500 މިލިއަން ސަޕޯޓަރުން ތިބޭ ލިވަޕޫލާއެކު ރާއްޖެ އިސްތިހާރު ކުރުން އެންފީލްޑުގައި ފަށައިފި

އެންފީލްޑްގައި ލިވަޕޫލުގެ ސަޕޯޓަރުން -- ފޮޓޯ/ ގެޓީ

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އަދި ވިޒިޓް މޯލްޑިވްސްއާ ގުޅިގެން، އިނގިރޭސިވިލާތުގެ ލިވަޕޫލް ފުޓަބޯޅަ ކްލަބާ އެކު ރާއްޖޭގެ ފަތުރުވެރިކަން އިޝްތިހާރު ކުރުމުގެ ކެމްޕޭނު ލޯންޗުކޮށް، އެ ކްލަބުގެ ދަނޑުގައި މިރޭ ރާއްޖެ އިޝްތިހާރު ކުރަން ފަށައިފިއެވެ.

މި ކެމްޕޭނުގެ މަގުސަދަކީ ލިވަޕޫލްގެ މަގްބޫލުކަމުގެ ބޭނުންހިފައި، ގިނަ ބަޔަކު ރާއްޖެއަށް ދަތުރުކުރުމަށް ބާރުއެޅުމެވެ.

މިރޭ މި ކެމްޕޭނު ލޯންޗު ކުރުމާއެކު ލިވަޕޫލްގެ ދަނޑު، އެންފީލްޑުގައި އެވަޓަންއާ ދެކޮޅަށް މިހާރު ކުޅެމުންދާ މެޗުގައި، ދަނޑުގެ ވަށައިގެން ޖަހާފައިވާ ލެޑު ބޯޑުތަކުން ރާއްޖޭގެ ފަތުރުވެރިކަމުގެ އިޝްތިހާރުތައް ދަނީ ދައްކަމުންނެވެ.

މި ކެމްޕޭނު ލޯންޗު ކުރުމުގައި ބައިވެރިވެ ވަޑައިގަތުމަށް ރައީސް ޑރ. މުހައްމަދު މުއިއްޒު ވެސް ވަނީ ލިވަޕޫލާއި އެވަޓަން ބައްދަލުކުރަމުންދާ މެޗު ބައްލަވައިލެއްވުމަށް އެންފީލްޑަށް ވަޑައިގެންފައެވެ.

https://sun.mv/204305

ދުނިޔޭގެ އެކި ހިސާބުތަކުން ލިވަޕޫލްއަށް ސަޕޯޓުކުރާ މީހުންގެ އަދަދު 500 މިލިއަނަށް އަރައެވެ.

އެމްއެމްޕީއާރްސީން ބުނީ، 100 ގައުމެއްގައި 316 އޮފިޝަލް ލިވަޕޫލް ސަޕޯޓާސް ކްލަބް ހިމެނޭއިރު، ލިވަޕޫލާއެކު ހަދައިފައިވާ އެއްބަސްވުމުގެ ސަބަބުން ރާއްޖެއަށް ދުނިޔޭގެ ފެންވަރުގެ ބޮޑު އެކްސްޕޯޝާއެއް ލިބޭނެ ކަމަށެވެ.

އެގޮތުން ލިވަޕޫލް އެފްސީއާއެކު ކުރިޔަށް ގެންދާ މި ޕާޓްނާޝިޕްގެ ސަބަބުން މި އަހަރު އެއް ލައްކައަށް ވުރެ ގިނަ ފަތުރުވެރިން ރާއްޖެ އަންނާނެ ކަމަށް ލަފާކުރެވޭކަމަށާއި ފަތުރުވެރިކަމުގެ އާމްދަނީގެ ގޮތުގައި ގާތްގަނޑަކަށް 200 މިލިއަން ޑޮލަރު ލިބޭނެ ކަމަށް ބެލެވޭކަމަށް ވެސް އެމްއެމްޕީއާރުސީން ބުނެއެވެ.

އެންފީލްޑުގައި ލެޑު ބޯޑުތަކުން ރާއްޖޭގެ ފަތުރުވެރިކަމުގެ އިޝްތިހާރުތައް ދައްކަނީ --

މީގެ އިތުރުން މި ކެމްޕޭންގައި ޖުމްލަ 2.5 މިލިއަން ޑޮލަރުގެ އިންވެސްޓްމަންޓެއް ކުރާއިރު، އަހަރަކު އިނީޝިއަލް އިންވެސްޓްމަންޓަށް ވުރެ 20 ގުނަ އިތުރުވާނެ ކަމަށް ލަފާކުރެވޭ ރިޓާން އޮން އިންވަސްޓްމަންޓް (އާރްއޯއައި) ހިމެނޭ ކަމަށް ވެސް އެ ކުންފުނިން ބުނެއެވެ.

މީގެ އިތުރުން އެ ކުންފުނިން ބުނީ، މި ކެމްޕެއިންގައި ތަފާތު ޑިޖިޓަލް މާކެޓިން ހަރަކާތްތައް ހިމެނޭކަމަށާއި އޭގެ ތެރޭގައި ލިވަޕޫލް އެފްސީގެ ލެޖެންޑުން ބައިވެރިވާ ޚާއްސަ ހަރަކާތްތަކާއި އިންޓަރެކްޓިވް ފޭން ޒޯން ގްލޯބަލް ޓްރޭޑް ޝޯތަކުގައި ޖޮއިންޓް އިވެންޓްތައް ހިމެނޭނެ ކަމަށެވެ.

ލިވަޕޫލާއެކު ރާއްޖޭގެ ފަތުރުވެރިކަން އިޝްތިހާރު ކުރުމަށް ޕާޓްނާޝިޕެއް ހަދާފައިވާއިރު، 71 ޕޮއިންޓާއެކު އިނގިރޭސި ޕްރިމިއާ ލީގުގެ އެއްވަނައިގައި އެ ކްލަބުންވަނީ 10 ޕޮއިންޓުގެ ލީޑެއް ނަގައިފައެވެ.

comment ކޮމެންޓް