މަގުބޫލު ފިލްމުތައް ކަމަށްވާ "އެކްތާ ޓައިގާ" އަދި "ބަޖްރަންގީ ބައިޖާން"ގެ ޑައިރެކްޓަރު ކަބީރު ޚާން ދެން އުފައްދާ ފިލްމުގެ ލީޑް އެކްޓަރަކަށް ވިކީ ކޯޝަލް ގެންނަން އުޅޭ ކަމަށް ރިޕޯޓުތައް ބުނެފިއެވެ.
މީގެ ކުރިން ވެސް ތަފާތު ޖޯންރާތަކަށް ފިލްމު އުފައްދާފައިވާ ކަބީރު އަލަށް ފަށަން އުޅޭ މި ފިލްމަކީ މިހާތަނަށް އޭނާ ގެނެސްދީފައިނުވާ މުޅިން ތަފާތު ޖޯންރާގެ ފިލްމަކަށް ވާނެ ކަމަށް ރިޕޯޓުތައް ބުނެއެވެ.
ކަބީރުގެ މި ފިލްމުގެ ލީޑް ރޯލް އެކްޓަރަކަށް އޭނާ ބޭނުންވަނީ ގާތް ގުޅުމެއް އޮންނަ ބަތަލާ ކެޓްރީނާ ކައިފްގެ ފިރިމީހާ ވިކީ ކޯޝަލް ކަމަށް ރިޕޯޓުތައް ބުނެއެވެ.
ވިކީއާ އެކު މި ފިލްމު އުފައްދަން ބޭނުންވާ އެންމެ ބޮޑު އެއް ބޭނުމަކީ މިހާތަނަށް ކަބީރާ އެކު ވިކީ މަސައްކަތްކޮށްފައި ނެތުމުގެ އިތުރުން ވިކީއަކީ ވެސް ތަފާތު ޖޯންރާތައް ތަޖުރިބާކުރަން ޝައުގުވެރިވާ އެކްޓަރަކަށްވުމުން ކަމަށް ފިލްމީ ޚަބަރުތައް ބުނެއެވެ.
ޑައިރެކްޓަރު ކަބީރު ޚާން ބަތަލާ ކެޓްރީނާ ކައިފްއާ އެކު--ފޮޓޯ/އިންޑިއަންއެކްސްޕްރެސް
މި ފިލްމުގެ މަސައްކަތް ޕްރީ-ޕްރޮޑަކްޝަން މަރުހަލާގައި އޮތްއިރު ވަރަށް އަވަހަށް ފިލްމު އިއުލާނުކުރާނެ ކަމަށް މީޑިއާ ރިޕޯޓުތައް ބުނެއެވެ. ކަބީރު އެންމެ ފަހުން ބެލުންތެރިންނަށް ގެނެސްދީފައިވަނީ މިދިޔަ އަހަރު ކާތިކް އާރްޔަން ލީޑް ރޯލް ކުޅުނު ސްޕޯޓް ބައޮގްރަފީ "ޗަންދޫ ޗެމްޕިއަން"އެވެ.
ވިކީއާ އެކު އިތުރު ފިލްމެއް އުފެއްދުމުގެ މަޝްވަރާތައް ކުރަމުން އަންނައިރު ކަބީރު ވަނީ އެޕްލޯސް އެންޓަޓެއިންމަންޓާ ގުޅިގެން ދެ ފިލްމެއް އުފެއްދުމުގެ އެއްބަސްވުމެއްގައި ސޮއިކޮށްފައެވެ.
މި ފަހަކަށް އައިސް ވިކީ ކުޅޭ ފިލްމުތަކުން އާންމުންގެ ތައުރީފު އެކްޓަރަށް ލިބެމުން އަންނައިރު ބެލުންތެރިންގެ ފަރާތުން ލިބޭ މަގުބޫލުކަމާ އެކު ފިލްމީ ހުށަހެޅުންތައް ވެސް ވިކީއަށް އަންނަނީ ލިބެމުންނެވެ.
ވިކީ އެންމެ އަވަހަށް ބެލުންތެރިންނަށް ފެންނާނީ މި ފެށޭ ފެބްރުއަރީ މަހުގެ 14ގައި ރިލީޒްކުރާ ތާރީޚީ ފިލްމު "ޗާވާ"އިންނެވެ.