ގެ އަހަރުތަކުގެ ފަހުކޮޅާއި 1990ގެ ކުރީކޮޅުގެ ޓީވީއެމުން އުފެއްދި ގިނަ އުފެއްދުންތަކެއްގައި ގިނައެވެ. އަދި އެއަށްފަހު ނެރުނު ބޮޑެތި ފިލްމުތައް ކަމަށްވާ 'ދެރިޔާ'، 'އަމާނާތް'، ފަތިސް ހަނދުވަރު'ގައި ވެސް އޭނާގެ މަސައްކަތް ހިމެނެއެވެ.