ވޮޝިންޓަން (29 ޖަނަވަރީ 2025): ދުނިޔޭގެ މުއްސަނދި އަދި އެންމެ ބާރާއި ނުފޫޒު ގަދަ ގައުމުގެ ގޮތުގައި އޮންނަންޖެހޭނީ އެމެރިކާ ކަމަށާއި މިކަން މިނޫންގޮތަކަށް ވެގެންނުވާނެކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ހައިޓެކްގެ އުފެއްދުންތައް ޗައިނާ، އިންޑިއާ އަދި ބްރަޒީލް ފަދަ ބްރިކްސްގެ ގައުމުތަކުގައި އުފައްދައި އެތަކެތި އެމެރިކާއަށް އެކްސްޕޯޓް ކުރާ މައްސަލައިގައި އެގައުމުތަކަށް އިންޒާރު ދެއްވަމުން ޓްރަމްޕް ވިދާޅުވީ މިގޮތަށް ކަންތައްވާނަަމަ ލަސްތަކެއްނުވެ އެމެރިކާގެ ބާރާއި ނުފޫޒު ކުޑަވެ އެމެރިކާއަށް ވުރެ އެހެން ގައުމުތައް މުއްސަނދި ވެދާނެކަމަށާއި މިއީ އެކަން ވާންޖެހޭ ގޮތްނޫންކަމުގައެވެ.
މިމައްސަލައިގައި ނުރުހުން ފާޅުކުރައްވައި ޓްރަމްޕް ވިދާޅުވީ ޗައިނާ، އިންޑިއާ އަދި ބްރެޒިލް ފަދަ ބްރިކްސްގެ ގައުމުތަކަކީ އެމެރިކާ އިސްކޮށް ބާއްވައިގެން އެމެރިކާގެ ފަހަތުން މަސައްކަތްކުރަން ބޭނުންވާ ގައުމުތައް ނޫންކަމުން އެއީ އެމެރިކާއަށް ހެޔޮއެދޭ ގައުމުތަަކެއް ނޫން ކަމުގައެވެ.
އެމެރިކާއަށް ދޫދީ އެމެރިކާ އެދޭގޮތަށް އެގައުމުތަކުން މުއާމަލާތް ނުކޮށްފިނަމަ އެގައުތަކަށް އެކިވަރުގެ އަދަބުތައް ދެވޭނެކަމަށް ޓްރަމްޕް ވިދާޅުވިއެވެ. އެއަދަބުތައް ދޭނީ އެގައުމުތަކުން އެމެރިކާއަށް އެކްސްޕޯޓްކުރާ މުދަލުން ޑިއުޓީއާއި ޓެކްސްތައް އިންތިހާއަށް ބޮޑުކޮށްގެން ކަމަށްވެސް ޓްރަމްޕް ވިދާޅުވިއެވެ.
ހައިޓެކްގެ އުފެއްދުންތައްކަމަށްވާ މައިކްރޯޗިޕްތަކާއި ސެމީކޮންޑަކްޓާސްގެ އެކި ވައްތަރުތައްފަދަ ހައިޓެކް އުފެއްދުންތަކާއި ހޮސްޕިޓަލްތަކަށް ބޭނުންވާ ޒަމާނީ މެޝިނަރީ އާއި މަދަނީ މަތިންދާބޯޓުގެ ސްޕެއާ އާއި އައިޓީއާއި އިންޓަނެޓްގެ ބާވަތްތަކާއި އޭއައިގެ އެޕްތައް ފަދަ އުފެއްދުންތައް އެގައުމުތަކުން އުފައްދައި އެމެރިކާއަށް އެކްސްޕޯޓްކުރާނަމަ އެތަކެތި އުފައްދާ ކުންފުނިތައް މާލީ ގޮތުން އިނދަޖައްސާލެވޭ ވަރުގެ ބޮޑެތި ޓެކްސްތައް އެތަކެތިން ނަގާނެކަމަށް ޓްރަމްޕް ވިދާޅުވިއެވެ. މިހެންވެއްޖެނަމަ އެމެރިކާގެ ބާޒާރަށް އެތަކެތި ނުވިކޭވަރަށް އެތަކެތީގެ އަގުތައް ބޮޑު ކޮށްލެވޭނެ ކަމަށް ޓްރަމްޕް ވިދާޅުވިއެވެ.
މިކަމުގެ ބޭނުމަކީ މިބާވަތުގެ ހައިޓެކް އުފެއްދުންތައް އުފައްދާ ކުންފުނިތައް ޗައިނާ، އިންޑިއާ އަދި ބްރަޒިލްފަދަ ގައުމުތައް ދޫކޮށް އެމެރިކާއަށް ގެނެވޭތޯ ބެލުން ކަމަށް ޓްރަމްޕް ވިދާޅުވިއެވެ.
ޓްރަމްޕްގެ މިވާހަކަތަކަކީ އެމެރިކާ ޒަމާނުއްސުރެ ޕްރޮމޯޓްކުރަމުން ގެންދާ މިނިވަން ވިޔަފާރީގެ އުސޫލުތައް ފުނޑާލުންކަމަށާއި މިކަމުން ދޭހަވަނީ ޗައިނާ، އިންޑިއާ އަދި ބްރަޒިލްފަދަ ގައުމުތަކާ ވާދަކުރަން އެމެރިކާ ނުކުޅެދޭ މިންވަރުކަމަށް އިގްތިސާދީ ތަޖުރިބާކާރުން ވިދާޅުވެއެވެ.
ޓްރަމްޕް ވިދާޅުވިގޮތުގައި އޭނާގެ ބޭނުމަކީ ޗައިނާ، އިންޑިއާ އަދި ބްރަޒިލްފަދަ ގައުމުތަކުގައި އިންވެސްޓްކޮށްގެން އުޅޭ އެމެރިކާގެ ކުންފުނިތައް އަނބުރައި އެމެރިކާއަށް ގެނައުމެވެ. އަދި އެމެރިކާ މީހުން ލޭބަރުންގެ ގޮތުގައި ބޭނުންކޮށްގެން އެެމެރިކާގައި އެތަކެތި އުފެއްދުމެވެ.
ޗައިނާ، އިންޑިއާ އަދި ބްރަޒިލްފަދަ ގައުމުތަކުންވެސް އެގައުމުތަކުގައި ތަކެތި އުފެއްދުމުގެ ބަދަލުގައި އެތަކެތި އެމެރިކާގައި އުފެއްދުމަށް ކުރެވޭނެ ހުރިހާ ކަމެއްކުރުމެވެ. ދުނިޔޭގެ އެންމެ ބާރުގަދަ އަދި އެންމެ މުއްސަނދި ގައުމުގެ ގޮތުގައި އެމެރިކާއަށް ދެމިއޮވެވޭނީ މިގޮތަށްކަމަށާއި މިގޮތަށް އެމެރިކާއާ މުއާމަލާތްކުރަން އެގައުމުތައް ދަސްކުރަންޖެހޭކަމަށް ޓްރަމްޕް ވިދާޅުވިއެވެ. އެހެންނޫނީ ނަތީޖާ ވަރަށް ގޯސްވާނެއެވެ.
އެމެރިކާގައި ވަޒީފާތައް އިތުރުކުރުމާއި އެމެރިކާގެ ލޭބަރުން ނުވަތަ މަސައްކައްތެރިންގެ ބޭނުން އެހެން ގައުމުތަކުން ހިފަންޖެހޭކަމަށްވެސް ޓްރަމްޕް ވިދާޅުވިއެވެ.
ސެމިކޮންޑަކްޓާސް އާއި މައިކްރޯޗިޕްސް އުފައްދާ ކުންފުނިތައް އެމެރިކާއަށް ގެންނާނީ އެކުންފުނިތަކަށް ފިއްތުންތައް ކުރިމަތިކޮށް ދަތިކުރުމުގެ ފިޔަވަޅުތައް އަޅައިގެން ކަމަށް ޓްރަމްޕް ވިދާޅުވިއެވެ. އެ ކުންފުނިތަކުން އެމެރިކާއަށް އެކްސްޕޯޓް ކުރާ ތަކެއްޗަށް ޓެކްސް އާއި ޓެރިފް ބޮޑުކުރުމުން އެކުންފުނިތަކުގެ މުދައު އެމެރިކާގައި ނުވިކޭނެކަމަށާއި މިއީ އެ ކުންފުނިތައް އެމެރިކާއަށް ގެންނަން ހެދޭނެ އެންމެ މޮޅު އުކުޅު ކަމަށް ދެކެވަޑައިގަންނަވާ ކަމަށް ޓްރަމްޕް ވިދާޅުވިއެވެ.
އެމެރިކާގައި ލޭބަރުންނާއި ރޯ މެޓީރިއަލްތަކުގެ އަގު ބޮޑުކަމުން އެމެރިކާގެ ހައިޓެކް ކުންފުނިތައްވެސް ގިނައިން ތަކެތި އުފައްދަނީ އޭޝިއާއާއި ލެޓިން އެމެރިކާގެ ގައުމުތަކުގައެވެ. ޗައިނާ، އިންޑިއާ އަދި ބްރަޒިލް އަދި ވިއެޓްނާމާއި އިންޑޮނީޝިއާ އަދި މެލޭޝިއާ ފަދަ ގައުމުތަކުގައެވެ.