ވޯކް ޕާމިޓާ ޚިލާފަށް ރާއްޖޭގައި ވިޔަފާރިކުރުމާއި، ރާއްޖޭގައި މަސައްކަތް ކުރުމަށް ވޯކް ޕާމިޓް ހޯދައިދޭނެ ކަމަށް ބުނެ އޮޅުވާލައިގެން ފައިސާ ހޯދަމުން އަންނަ ބިދޭސީންތަކެއް ހައްޔަރުކޮށްފިއެވެ.
ފުލުހުން މިއަަދު ހާމަކުރި ގޮތުގައި ބަންގްލަދޭޝަށް ނިސްބަތްވާ ހަ މީހަކު ވަނީ ހައްޔަރުކޮށްފައެވެ. އެ މީހުންނަކީ:
- މުޙައްމަދު އިމޮން ކަޒި، 32 އަހަރު
- އަފްޖަލް ހޮސައިން، 31 އަހަރު
- ޙަބީބުއްރަޙްމާން، 35 އަހަރު
- މުޙައްމަދު ހަނީފް ބަޕަރީ، 46 އަހަރު
- ކަޒި ރައިހާން، 22 އަހަރު
- މުޙައްމަދު ޔޫސުފް ޕޮރަދަން، 35 އަހަރު
މި މީހުން ހައްޔަރުކުރީ، ރާއްޖޭގައި މަސައްކަތްކުރަން ވޯކް ޕާމިޓް ހޯދައިދޭކަމަށް ބުނެ އޮޅުވައިލައިގެން އެހެން ބިދޭސީންގެ އަތުން ގިނަ އަދަދެއްގެ ފައިސާ ހޯދައި މަނީ ލޯންޑަރިންގްގެ އަމަލުތައް ހިންގަމުންދާ ކަމަށް ތުހުމަތުކޮށެވެ.
އެ މީހުންގެ ތެރެއިން މުޙައްމަދު އިމޮން ކަޒި އާއި ކަޒި ރައިހާނާއި، މުޙައްމަދު ޔޫސުފް ޕްރޮދަން ހައްޔަރުކޮށްފައިވަނީ މިދިޔަ މަހު 22 ވަނަ ދުވަހެވެ. އަފްޖަލް ހޮސައިން އާއި ޙަބީބުއްރަޙްމާން ހައްޔަރުކޮށްފައިވަނީ މިދިޔަ މަހު 23 ވަނަ ދުވަހެވެ. މުޙައްމަދު ޙަނީފް ބަޕަރީ ހައްޔަރުކޮށްފައިވަނީ 2025 ޑިސެންބަރު 30 ވަނަ ދުވަހެވެ.
މުޙައްމަދު އިމޮން ކަޒީގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން މިދިޔަ ބުރާސްފަތި ދުވަހު، 10 ދުވަހަށް ބަންދު ކުރުމަށް ވަނީ އަމުރުކޮށްފައެވެ. އަދި އަފްޖަލް ހޮސައިން އަދި ޙަބީބުއްރަޙްމާން 2026 ހުކުރު ދުވަހު ބަންދާމެދު ގޮތެއް ނިންމުމަށް ހާޒިރު ކުރުމުން 15 ދުވަހަށް ބަންދު ކުރުމަށް އަމުރު ކޮށްފައިވެއެވެ.
މުޙައްމަދު ޙަނީފް ބަޕަރީ މި މަހުގެ 15ވަނަ ދުވަހު ބަންދާމެދު ގޮތެއް ނިންމުމަށް ހާޒިރު ކުރުމުން 15 ދުވަހަށް ބަންދު ކުރުމަށް ވަނީ އަމުރުކޮށްފައެވެ.
އަދި ކަޒި ރައިހާން އާއި މުޙައްމަދު ޔޫސުފް ޕްރޮދަން، މި މަހުގެ 12ވަނަ ދުވަހު ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން 15 ދުވަހަށް ބަންދު ކުރުމަށް ވަނީ އަމުރުކޮށްފައެވެ.
މި މައްސަލަ ފުލުހުން ގެންދަނީ ތަހުގީގު ކުރަމުން އަންނަކަމަށް ވަނީ ބުނެފައެވެ.