ނުޝްރަތުގެ މި ބިރުވެރި ފިލްމު ހަނދާން އެބަހުރިތަ؟

ބޮލީވުޑް ބަތަލާ ނުޝްރަތު ބަރޫޗާގެ ކެރިއަރުގެ އެންމެ މަގުބޫލު ފިލްމު ކަމަށްވާ "ޗޯރީ"ގެ ދެވަނަ ބައި މި މަހު އެމޭޒަން ޕްރައިމްގައި ސްޓްރީމްކުރާނެކަން އިއުލާނުކޮށްފިއެވެ.

މީގެ ހަތަރު އަހަރު ކުރިން އެމޭޒަން ޕްރައިމް ވީޑިއޯގައި ޕްރީމިއާކުރި މި ފިލްމަކީ 2017 ވަނަ އަހަރު ރިލީޒްކުރި މަރާޓީ ބިރުވެރި ފިލްމު "ލަޕައްޗަޕީ"ގެ ރިމޭކްއެކެވެ. މި ފިލްމުގެ ދެވަނަ ބައި ވެސް ޑައިރެކްޓްކުރާނީ ފުރަތަމަ ފިލްމު ޑައިރެކްޓްކުރި ވިޝާލް ފޫރިއާއެވެ.

ބިރުވެރި ޙާދިސާތަކެއްގެ މައްޗަށް ބިނާކޮށް އުފެއްދި "ޗޯރީ"ގެ ވާހަކައަށް ބެލުންތެރިންގެ ބޮޑު މަގުބޫލުކަމެއް ލިބުނުއިރު ފިލްމުގެ ދެވަނަ ބަޔަކަށް ބެލުންތެރިން އައީ އިންތިޒާރުކުރަމުންނެވެ.

ބަތަލާ ނުޝްރަތު ފިލްމު "ޗޯރީ"ގެ މަންޒަރެއްގައި--ފޮޓޯ/ބޮލީވުޑްހަންގާމާ

ފިލްމު "ޗޯރީ"ގައި ބަތަލާ ނުޝްރަތު ކުޅުނު މާބަނޑު އަންހެނެއްގެ ކެރެކްޓާއަކީ މިހާތަނަށް ބަތަލާގެ ކެރިއަރުގައި ކުޅެން ލިބުނު އެންމެ ޗެލެންޖިންގް ރޯލް ކަމަށް ނުޝްރަތު ވަނީ ބުނެފައެވެ.

ރަށްފުށުގެ މާބަނޑު އަންހެނެއްގެ ރޯލާ އެކު ފިލްމުގައި ނުޝްރަތަށް ދިމާވާ އާދަޔާޚިލާފު ބިރުވެރި ހާދިސާތަކުގެ ސަބަބުން ފިލްމާ މެދު ބެލުންތެރިން ވަރަށް ބޮޑަށް ޝައުގުވެރި ކުރުވިއެވެ. މި ފިލްމުގެ ދެވަނަ ބައި ރިލީޒްކުރަން ހަތަރު އަހަރު ނެގި ނަމަވެސް ފިލްމުގައި ގެނެސްދެވުނު ހާދިސާތައް ބެލުންތެރިން ހަނދާންނުނެތޭނެ ކަމަށް ނުޝްރަތު ވަނީ ބުނެފައެވެ.

މި މަހުގެ 11 ވަނަ ދުވަހު އެމޭޒަން ޕްރައިމްގައި ޕްރީމިއާ ކުރާނެކަން އިއުލާނުކޮށްފައިވާ "ޗޯރީ 2"ގައި ބެލުންތެރިންނަށް ގެނެސްދޭ ހާދިސާތައް އިހުނަށްވުރެ ބިރުވެރިވެފައި ބެލުންތެރިންނަށް ސިއްސުވާލާނެ ކަމަށް ރިޕޯޓުތައް ބުނެއެވެ. ފިލްމުގެ ދެވަނަ ބައި ފެށޭނީ ފުރަތަމަ ފިލްމު ނިންމާލި ހިސާބުން ކަމަށް ރިޕޯޓުތައް ބުނެއެވެ.

comment ކޮމެންޓް