ޚާރިޖީ ވަޒީރު ޑރ. ޢަބްދުﷲ ޚަލީލް ރަސްމީ ދަތުރުފުޅެއްގައި މިއަދު ސްރީލަންކާއަށް ވަޑައިގެންފިއެވެ.
ޚާރިޖީ ވުޒާރާއިން ބުނީ ޚަލީލް ލަންކާއަށް ވަޑައިގަތީ އެ ގައުމުގެ ޚާރިޖީ އަދި ފަތުރުވެރިކަމުގެ ދާއިރާގެ ވަޒީރު ވިޖިތަ ހެރާތު ދެއްވި ދައުވަތަކަށް ކަމަށެވެ.
ޚަލީލް ލަންކާއަށް ވަޑައިގަތުމުން ކޮލޮމްބޯ އެއާޕޯޓުން މަރުހަބާ ވިދާޅުވީ އެ ގައުމުގެ ޚާރިޖީ ވުޒާރާގެ ނައިބު ވަޒީރު އަރުން ހެމަޗަންދުރާ އެވެ.
ޚާރިޖީ ވުޒާރާއިން ބުނީ ޚަލީލްގެ ތިން ދުވަހުގެ ދަތުރުފުޅުގައި ރައީސް އަނޫރާ ކުމާރަ ޑިސަނަޔަކައާއި ބޮޑުވަޒީރު ޑރ. ހަރިނީ އަމަރަސޫރިޔާއާ ބައްދަލުކުރައްވާނެ ކަމަށެވެ. އަދި ޚާރިޖީ ވަޒީރު ވިޖިތަ ހެރާތުއާއެކު ރަސްމީ މަޝްވަރާތައް ވެސް ބާއްވަވާނެ ކަމަށް އެ ވުޒާރާއިން ބުންޏެވެ.
މީގެ އިތުރުން ޚަލީލް، ލަންކާގެ ޕްރިވެޓް ސެކްޓާގައި ހަރަކާތްތެރިވާ ފަރާތްތަކާ ބައްދަލުކުރައްވައި، އެކި ދާއިރާތަކުން ގުޅިގެން މަސައްކަތް ކުރެވޭނެ ފުރުސަތުތަކާ ގުޅޭ ގޮތުން ވެސް މަޝްވަރާ ކުރައްވާނެ ކަމަށް އެ ވުޒާރާއިން ބުންޏެވެ. ހަމައެއާއެކު ލަންކާގައި ދިރިއުޅޭ ދިވެހީންގެ ހާލު، ވަޒީރު ބައްލަވައިލައްވާނެ ކަމަށް ޚާރިޖީ ވުޒާރާއިން ބުންޏެވެ.
ޚަލީލާއެކު ލަންކާއަށް ވަޑައިގަތް ބޭފުޅުންގެ ތެރޭގައި ހިމެނެނީ ފޮރިން ސެކްރެޓަރީ ފާތިމަތު އިނާޔާއާއި އެޑިޝަނަލް ސެކްރެޓަރީ އާމިނަތު އަބްދުﷲ ދީދީ އެވެ.
މިއީ، މިދިޔަ ސެޕްޓެމްބަރު މަހުގެ 30ގައި ޚާރިޖީ ވަޒީރު ކަމަށް އައްޔަންކުރެއްވި ޚަލީލް، އެ މަގާމާ ހަވާލުވެވަޑައިގަތް ފަހުން ލަންކާއަށް ކުރައްވާ ފުރަތަމަ ރަސްމީ ދަތުރުފުޅެވެ.