ވޮޝިންޓަން (30 ޖަނަވަރީ 2025): އެމެރިކާގެ ފަސިންޖަރު މަތިންދާ ބޯޓެއް އަސްކަރީ ހެލިކޮޕްޓަރެއްގައި ޖެހި މުޑިއެރުމުގެ ސަބަބުން 18 މީހަކު މަރުވެއްޖެއެވެ.
މިހާދިސާ ހިނގާފައިވަނީ އިއްޔެ ވޮޝިންޓަންގެ ގަޑިން ހަވީރު ހަތަރުގަޑިބައި، އެހާ ކަންހާއިރުއެވެ. ހާދިސާ ހިނގީ ވޮޝިންޓަންގައި އޮންނަ ރޮނަލްޑް ރޭގަން އެއާޕޯޓާ ވަރަށް ކައިރީގައި އޮންނަ ޕޮޓޮމަކް ކޯރުގެ މަތީގައި، ވައިގެ ތެރޭގައެވެ.
ސީބީއެސް ނެޓްވޯކް ބުނާގޮތުން އަސްކަރީ ހެލިކޮޕްޓަރު ޖެހުނީ ކެންސަސްއިން ފުރައިގެން ރޮނަލްޑް ރޭގަން އެއާޕޯޓަށް ޖައްސަން އުޅުނު އެމެރިކަން އެއާލައިންސްގެ ބޯޓެއްގައެވެ. އެބޯޓުގައި 60 ފަސިންޖަރުންނާއި ހަތަރު ފަޅުވެރިން ތިއްބެވެ. މި ހާދިސާގައި އެބޯޓާއި އެމެރިކާ ސިފައިންގެ އަސްކަރީ ހެލިކޮޕްޓަރުވެސް ވެއްޓުނީ ޕޮޓޮމަކް ކޯރަށެވެ. ކޯރުގެ ތެރެއިން މިހާތަނަށް ފެނިފައިވަނީ 18 މީހެއްގެ ހަށިތަކެވެ. އެހެން މީހުން އަދި ފެނިފައެއްނުވެއެވެ.
ބޯޓާއި ހެލިކޮޕްޓަރު ވެއްޓުނު ކޯރު --
މިހާދިސާއާއެކު މުޅި ސަރަހައްދަށް ޖެޓް ފިއުލް ލީކުވުމުން އެ ސަރަހައްދުގައި ވަނީ އަލިފާންގަނޑެއް ފެތުރިފައެވެ. މިރިލެންޑްގެ ގަވަރުނަރު ވިދާޅުވިގޮތުގައި ޕޮޓޮމަކް ކޯރަކީ ވަރަށް ފުން އަދި ވަރަށް ބާރަށް އޮއިދެމޭ ކޯރެކެވެ. އެހެންކަމުން ގެއްލިފައިވާ މީހުން ހޯދުމަށް ފުލުހުންގެ ޑައިވަރުންގެ އިތުރުން އެމެރިކާ ސިފައިންގެ ޑައިވަރުންވެސް މިހާރުވަނީ މީހުން ހޯދުމުގެ އޮޕަރޭޝަން ފަށާފައެވެ. އެކްސިޑެންޓްވީ އަސްކަރީ ހެލިކޮޕްޓަރުގައި ތިބިކަމަށްވަނީ އެމެރިކާ ސިފައިންގެ ތިން މީހެކެވެ. އެ މީހުންވެސް ވަނީ ގެއްލިފައެވެ.
އެމެރިކާގެ ރައީސް ޑޮނަލްޑް ޓްރަމްޕްވަނީ މިއީ ބިރުވެރި ހިތާމަވެރި ހާދިސާއެއްކަމަށް ސިފަކުރައްވާފައެވެ. މީހުން ހޯދުމަށް ހިންގާ އޮޕަރޭޝަންގެ ކަންތައް ވަރަށް ގާތުން ބައްލަވަމުން ގެންދަވާނެކަމަށް ޓްރަމްޕް ވިދާޅުވިއެވެ.
މި ހާދިސާއަށްފަހު ވޮޝިންޓަންގެ ރޮނަލްޑް ރޭގަން އެއާޕޯޓްވަނީ ވަގުތީ ގޮތުން ބަންދުކޮށްފައެވެ. އެއެއާޕޯޓަށް ޖައްސަންޖެހޭ މަތިންދާ ބޯޓުތައް މިހާރުވަނީ ބޮލްޓިމޯ އިންޓަނޭޝަނަލް އެއާޕޯޓަށް ޑައިވާޓްކޮށްފައެވެ.