އައްޑޫ ސިޓީ ހަންކެޑެ ބްރިޖް އެޅުމަށް ހަދައިފައިވާ ވަގުތީ ފަސްގަނޑުން ކޮންސްޓްރަކްޝަން މިނިސްޓްރީގެ ހުއްދައާ ނުލައި ވެލި ނުނެގުމަށް އެންގުމުން، އެއީ ގާނޫނާ ޚިލާފު ނިންމުމެއް ކަމަށް އެ ސިޓީގެ މޭޔަރު އަލީ ނިޒާރު ވިދާޅުވެއްޖެއެވެ.
ނިޒާރު ކުރެއްވި ޕޯސްޓުގައި ވަނީ، ރައްޔިތުންގެ ބޭނުންތަކަށް އެ ވެލި ނަގަން ކައުންސިލުން މަސައްކަތް ކުރަމުން ދަނިކޮށް، އެ ވެލި މިނިސްޓްރީގެ ބެލުމުގެ ދަށަށް ގެންގޮސްފައި ވާކަމަށެވެ. އަދި މިކަން ކޮށްފައި ވަނީ، ކައުންސިލާ އެއްވެސް މަޝްވަރާއެއް ކުރުމެއް ނެތިކަމަށާއި ކޮންސްޓްރަކްޝަން މިނިސްޓްރީގެ އިންޖިނިއަރުން ލައްވާ ސޮއިކުރުވައިގެން ކަމަށް އޭނާ ލިޔުއްވައިފައިވެއެވެ.
މިއީ ދައުލަތް ހިންގަން ހަދާފައި ހުރި ގާނޫނުތަކާ ފުށުއަރާ 'ޖާހިލު' ނިންމުމެއް ކަމަށް ނިޒާރު ވަނީ ސިފަކުރައްވާފައެވެ.
"ލާމަރުކަޒީ ގާނޫނު ފުނޑާލަން އިތުރު ކުރި ބޮޅެއް. ގާނޫނާއި، ހަމައާއި އުސޫލުން ބޭރުން އަންގާ އެންގުންތަކަށް އައްޑޫ ސިޓީ ކައުންސިލުން އަމަލު ނުކުރާނެ ކަން މައުލޫމާތައް ޓަކައި ދަންނަވަން. ކަންކަން ނިންމުމުގައި މަޝްވަރާ އިސްކޮށް ދައުލަތް ހިންގުމުގެ ޒަމާނީ ހަމަތަކަށް ފަރިތަވުމަށް ވެސް ދަންނަވަން،" އެ ޕޯސްޓުގައި ވެއެވެ.
އެ ޕޯސްޓަށް ރައްދު ދެއްވައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވީ އެފަދައިން އެންގީ އައްޑޫގެ ލިންކު ރޯޑު ހެދުމަށް ގިނަ އަދަދަކަށް ވެލި ބޭނުންކުރަން ޖެހޭނެކަމަށް ފެންނާތީ އާއި އައްޑޫއަކީ ފަސޭހައިން ވެލި ނެގެން އޮތް ތަނަކަށްނުވާތީ ކަމަށެވެ.
"މިވަގުތު އައްޑޫ ސިޓީގެ ލިންކު ރޯޑު އަލުން ހެދުމަށްވުރެ އައްޑޫ ސިޓީގެ ރައްޔިތުންނަށް އެވެލި ބޭނުންކުރަން ޖެހޭ އެހެން މުހިއްމު ކަމެއްވާނަމަ ކައުންސިލުން އެދުމުން އެވެލި ދޫކުރުމަށް މިނިސްޓްރީން ދެކޮޅެއް ނުހަދާނެ،" އެ ޕޯސްޓުގައި ވެއެވެ.
މޭޔަރު ނިޒާރު ނިސްބަތްވެވަޑައިގަންނަވާ އެމްޑީޕީން ދަނީ މި ސަރުކާރުން ލާމަރުކަޒީ ނިޒާމު "ފުނޑާލަން" މަސައްކަތް ކުރާކަމަށް ބުނެ ފާޑުކިޔަމުންނެވެ. އެގޮތުން އަންނަ އަހަރަށް ލަފާކުރާ ބަޖެޓުގައި ކައުންސިލްތަކަށް ދޭންޖެހޭ ފައިސާގެ ބޮޑުބައެއް އުނިކޮށް ފުރަތަމަ ހުށަހެޅުމާއި، މި ސަރުކާރުން ގާއިމްކުރާ އާބަން ސެންޓަރުތަކަކީ ވެސް ލާމަރުކަޒީ ނިޒާމާ އިދިކޮޅަށް ކުރަމުންގެންދާ މަސައްކަތް ކަމަށް އެމްޑީޕީން އަންނަނީ ބުނަމުންނެވެ.
ހަންކެޑެ ބްރިޖަކީ، ގައުކެޑި އާއި މަރަދޫ ގުޅައިލުމަށް އެ ދެމެދުގައި އަޅައިފައިވާ ބްރިޖެކެވެ. އެ ބުރިޖުގެ މަސައްކަތް މިހާރު ވަނީ އެއްކޮށް ނިމިފައި ކަމަށާއި، އަންނަ މަހު އެ ބުރިޖު އާންމުންނަށް ހުޅުވާލާނެ ކަމަށް އައްޑޫ ސިޓީ ކައުންސިލުން ބުނީ މިދިޔަ އޮގަސްޓް މަހުއެވެ.
ހަންކެޑެ ބްރިޖުގެ މަސައްކަތް ކޮށްފައި ވަނީ އިންޑިއާގެ އެފްކޮންސް ކުންފުނިންނެވެ. އެ މަޝްރޫއުގެ ދަށުން 1.4 ކިލޯމީޓަރުގެ ހަތަރު ލޭނުގެ ބްރިޖެއް ވަނީ ތަރައްގީކޮށްފައެވެ.
ހަމައެއާއެކު ރިއަލް އެސްޓޭޓް ޓޫރިޒަމް ތަރައްގީކުރާ ހަންކެޑެ މަޝްރޫއުގެ މަސައްކަތުގެ ބިންގާ ވަނީ މިއަހަރުގެ އޭޕްރިލް މަހު އަޅާފައެވެ.
އެ މަސައްކަތް ހަވާލުކޮށްފައި ވަނީ ޗައިނާގެ ނެޝަނަލް އިލެކްޓްރިކަލް އިންޖިނިއަރިން ކޮމްޕެނީ (ސީއެންއީއީސީ)އާއެވެ.
ހަންކެޑެ ހުރިހާ ގޮތަކުން ވެސް ތަފާތު މަންޒިލަކަށް ވާނެ ކަމަށް ބުނެ މި މަޝްރޫޢު އިއުލާނުކޮށް، މި މަޝްރޫއުގެ ޑިޒައިންގެ ފޮޓޯ ހިއްސާކުރަމުން، މީގެ ކުރިން ފަންޑު މެނޭޖްމަންޓް ކޯޕްރޭޝަންގެ (އެމްއެފްއެމްސީ) އިން ބުނީ މި މަޝްރޫއުގެ ދަށުން، ހަންކެޑޭގައި 1،041 ކޮޓަރި ހެދުމަށް ހަމަޖެހިފައިވާ ކަމަށެވެ.