ސަރުކާރުން ޓެކްސީ ޚިދުމަތް ފަށަން އުޅުން އަލުން މުރާޖާކުރަން ޑްރައިވަރުން ގޮވައިލައިފި

ސަރުކާރުން ޓެކްސީ ޚިދުމަތް ފެށުމަށް ނިންމާފައިވާ ނިންމުން އަލުން މުރާޖައާކުރުމަށް ރާއްޖޭގެ ޑްރައިވަރުންގެ އެސޯސިއޭޝަނުން މިއަދު ގޮވާލައިފިއެވެ.

ސަރުކާރުން ޓެކްސީގެ ޚިދުމަތް ދޭން ނިންމުމާ ގުޅިގެން، ޓެކްސީ ޑްރައިވަރުން އަންނަނީ ވަރަށް ބޮޑަށް ކަންބޮޑުވުން ފާޅުކުރަމުންނެވެ. ޑްރައިވަރުންގެ ކަންބޮޑުވުންތައް އިންތިހާއަށް ބޮޑުވެފައި އޮއްވައި، އިއްޔެވަނީ މާލެ ސަަރަހައްދުގައި ޓެކްސީގެ ޚިދުމަތް ފެށުމަށް ވާންޖެހޭ ތައްޔާރީތައް ވުމަށް ޓްރާންސްޕޯޓް މިނިސްޓްރީން އެމްޓީސީސީއާއެކު އެމްއޯޔޫއެއްގައި ސޮއިކޮށްފައެވެ.

މި ކަމާ ގުޅިގެން ޑްރައިވަރުންގެ އެސޯސިއޭޝަނުން މިއަދު ނެރުނު ބަޔާނުގައި ވެސް ވަނީ މީގެ ކުރިން ވެސް ޑްރައިވަރުންގެ ފަރާތުން ފާޅުކުރަމުންދިޔަ ކަންބޮޑުވުންތައް ތަކުރާރުކޮށްފައެވެ.

އޭގައިވަނީ ސަރުކާރުގެ ފުރިހަމަ އެހީތެރިކަމާއެކު ޓެކްސީ ފްލީޓު ތައާރަފު ކުރުމުން ޑްރައިވަރުންނާއި ޓެކްސީ ސެންޓަރުތަކުގެ ވެރިންނާއި ކާރުތައް ކުއްޔަށް ދޫކުރާ ފަރާތްތަކުގެ ދިރިއުޅުން އިތުރަށް ނިކެމަތިވެގެންދާނެކަން ފާހަގަކޮށްފައެވެ. އެ ގޮތުން ކުދި ވިޔަފާރިތައް ހީނަރުވެ، މި ދާއިރާގައި އިންސާފުވެރިކަމާއި ވާދަވެރިކަން ނެތިގެންދާނެ ކަމާމެދު ދެބަސްވެވެން ނެތް ކަމަށް ބުނެފައިވެއެވެ.

ޑްރައިވަރުން ބުނީ، މި ކަމުގެ ކަންބޮޑުވުންތައް ހިއްސާކުރުމަށް ޓްރާންސްޕޯޓް މިނިސްޓްރީއާއި އެ އެސޯސިއޭޝަނާ ދެމެދު ވާހަކަ ދެކެވުނު ނަމަވެސް، މި ކަމުގައި ދެފުށް ފެންނަ ގޮތެއްގައި ޓްރާންސްޕޯޓު މިނިސްޓްރީން އެއްބާރުލުން ދީފައިނުވާ ކަމަށާއި، އަދި އެ ކަމާ ހިތާމަކުރާ ކަމަށެވެ.

އެއާއެކު ބަޔާނުގައިވަނީ މި ދާއިރާގައި އަމާނަތްތެރިކަމާއެކު މަސައްކަތްކުރާ އެންމެހައި ފަރާތްތަކުގެ ހައްގަށް އަރައިގަނެ، މި ފަދަ ނިންމުމެއް ސަރުކާރުން ނިންމި ސަބަބު ސާފުކޮށްދިނުމަށް ގޮވާލައިފައެވެ. އަދި އެ ނިންމުން އަލުން މުރާޖައާ ކުރުމަށް ވެސް ގޮވައިލިއެވެ.

އަދި ޓެކްސީގެ ޚިދުމަތް ސަރުކާރުން ފަށަން ނިންމީ އެކަށީގެންވާ މަޝްވަރާތަކާއި ދިރާސާތަކާ ނުލައި، އެފަދަ އެއްވެސް ފްލީޓެއް ތައާރަފު ނުކުރާނެ ކަމަށް މީގެ ކުރިން ޓްރާންސްޕޯޓު މިނިސްޓަރު ދެއްވި ޔަގީންކަމާ ސީދާ ޚިލާފަށްކަން ވެސް އެ ބަޔާނުގައި ފާހަގަކޮށްފައިވެއެވެ.

އަދި އެތައް ހާސް ދުވަހެއްގެ ބުރަ މަސައްކަތުން ބޮޑެތި ކުރިއެރުންތަކެއް ހޯދި، މި ދާއިރާއާމެދު އަޅަމުން ދާ ބޭއިންސާފު ފިޔަވަޅުތަކާ ދެކޮޅަށް ހުރިހާ ޓެކްސީ ޑްރައިވަރުންނާއި އާންމުންގެ އެހީތެރިކަމާއި އެއްބަވައިވަންތަ ކަމަށް ވަނީ އެ އެސޯސިއޭޝަނުން ވަނީ ގޮވާލައިފައެވެ.

މިނިވަން ޓެކްސީ ޑްރައިވަރުންގެ ހައްގުތައް ދެމެހެއްޓުމަށް ޓަކައި ގާނޫނީ ގޮތުން އަޅަންޖެހޭ ހުރިހާ ފިޔަވަޅެއް ޑްރައިވަރުންގެ އެސޯސިއޭޝަނުން އަޅާނެ ކަމުގެ ޔަގީންކަން ވެސް ދީފައިވެއެވެ.

ސަރުކާރުން ޓެކްސީގެ ޚިދުމަތް ފަށަން ނިންމުމާއެކު ކަންބޮޑުވުން ފާޅުކޮށް ޑްރައިވަރުން އިހުތިޖާޖު ވެސް ކުރިއެވެ. އެ އިހުތިޖާޖުތައް ހުއްޓައިލީ ޓެކްސީ ޑްރައިވަރުންގެ ކަންބޮޑުވުންތަކަށް ހައްލު ހޯއްދަވައިދެއްވާނެ ކަމަށް ޓްރާންސްޕޯޓު މިނިސްޓަރު ޔަގީންކަން ދެއްވުމުންނެވެ.

ޓެކްސީގެ ޚިދުމަތް ފެށުމަށް އެމްޓީސީސީއާ ދެމެދު އެމްއޯޔޫއެއްގައި ސޮއިކުރީ، ސަރުކާރުން ޓެކްސީގެ ޚިދުމަތް ދޭން ނޫޅޭ ކަމަށް ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހީމް ފަލާހު ވިދާޅުވެފައިވަނިކޮށެވެ.