ލައިލަތުލްޤަދްރިރޭގެ މަތިވެރިކަމާއި ސަވާބާއި ދަރުމަ އެއްހާސް މައްސަރަށްވުރެ ހެޔޮކަން ބޮޑުއިރު، އެ ރޭ ހީވާގިވެ ހެޔޮ އަމަލުކުރުމުގައި ދެމިތިބުމަށް މިއަދުގެ ހުކުރު ޚުތުބާގައި ގޮވާލައިފިއެވެ.
މިއަދުގެ ހުކުރު ޚުތުބާ ޚާއްސަކޮށްފައި ވަނީ "ލައިލަތުލްޤަދްރި"، މި މައުޟޫއުގެ މައްޗަށެވެ.
ޚުތުބާގައި ވަނީ މާތް ﷲއަށް ތަގުވާވެރިވެ، ހެޔޮ އަމަލާއެކު މި މާތް މައްސަރު ނިންމައިލެވޭތޯ ބަލައި އަދި އަމިއްލަ ނަފުސަށް ކުރެވޭ އަހުދުތަކަށް ރައްކާތެރިވުމަށް ގޮވައިލާފައެވެ. އަދި އިސްތިޣުފާރުކުރުން ގިނަކުރުމަށާއި، އެ ކަމަކީ ރޯދައަށް ހުންނަ އިރު އެ މީހަކަށް ކުރެވޭ ކުދިކުދި ފާފަތައް ފުއްސަވައިދެއްވާނޭ ކަމެއް ކަމަށް ޚުތުބާގައި ބުންޏެވެ.
މާތް ﷲގެ ޙަޟްރަތަށް ކުއްތަންވެ އެ ކަލާނގެއަށް އޮންނަ އިތުބާރު ހަރުދަނާކޮށް، އެކަލާނގެ ރަޙްމަތްފުޅުން ދެއްވައިފައިވާ ނިއުމަތްތަކަށް ޝުކުރުވެރިވާން ޚުތުބާގައި ވަނީ ބުނެފައެވެ. އަދި އިސްލާމްކަން މަތީ، ހެޔޮ ހާލުގައި ތިބެ، ރަމަޟާން މަހާ ބައްދަލުވުމަކީ ކުޑަ ނިއުމަތެއް ނޫން ކަމަށް ޚުތުބާގައި ބުންޏެވެ.
ބަޔަކު ތަރާވީހް ނަމާދު ކުރަނީ -- ސަން ފޮޓޯ/ މުހައްމަދު މާވީ
"އެކަލާނގެ فَضْلُ ވަންތަކަމުން ރޯދަހިފައިފީމުއެވެ. ނަމާދު ޤާއިމުކޮށްފީމުއެވެ. ކީރިތި ޤުރްއާން ކިޔަވައިފީމުއެވެ. ޞަދަޤާތް ދީފީމުއެވެ. ރޭ އަޅުކަން ކޮށްފީމުއެވެ. އިންސާނާގެ ޢަމަލުތަކުގެ ވާހަކަ ފަތްފުށްތަކުގައި މަލާއިކަތުން ލިޔުއްވާނެކަން ދަންނާށެވެ! އެހެންކަމުން ހެޔޮ ޢަމަލެއް މެނުވީ ނުކުރާށެވެ!" ޚުތުބާގައި ބުންޏެވެ.
ޚުތުބާގައި ބުނީ މިއީ ބަރަކާތުން ފުރިގެންވާ ދުވަސްތަކެއް ކަމަށެވެ.
"އަޅަމެންގެ އުމުރު މިހާތަނަށް އިތުރުކޮށްދެއްވީތީއެވެ! މި މަހާ ހިސާބަށް ފޯރުކޮށްދެއްވީތީއެވެ! މިހާރު އަހަރެމެން މި ތިބީ މި މަހުގެ ފަހު ދިހައިގެ ތެރޭގައެވެ. ވީމާ އަހަރެމެންގެ ހެޔޮ އަމަލުތައް ގަބޫލުކުރައްވައިތޯ މާތް ﷲގެ ޙަޟްރަތުގައި ދުއާ ދަންނަވާށެވެ!" ޚުތުބާގައި ބުންޏެވެ.
ޚުތުބާގައި ބުނީ މި ދުވަސްތަކާއި ރޭތައް އިޙްޔާކުރުމަކީ އެ ކަމުގެ ދަރުމައާއި ސަވާބުގެ މިންވަރު ހިސާބުކުރާން ނޭނގޭ ވަރަށް އިތުރުކޮށްދެއްވާކަމެއް ކަމަށެވެ. އަދި ރަމަޟާން މަހުގެ ފަހު ދިހައިގައި ކީރިތި މާތް ނަބިއްޔާ އަމަލުފުޅު ބެހެއްޓެވި ގޮތަށް ބަލާ އިރު، އެ ކަލޭގެފާނު ރޭ އަޅުކަމުގައި ގިނަ ވަގުތު ހޭދަކުރައްވާފައިވާ ކަމަށް ބުންޏެވެ.
ފ. ފީއަލީ ފުޓުބޯޅަ ދަނޑުގައި ބޮޑު ޖަމާއަތުގައި ކުރި ނަމާދު --- ސަން ފޮޓޯ
ފަހު ދިހައިގައި ލައްވައިފައިވާ ބަރަކާތްތެރިކަން ބޮޑު ރެއަކީ ލައިލަތުލްޤަދުރި ރޭކަން ފާހަގަކޮށް ޚުތުބާގައި ބުނީ އެ ރޭ ކުރާ ހެޔޮކަމުގެ ދަރުމަ އެ ނޫން ވަގުތުގައި، އެއް ހާސް މައްސަރުގައި ކުރާ ހެޔޮކަމަށް ވުރެ މަތިވެރިކުރައްވައިފައިވާ ކަމަށެވެ. މި މަތިވެރި ރެއަކީ މާތް ﷲ، އެ ރެއެއްގައި މީހަކަށް މުޅި އުމުރުގައި ދެއްވާނެ އެންމެ މަތިވެރިކަން ހާސިލުކުރެވިދާނެ ރެއެއް ކަމަށް ޚުތުބާގައި ބުންޏެވެ.
ކުރީގެ އުންމަތްތަކުގެ މީހުންނަށް ދިގު އުމުރު ދެއްވިއެވެ. މި އުންމަތުގެ މީހުންގެ އުމުރު ކުރުކަމުގައި ވިއަސް، މި ކުރު އުމުރުގައި ކުރާ ހެޔޮ އަމަލުގެ ދަރުމަ އިތުރުކޮށްދެއްވައިފައި ވާކަމަށް ޚުތުބާގައި ބުންޏެވެ. އޭގެ ތެރޭގައި ރަމަޟާން މަހު ލައިލަތުލްޤަދްރީގައި ކުރާ ހެޔޮކަމުގައި އެއް ހާސް މައްސަރަށް ވުރެ ހެޔޮ ކަން އިތުރުކުރައްވައިފައިވުން ހިމެނޭ ކަމަށް ޚުތުބާގައި ބުންޏެވެ.
އީމާންކަމާއެކު، ދަރުމައާއި ސަވާބަށް އެދި، އެ ރޭ އަޅުކަންކުރި މީހުންނަށް، ފާފަފުއްސަވައިދެއްވާނެއެވެ. އަދި އެ ބަރަކާތްތެރި ދުވަސްތަކާއި ރޭތަކުގައި ހީވާގިވެ ހެޔޮ އަމަލުކުރުމުގައި ދެމިތިބުމަށް ޚުތުބާގައި ވަނީ ނަސޭހަތްތެރިވެފައެވެ.
އިސްލާމީ މަރުކަޒުގައި ހުކުރު ޚުތުބާ އަޑުއަހަނީ -- ފޮޓޯ/ އިސްލާމިކް މިނިސްޓްރީ
ރަމަޟާން މަހުގެ ފަހު ދިހައިގައި އިއުތިކާފަށް އިނުމަކީ ގަދަވެގެންވާ ސުންނަތެއް ކަމުން، އިޢުތިކާފަށް އިންނަމީހާ، ބޭކާރު ކަންތައްތަކާއި ވާހަކަތަކުން ދުރުހެލިވެ، މާތް ﷲއަށް އަޅުކަންކުރުމާއި ކީރިތި ޤުރްއާން ކިޔެވުމާއި ޛިކުރުކުރުމުގައި ވަގުތު ހޭދަކުރާންވާނެ ކަމަށް ޚުތުބާގައި ވަނީ ބުނެފައެވެ.
އަދި މިސްކިތުގައި ހޭދަކުރާ ވަގުތުތަކުގައި މިސްކިތުގެ ސާފުތާހިރުކަމަށާއި، މިސްކިތުގެ ހުރުމަތަށް އިސްކަންދީ، މިސްކިތުގެ ޙުރުމަތް ގެއްލޭ ފަދަ އެއްވެސް ކަމެއް ކޮށްގެން ނުވާނެ ކަމަށް ޚުތުބާގައި ބުންޏެވެ. އެހެނީ މިސްކިތްތަކަކީ ބިންމަތީގައިވާ އެންމެ މާތް ތަންތަން ކަމަށާއި އެއީ މާތް ﷲގެ ގެކޮޅުތައްކަން އަބަދުވެސް ހަނދާންކުރުމަށް ވަނީ ނަސޭހަތްތެރިވެފައެވެ.
ޚުތުބާގައި ބުނީ މި ބަރަކާތްތެރި މައްސަރާ ވިދިގެން އަދާކުރާން އަމުރުކުރައްވައިފައިވާ އަޅުކަމަކީ ފިތުރު ޒަކާތް ދެއްކުން ކަމަށެވެ. އެއީ ފިތުރު ޒަކާތަކީ ރޯދަމަހު ރޯދަތައް ހިފި އިރު ކުރެވިފައިވާ އުނި ކަންކަން ފޫބައްދައިދޭ ކަމެއް ކަމަށް ޚުތުބާގައި ބުންޏެވެ. އެހެންކަމުން ތިމާއާއި ތިމާގެ ބެލުމުގެ ދަށުގައިވާ މީހުންނާއި ކުދީންގެ ފަރާތުން ފިތުރު ޒަކާތް ނެރުމަށް އަވަސް ވާން ޚުތުބާގައި ވަނީ ގޮވައިލާފައެވެ.