ޔުއޭފާ ޗެމްޕިއަންސް ލީގުގެ ލީގު ފޭސްގެ އެންމެ ފަހު މެޗުގައި ކްލަބް ބްރޫޖް ބަލިކޮށް، މެންޗެސްޓާ ސިޓީން ޕްލޭ އޮފްގެ ޖާގައެއް ކަށަވަރުކޮށްފިއެވެ.
ސިޓީގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ ފަހަތުން އަރައި 3-1 އިންނެވެ.
ފުރަތަމަ ހާފުގައި ސިޓީން ގިނައިރު ބޯޅަ ގެންގުޅުނު ނަމަވެސް މާ ގިނަ ހަމަލާތަކެއް އުފެއްދޭ ގޮތެއް ނުވިއެވެ. ސިޓީއަށް މާ ގިނަ ހަމަލާތަކެއް ނުއުފެއްދުނު ނަމަވެސް ބްރޫޖުގެ ކުޅުންތެރިން ކުރިއަށް އަރާ ކޮންމެ ފަހަރަކު ލަނޑެއް ޖަހާފާނެކަމުގެ ބިރު ބޮޑުވިއެވެ.
ޗެމްޕިއަންސް ލީގުގެ ފަހު 16 ޓީމުގެ ބުރުން ޖާގައެއް ހޯދަން ޕްލޭ އޮފް ޖާގައެއް ކަށަވަރުކުރާނަމަ ސިޓީއަށް މޮޅުވުން މަޖުބޫރު މެޗު އިތުރަށް އުނދަގޫވީ ފުރަތަމަ ހާފުގެ ފަހު މިނެޓުގައި ބްރޫޖުން އުފެއްދި ކައުންޓާ އެޓޭކެއްގައި ލަނޑެއް ކާމިޔާބުކޮށް، މެޗުގެ ލީޑު ނެގުމުންނެވެ. މި ލަނޑު ކާމިޔާބުކޮށްދިނީ ރަފައެލް އޮންޔެޑީކާއެވެ.
ދެވަނަ ހާފުގެ ކުޅުން ފެށިތާ އަށްވަނަ މިނެޓުގައި މެޓިއޯ ކޮވަސިޗް ކާމިޔާބުކޮށްދިން ލަނޑުން ސިޓީން މެޗުގެ ނަތީޖާ ހަމަހަމަކޮށް އުންމީދު އާކުރިއެވެ. މި ލަނޑު ޖެހިތާ ނުވަ މިނެޓު ފަހުން ސިޓީން އުފެއްދި ހަމަލާއެއްގައި ބްރޫޖްގެ ޑިފެންޑަރު ޖޮއެލް އޯޑަނޭޒް އަތުން ބައިކޮޅަށްް ވަން ލަނޑާ އެކު ސިޓީން ފުރަތަމަ ފަހަރަށް މެޗުގެ ލީޑު ނެގިއެވެ.
މެޗުގައި ސިޓީގެ ފަހު ލަނޑު މެޗުގެ 77 ވަނަ މިނެޓުގައި ކާމިޔާބުކޮށްދިނީ ކުޅުންތެރިޔާ ސާވީނިއޯއެވެ.
މި ކާމިޔާބީއާ އެކު ސިޓީން މި ފަހަރުގެ ޗެމްޕިއަންސް ލިގުގެ ލީގު ފޭސް ނިންމާލީ 11 ޕޮއިންޓާ އެކު 22 ވަނައިގައި އޮވެގެންނެވެ. އެހެންކަމުން އެ ޓީމަށް ޕްލޭ އޮފްގެ ޖާގައެއް ވަނީ ކަށަވަރުވެފައެެވެ. ނަމަވެސް، މިހާރު ބެލެވޭގޮތުގައި ޕްލޭ އޮފްގައި ސިޓީއަށް ބައްދަލުކުރަން ޖެހޭނީ އެންމެ ފަހުގެ ޗެމްޕިއަން ރެއާލް މެޑްރިޑު ނުވަތަ ބަޔާން މިޔުނިކާއެވެ.
ޕްލޭ އޮފްގެ ދެ މެދު ކުޅެން މިހާރު ރޭވިފައިވަނީ ފެށޭ ފެބްރުއަރީ މަހުގެ މެދު ތެރޭގައެވެ. މެޗުގައި ސިޓީ އަތުން ބްރޫޖް ބަލިވުމާ އެކު ވެސް އެ ޓީމަށް ވެސް ވަނީ ޕްލޭ އޮފްގެ ޖާގައެއް ލިބިފައެވެ. ބްރޫޖް ދިޔައީ 11 ޕޮއިންޓާ އެކު 24 ވަނައަށެވެ.
މި މުބާރާތުގައި ޑީނަމޯ ޒަގްރެބާއި އޭސީ މިލާން ބައްދަލުކުރި މެޗުން މިލާން ބަލިވުމުން އެ ޓީމަށްވަނީ ފަހު 16 ޓީމުގެ ބުރުން ސީދާ ޖާގައެއް ހޯދުމަށް އޮތް ފުރުސަތު ގެއްލިފައެވެ. ޒަގްރެބްގެ ދަނޑުގައި ކުޅުނު މި މެޗު އެ ޓީމުން ކާމިޔާބުކޮށްފައިވަނީ 2-1 އިންނެވެ.
ޕްލޭ އޮފްގެ ޖާގައެއް ހޯދުމަށް ކުޑަ ވެސް އުންމީދެއް އޮތީ މި މެޗު ކާމިޔާބުކޮށްގެންކަމުން ޒަގްރެބުން މެޗުގައި ރަނގަޅު ކުޅުމެއް ދައްކާފައިވެއެވެ. އެ ޓީމުގެ ދެ ލަނޑު ކާމިޔާބުކޮށްދިނީ މާޓިން ބަޓުރީނާއާއި މާކޯ ޕިޔާސާއެވެ. މިލާންގެ ހަމައެކަނި ލަނޑު ކާމިޔާބުކޮށްދިނީ ކްރިސްޓިއަން ޕުލިސިޗެވެ. މެޗުގެ ފުރަތަމަ ހާފުގައި މިލާންގެ ޔޫނުސް މޫސާއަށް ވަނީ ދެވަނަ ރީނދޫ ކާޑާ އެކު ރަތް ކާޑެއް ދައްކާފައެވެ.
މި ކާމިޔާބީއާ އެކު ވެސް ޑީނަމޯ ޒަގްރެބަށް ވަނީ ޕްލޭ އޮފްގެ ޖާގައެއް ލިބޭގޮތް ނުވެފައެވެ. ޒަގްރެބް ލީގު ފޭސް ނިންމާލީ 11 ޕޮއިންޓާ އެކު 25 ވަނައިގައި އޮވެގެންނެވެ. ޕްލޭ އޮފްގެ ޖާގަ ގެއްލުނީ ފައިދާ ގޯލަށް ބަލައިގެންނެވެ. މިލާން ލީގު ފޭސް ނިންމާލީ 15 ޕޮއިންޓާ އެކު 13 ވަނައިގައި އޮވެގެންނެވެ.