މެޓާ ޕްލެޓްފޯމްސްގެ އެޕްލިކޭޝަންތަކުގައި ހިމެނޭ "އޭއައި ކެރެކްޓާ"ތަކާ ވާހަކަދެއްކުމުގެ ފުރުސަތު، ދުނިޔޭގެ އެކި ކަންކޮޅުތަކުގައި ތިބި ފުރާވަރުގެ ކުދިންނަށް ވަގުތީ ގޮތުން ބަންދުކުރަން އެ ކުންފުނިން ނިންމައިފިއެވެ.
މެޓާއިން ހުކުރު ދުވަހު ހާމަކުރި ގޮތުގައި، މި ފިޔަވަޅު އަޅަނީ ކުޑަކުދިންނަށް ރައްކާތެރި ގޮތަކަށް މި ޚިދުމަތް އަލުން ފަރުމާކުރުމަށެވެ. ކުރިއަށް އޮތް ހަފުތާތަކުގެ ތެރޭގައި، އާ ވާޝަން ތައްޔާރުވަންދެން ފުރާވަރުގެ ކުދިންނަށް މި އޭއައި ކެރެކްޓާތައް ބޭނުން ނުކުރެވޭނެ ކަމަށް އެ ކުންފުނީގެ ބްލޮގް ޕޯސްޓެއްގައި ބުނެފައިވެއެވެ.
އަލަށް ތައާރަފުކުރާ ވާޝަންގައި ބެލެނިވެރިންނަށް ކޮންޓްރޯލް ކުރެވޭނެ ފުރުސަތުތަކެއް ހިމެނޭނެއެވެ. މީގެ ތެރޭގައި ކުދިން އޭއައިއާ ކުރާ އަމިއްލަ ޗެޓްތައް ބެލެނިވެރިންނަށް ބަންދުކުރެވޭނެ ފީޗާއެއް ހިމެނޭނެ ކަމަށް މެޓާއިން މީގެ ކުރިން ބުނެފައިވެއެވެ. ނަމަވެސް، މި ކޮންޓްރޯލްތައް އަދި ރަސްމީކޮށް ތައާރަފުކޮށްފައެއް ނުވެއެވެ.
މީގެ އިތުރުން، ކުޑަކުދިންނަށް ނުގުޅޭ ފަދަ މައުލޫމާތު ނުވަތަ ވާހަކަތައް ދެއްކުން ހުއްޓުވުމަށްޓަކައި، މެޓާގެ އޭއައިތަކުން ދައްކާ ވާހަކަތައް ބިނާކުރާނީ "ޕީޖީ-13" ފިލްމު ރޭޓިންގް މިންގަނޑަށް ކަމަށް ވެސް އެ ކުންފުނިން ބުނެއެވެ.
މެޓާއިން މިފަދަ ފިޔަވަޅެއް މި އެޅީ، އެ ކުންފުނީގެ ބައެއް އޭއައި ޗެޓްބޮޓްތަކުން ކުޑަކުދިންނާ ނޭދެވޭ އަދި "އިޖުތިމާއީ މިންގަނޑުތަކަށް ނުފެތޭ" ވާހަކަތައް ދައްކާކަމަށް ބުނެ، ގިނަ ބައެއްގެ ފާޑުކިޔުން އަމާޒުވެފައިވާ ދަނޑިވަޅެއްގައެވެ. އަދި، އެމެރިކާގެ ރެގިއުލޭޓަރުން ވެސް ދަނީ އޭއައިގެ ސަބަބުން ކުޑަކުދިންނަށް ކުރާ ނޭދެވޭ އަސަރުތައް ވަރަށް ގާތުން ބަލަމުންނެވެ.
މެޓާއިން އެކި މަޝްހޫރު ފަރާތްތަކާއި ސެލެބްރިޓީންގެ ސިފަޖެހޭ ގޮތަށް އޭއައި ކެރެކްޓާތައް ތައާރަފުކުރީ 2023 ވަނަ އަހަރުގެ ފަހުކޮޅުގައެވެ. ނަމަވެސް، މި ޗެޓްބޮޓްތަކުން ކުޑަކުދިންނާ ނޭދެވޭ އަދި ބައެއް ފަހަރު 'ފްލާޓީ' ނުވަތަ މާ ބޮޑަށް ގާތްވެގެން ވާހަކަދައްކާކަމުގެ ޝަކުވާތައް ބޮޑުވެ، އެމެރިކާގެ ރެގިއުލޭޓަރީ އިދާރާތަކުންނާއި ބެލެނިވެރިންގެ ފަރާތުން މެޓާއަށް ބޮޑެތި ފިއްތުންތަކެއް ކުރިމަތިވިއެވެ.
މިދިޔަ އޯގަސްޓް މަހު ރޮއިޓާސްއިން ކުރި ތަހުގީގެއްގައި، މެޓާގެ އޭއައި ސިސްޓަމްތަކުން ކުޑަކުދިންނާ އެކަށީގެންނުވާ މައުލޫމާތުތައް ހިއްސާކުރާކަން ވަނީ ހާމަވެފައެވެ.
ސޯޝަލް މީޑިއާ އެޕްލިކޭޝަންތަކަކީ ކުޑަކުދިންނަށް ރައްކާތެރި ތަންތަނަށް ހެދުމަށް ގޮވާލާ އަޑުތައް ގަދަވެފައިވާ މި ދަނޑިވަޅުގައި، މެޓާއިން މި ޚިދުމަތް މެދުކަނޑާލީ ބެލެނިވެރިންނަށް ފުރިހަމަ ކޮންޓްރޯލް ލިބޭނެ ގޮތަށާއި 'ޕީޖީ-13' މިންގަނޑަށް ފެތޭނެހެން މި ޓެކްނޮލޮޖީ އަލުން ފަރުމާކުރުމަށެވެ.