އިންޑިއާގެ މީޑިއާގެ އިތުރުން ގިނަ ބައެއްގެ ސަމާލުކަން ލިބުނު މޮނާލިސާ ނަމަކަށް ކިޔާ ކުއްޖާއަށް ފިލްމީ ދާއިރާގެ ފުރުސަތުތައް ހުށަހެޅި ޑައިރެކްޓަރަކު ފުލުހުންގެ ބެލުމުގެ ދަށަށް ގެންގޮސްފިއެވެ.
ފިލްމު ޑައިރެކްޓަރު ސަނޯޖް މިޝްރާ ފުލުހުންގެ ބެލުމުގެ ދަށަށް ގެންގޮސްފައި ވަނީ އިންޑިއާގެ 28 އަހަރުގެ އަންހެނަކު ހުށަހެޅި ޖިންސީ ގޯނާ ކުރުމުގެ ތުހުމަތުތަކާ ގުޅިގެންނެވެ.
އިންޑިއާގެ އުއްތަރު ޕްރަދޭޝްއަށް ނިސްބަތްވާ މި އަންހެންމީހާ ބުނެފައި ވަނީ ސަނޯޖް މިޝްރާއާ އެންމެ ފުރަތަމަ ބައްދަލުވީ ސޯޝަލް މީޑިއާ ޕްލެޓްފޯމްތައް ކަމަށްވާ އިންސްޓަގްރާމް އަދި ޓިކްޓޮކް މެދުވެރިކޮށް 2020 ވަނަ އަހަރުތެރޭ ކަމަށެވެ.
އޭގެ އަހަރެއްހާ ދުވަސް ފަހުން ސަނޯޖް އޭނާއަށް ދައުވަތު ދިނީ އިންޑިއާގެ ރިސޯޓަކަށް ދިއުމަށް ކަމަށާއި އެ ދައުވަތު ދިނީ 28 އަހަރުގެ އަންހެން މީހާއަށް ހުށަހަޅަން ގަސްތުކޮށްފައިވާ ފިލްމާ ބެހޭ ގޮތުން މަޝްވަރާ ކުރުމަށް ނަމަވެސް އެ ބައްދަލުވުން ނިމުނީ ޖިންސީ ގޯނާގެ ޝިކާރައަކަށް އޭނާ ވުމަށްފަހު ކަމަށް އެ އަންހެންމީހާ ވަނީ ބުނެފައެވެ.
މީޑިއާގެ އިތުރުން އިންޓަނެޓުގައި ބޮޑު މަގުބޫލުކަމެއް ހޯދި އިންޑިއާގެ އަންހެން ކުއްޖާ މޮނާލިސާ--ފޮޓޯ/ފޭސްބުކް
އިންޑިއާގެ ފެސްޓިވަލްއިން އާއްމުންގެ ބޮޑު މަގުބޫލުކަމެއް ހޯދި މޮނަލިސާ ފިލްމީ ދާއިރާއަށް ތައާރަފްކުރުމުގެ ބޭނުމުގައި ފިލްމީ ފުރުސަތުތައް ހުށަހަޅާ ވާހަކަތަކާ އެކު އިންޑިއާގެ އެހެން ފިލްމު ޕްރޮޑިއުސަރެއް ކަމަށްވާ ޖިތެންދުރަ ނާރަޔަން ވަނީ އެކަމުގައި ސަނޯޖްގެ އަމިއްލަ އެދުމެއް އޮންނާނެ ކަމަށާއި އެއީ ދުވަހަކު ވެސް ހަގީގަތަކަށްވާނެ ކަމެއް ނޫންކަމަށް ބުނެފައެވެ.
ސަނޯޖް މިޝްރާގެ މައްޗަށް ކުރެވުނު ޖިންސީ ގޯނާކުރުމުގެ ތުހުމަތުތަކާ އެކު އޭނާއާ ދެކޮޅަށް އެތަކެއް ހެކިތަކެއް މުމްބާއީ ފުލުހުންނަށް ލިބިފައިވާ ކަމަށާއި އޭނާ ވަނީ ފިލްމީ ދާއިރާއަށް 28 އަހަރުގެ އަންހެނަކު ތައާރަފްކުރާނެ ކަމަށް ބުނެ އޭނާ ބްލެކްމެއިލްކޮށްފައި ކަމަށް ފުލުހުންނާ ހަވާލާދީ މީޑިއާ ރިޕޯޓުތައް ބުނެއެވެ.
މި މައްސަލައާ ގުޅިގެން ސަނޯޖް މިޝްރާގެ އާއިލާއަށް ވެސް އާއްމުންގެ ފާޑުކިޔުންތައް އަންނަނީ އަމާޒުވަމުންނެވެ. އަދި މޮނަލިސާ އޭނާގެ ކިބައިން ސަލާމަތްވިކަން އެއީ އެ ކުއްޖާގެ ނަސީބު ކަމަށް ގިނަ ބަޔަކު އަންނަނީ ބުނަމުންނެވެ.