އައްޑޫ ސިޓީގެ ހަންކެޑެ ބްރިޖު އާންމު ދަތުރުފަތުރަށް ބޭނުންކުރަން މިރޭ ހުޅުވާލައިފިއެވެ.
ކޮންސްޓްރަކްޝަން މިނިސްޓްރީން މިނިސްޓްރީން އެކްސްގައި ކުރި ޕޯސްޓެއްގައި ވަނީ، އިންޑިއާގެ އެންގްޒިމް ބޭންކުގެ ލައިން އޮފް ކްރެޑިޓް ފެސިލިޓީގެ ދަށުން ކުރިއަށް ގެންދާ އައްޑޫ ރޯޑް އެންޑް ސްޓޯމް ވޯޓާ ޑްރެއިނޭޖް ޑިވެލޮޕްމަންޓު ޕްރޮޖެކްޓުގައި ހިމެނޭ ހަންކެޑެ ޑީޓުއާ ލިންޑު ރޯޑުގެ މިރޭ 12:00 އިން ފެށިގެން އާންމުނަށް ބޭނުންކުރަން ހުޅުވާލާނެ ކަމަށް ބުނެފައެވެ.
ގައުކެޑި އާއި މަރަދޫ ގުޅައިލުމަށް ހަދާފައިވާ މި ބްރިޖު ހުޅުވުން ލަސްވާތީ އައްޑޫގެ ގިނަ ރައްޔިތުން ކަންބޮޑުވުން ފާޅުކުރަމުން އަންނައިރު، މިދިޔަ ހޯމަ ދުވަހު އެ ސިޓީގެ މޭޔަރު އަލީ ނިޒާރު ވެސް ވަނީ ކަންބޮޑުވުން ފާޅުކޮށް ފޭސްބުކްގައި ޕޯސްޓެއް ކުރައްވާފައެވެ.
އެގޮތުން، ނިޒާރު ވަނީ އެ ބްރިޖު ނުހުޅި ލަސްވާންވީ ސަބަބެއް ނެތް ކަމަށާއި ކޮންޓްރެކްޓަރު އެ ބުރިޖުގައި ކުރަން ޖެހޭ ހުރިހާ މަސައްކަތެއްކޮށް، ނިންމާފައިވާ ކަމަށް ވިދާޅުވެފައެވެ.
ބުރިޖު ހުޅުވައި، ލިންކުރޯޑު އަލުން ހެދުމާއި ހަންކެޑެ ސަރަހައްދުގައި ހަދާފައިވާ ވަގުތީ ވެލި މަހު މަރަމާތު ކުރުމުގެ ޒިންމާ އޮތީ ކޮންސްޓްރަކްޝަން މިނިސްޓްރީއަށް ކަމަށް ނިޒާރު ވަނީ ވިދާޅުވެފައެވެ.
"މި މަސައްކަތް ތަކަކީ އައްޑޫ މަގުހެދުމުގެ މަސައްކަތުގައި ހިމެނޭ މަސައްކަތްތައް. ކައުންސިލްއިން މިމަސައްކަތްތައް އަވަސްކުރުމަށް ތަކުރާރުކޮށް ދަނީ އެދެމުން. އަދި އެދެވޭ ޖަވާބެއް މިނިސްޓްރީގެ ފަރާތުން ލިބިފައި ނުވާކަން ހިތާމައާއި އެކު ފާހަގަކުރަން," ނިޒާރު ޕޯސްޓުގައި ލިޔުއްވާފައިވެއެވެ.
ހަންކެޑެ ބްރިޖުގެ މަސައްކަތްކޮށްފައި ވަނީ އިންޑިއާގެ އެފްކޮންސް ކުންފުނިންނެވެ. އެ މަޝްރޫއުގެ ދަށުން 1.4 ކިލޯމީޓަރުގެ ހަތަރު ލޭނުގެ ބްރިޖެއް ވަނީ ތަރައްގީކޮށްފައެވެ.
ހަމައެއާއެކު، ރިއަލް އެސްޓޭޓް ޓޫރިޒަމް ތަރައްގީކުރާ ހަންކެޑެ މަޝްރޫއުގެ މަސައްކަތުގެ ބިންގާ ވަނީ މިއަހަރުގެ އޭޕްރިލް މަހު އަޅާފައެވެ.
އެ މަސައްކަތް ހަވާލުކޮށްފައި ވަނީ ޗައިނާގެ ނެޝަނަލް އިލެކްޓްރިކަލް އިންޖިނިއަރިން ކޮމްޕެނީ (ސީއެންއީއީސީ)އާއެވެ.
ހަންކެޑެ ހުރިހާ ގޮތަކުން ވެސް ތަފާތު މަންޒިލަކަށް ވާނެ ކަމަށް ބުނެ މި މަޝްރޫޢު އިއުލާނުކޮށް، މި މަޝްރޫއުގެ ޑިޒައިންގެ ފޮޓޯ ހިއްސާކުރަމުން، މީގެ ކުރިން ފަންޑު މެނޭޖްމަންޓް ކޯޕްރޭޝަންގެ (އެމްއެފްއެމްސީ) އިން ބުނީ މި މަޝްރޫއުގެ ދަށުން، ހަންކެޑޭގައި 1،041 ކޮޓަރި ހެދުމަށް ހަމަޖެހިފައިވާ ކަމަށެވެ.