ދިވެހީންގެ އޯގާވެރިކަމާއި ހިތްހެޔޮކަން ފެނި، ޗުއްޓީ ހޭދަކުރަން ލޯބިވެރިޔާއާ އެކު ރާއްޖެ ޒިޔާރަތްކުރި ފަތުރުވެރިއަކު އިސްލާމްވެއްޖެއެވެ.
އެ ފަތުރުވެރިޔާއަކީ އިޓަލީގެ ރައްޔިތެކެވެ. އޭނާ ޗުއްޓީ ހޭދަކުރަން ރާއްޖެ އައީ އޭނާގެ ލޯބިވެރިޔާ ގޮވައިގެންނެވެ. ދެ މީހުން ޗުއްޓީ ހޭދަކުރީ އާންމުން ދިރިއުޅޭ ރަށެއްގައެވެ.
ސޯޝަލް މީޑިއާގައި އެ ފަތުރުވެރިޔާ ހިއްސާކުރި ގޮތުގައި މޫސުން އެހާ ރަނގަޅު ނޫން ނަމަވެސް ސްނޯކްލިންއަށް ގޮސް އުޅުމުގެ ތެރެއިން އޭނާގެ ލޯބިވެރިޔާގެ ފޯނު ވަނީ މޫދަށް ވެއްޓިފައެވެ. ހޯދައި ހޯދައި ވެސް ނުފެނުމުން އަލުން ފޯނު ނުލިބޭނެ ކަމަށް ހީކޮށް އެއްކޮށް އުންމީދު ކަނޑައިލި ކަމަށް އޭނާ ބުންޏެވެ.
ދެ މީހުންގެ ހުރިހާ ހަނދާންތަކެއް ރައްކާކުރެވިފައި ވަނީ އެ ފޯނުގައި ކަމުން، އަންހެން ކުއްޖާ ހުރީ އެ ކަމާ ވަރަށް ބޮޑަށް ދެރަވެފައި ކަމަށް އޭނާ ބުންޏެވެ.
އެ ވާހަކަ އެ ރަށުގެ މީހެއް ގާތު ހިއްސާކުރުމުން އޭނާއާއި އޭނާގެ ރައްޓެހިން ގޮސް އެ ފޯނު ހޯދަން އެތައް ގަނޑިއިރަކު މަސައްކަތް ކުރި ކަމަށް ފަތުރުވެރިޔާ ބުންޏެވެ. އެ ފޯނު ފެނުން ކަމަށާއި، ފޯނު އޮތީ ވޯޓާޕްރޫފް ކަވަރަކަށް ލާފައިކަމުން އެއްވެސް ގެއްލުމެއް ނުލިބޭ ކަމަށް ފަތުރުވެރިޔާ ބުންޏެވެ.
ފަތުރުވެރިޔާ ބުނި ގޮތުގައި އެއީ ދިވެހިން އޭނާ ހައިރާންކޮށްލި ފުރަތަމަ ފަހަރެއް ނޫނެވެ. އަދި، ދިވެހިން އެހާ ހިތްހެޔޮވެފައި އޯގާތެރީ މުސްލިމުންނަށް ވާތީތޯ އެނާ ވަނީ ސުވާލުކޮށްފައެވެ.
އެހެންވެ، އޭނާ ވެސް މުސްލިމަކަށް ވާން ބޭނުން ކަމަށް ފަތުރުވެރިޔާ ބުންޏެވެ.
އެ ހާދިސާއަށް ފަހު ދަތުރު އިތުރު ފަސް ދުވަހަށް އިތުރުކޮށް މާލޭގައި މަޑުކުރި ކަމަށް ފަތުރުވެރިޔާ ބުންޏެވެ. އަދި، މީހަކު އޭނާއާ ދީނީ އިލްމުވެރިއަކާ ބައްދަލުކޮށްދިން ކަމަށާއި މުސްލިމަކަށް ވާން ޖެހޭ ގޮތް އޭނާ އޮޅުންފިލުވައި، ޝަހާދަތް ކިޔައި، މިހާރު އިސްލާމްވެފައިވާކަމުގެ އުފާވެރި ޚަބަރު އޭނާ ވަނީ ހިއްސާކޮށްފައެވެ.
ނަމާދުކުރާ ވަގުތުތަކާއި، އިސްލާމް ދީނާ ބެހޭގޮތުން ވަރަށް ގިނަ ކަންތައްތައް އެ މީހާގެ ފަރާތުން އެނގުނު ކަމަށް އޭނާ ބުންޏެވެ. ވަކިން ޚާއްސަކޮށް ޒަކާތަކީ ކޯންޗެއްކަމާއި، މުސްލިމުން ޒަކާތް ދެނީ ކީއްވެކަން އެނގުމުން އޭނާގެ ލޮލުން ކަރުނަ އައި ކަމަށް ފަތުރުވެރިޔާ ބުންޏެވެ.
ފަތުރުވެރިޔާ ވަނީ ދަތުރުގައި ދިމާވި އެންމެންނާއި އޭނާއަށް މުސްލިމަކަށްވުމަށްޓަކައި އެހީތެރިވެދިން އެންމެންނަށް ޝުކުރު އަދާކޮށްފައެވެ.