ފިލައިގެން އުޅުނު ލަންކާ ފުލުހުންގެ ވެރިޔާ އަމިއްލައަށް ކޯޓަށް

ފިލައިގެން އުޅުނު ލަންކާ ފުލުހުންގެ ވެރިޔާ އިންސްޕެކްޓާ ޖެނެރަލް އޮފް އޮފް ޕޮލިސް ދޭޝަބަންދޫން ޓެންނަކޫން. ފޮޓޯ/ނިއުސް ފަސްޓް

ލަންކާ ފުލުހުންގެ ވެރިޔާ އިންސްޕެކްޓާ ޖެނެރަލް އޮފް ޕޮލިސް ދޭޝަބަންދޫން ޓެންނަކޫން ހައްޔަރުކުރަން ކޯޓު އަމުރު ނެރުމާއެކު، ފިލައިގެން އުޅުމަށްފަހު އަމިއްލައަށް ކޯޓަށް ހާޒިރުވެއްޖެއެވެ.

ޓެންނަކޫން ހައްޔަރު ކުރުމަށް އަމުރު ނެރުނީ މިދިޔަ މަހު 28 ވަނަ ދުވަހު ސްރީ ލަންކާގައި ފުލުހުން އޮޕަރޭޝަނެއް ހިންގި ގޮތުން އޮފިސަރަކު މަރުވި މައްސަލައިގައެވެ.

އޮފިސަރު މަރުވެފައި ވަނީ 2023 ވަނަ އަހަރުގެ ޑިސެމްބަރު 31 ވަނަ ދުވަހު މަސްތުވާތަކެތީގެ މައްސަލައެއްގައި ވެލިގަމާގެ ހޮޓަލެއް ރެއިޑްކުރިއިރުއެވެ. އެ އޮޕަރޭޝަންގައި ފުލުހުންގެ ދެ ޔުނިޓަކުން އޮޅިގެން ބަދަލުކުރި ހަމަލާތަކުގައި އޮފިސަރު މަރުވިއިރު، އެހެން ފުލުހަކު ވަރަށް ބޮޑަށް ޒަޚްމަވިއެވެ.

މީގެ ކުރިން ޓެނަކޫން ހައްޔަރުކުރުމަށް ޖޮއިންޓް އޮޕަރޭޝަނެއް ފަށާފައިވަނީ، އެކްޓިން އައިޖީޕީގެ ސީދާ ބެލުމުގެ ދަށުންނެވެ.

މި އޮޕަރޭޝަންގެ މަގުސަދަކީ ހަމައެކަނި ޓެނަކޫން ހައްޔަރު ކުރުން ނޫން ކަމަށާއި އޭނާ ހައްޔަރުކުރުމުން ސަލާމަތްވުމަށް އެހީތެރިވެދިން ފަރުދުން ވެސް ހައްޔަރުކުރުމަށް ކަމަށް ލަންކާގެ ނޫސްތަކުން ރިޕޯޓުކުރެއެވެ. އެގޮތުން ކޯޓުން ވަނީ ޓެންނަކޫންގެ އިތުރުން ކޮލަމްބޯ ކްރައިމްސް ޑިވިޝަން (ސީސީޑީ) ގެ އިތުރު ހަތް އޮފިސަރަކު ވެސް ހައްޔަރުކުރުމަށް އަމުރު ނެރެފައެވެ.

ލަންކާގެ ނޫސްތަކުން ރިޕޯޓްކޮށްފައިވާ ގޮތުގައި ޓެންނަކޫން މިއަދު ކޯޓަށް ހާޒިރުވުމާ އެކު، އޭނާގެ މައްޗަށް ތުހުމަތުކުރާ ހާދިސާއާ ގުޅޭ މައްސަލައިގެ އަޑުއެހުން މިއަދު މެންދުރު ފަހު އަލުން ފަށާނެއެވެ.

comment ކޮމެންޓް