ފިލްމު "ރާންޖްއަނާ"އިން 2013 ވަނަ އަހަރު ގެނެސްދިން ބޮލީވުޑްގެ ޑައިރެކްޓަރު އާނަންދު އެލް ރާއީގެ އާ ފިލްމުގެ ބަތަލާގެ ރޯލަށް ކްރިތީ ސެނޮން ސޮއިކޮށްފިއެވެ.
އިންޑިއާގެ ލެޖެންޑަރީ މިއުޒިކް ކޮމްޕޯސަ އޭއާރް ރަހްމާން މިއުޒިކް ތައްޔާރު ކުރާ މި ފިލްމުގެ ނަމަކީ "ތެރޭ އިޝްގް މޭ"އެވެ. އާނަންދުގެ އިތުރުން ހިމާންޝޫ ޝަރުމާ އަދި ބޫޝަން ކުމާރު ވެސް ޕްރޮޑިއުސަރުންގެ ގޮތުގައި މަސައްކަތް ކުރާ މި ފިލްމަށް ކްރިތީ ހޮވިކަން އިއުލާނުކޮށް ކްރިތީ ފެންނަ ޓީޒާއެއް ވެސް ވަނީ އާއްމުންނަށް ދައްކާލާފައެވެ.
މި ފިލްމަކީ 2023 ވަނަ އަހަރު އިއުލާނުކޮށްފައިވާ ފިލްމެކެވެ. ވަރަށް އަސަރުގަދަ ލޯބީގެ ވާހަކައެއްގެ މައްޗަށް ބިނާކޮށް އުފައްދާ މި ފިލްމުން ކްރިތީއާ އެކު ލީޑް އެކްޓަރެއްގެ ގޮތުގައި ފެންނާނީ ފިލްމު "ރާންޖްއަނާ"ގެ އެކްޓަރު ދަނޫޝްއެވެ. ދަނޫޝް ވަނީ އާނަންދުއާ އެކު ފިލްމު "އަތުރަންގީ ރޭ"ގައި ވެސް މަސައްކަތް ކޮށްފައެވެ.
ކްރިތީ, ކާޖޮލްއާ އެކު ފިލްމު "ދޯ ޕައްތީ"ގެ މަންޒަރެއްގައި--ފޮޓޯ/ޕިންކްވިލާ
މި އަހަރު ރިލީޒްކުރާނެ އެންމެ އުއްމީދީ ފިލްމުތަކުގެތެރޭ މި ފިލްމު ހިމެނޭއިރު ބެލުންތެރިންނަށް ފިލްމު ގެނެސްދޭނީ މި އަހަރުގެ ނޮވެމްބަރު މަހުގެ 28ގައެވެ. ނެޝަނަލް އެވޯޑު ހޯދާފައިވާ އިންޑިއާގެ ބަތަލާ ކްރިތީ މިދިޔަ އަހަރު ތިން ފިލްމަކުން ފެނުނުއިރު މި ތިން ފިލްމަށް ވެސް ބެލުންތެރިންގެ ބޮޑު މަގުބޫލުކަމެއް ވަނީ ލިބިފައެވެ.
އޭގެތެރޭގައި ފިލްމު "ކްރޫ"، "ތެރީ ބާތޯ މެ އޭސަ އުލްޖާ ޖިޔާ" އަދި ބަތަލާ ކާޖޮލް މުހިއްމު ރޯލްއިން ފެނުނު ނެޓްފްލިކްސް ފިލްމު "ދޯ ޕައްތީ" ހިމެނެއެވެ.