މަޝްހޫރު ވާހަކަ ލިޔުންތެރިޔާ އަދި ކޮމިކް އާޓިސްޓް ނީލް ގެއިމަން އާ ދެކޮޅަށް ޖިންސީ ގޯނާގެ ގިނަ ތުހުމަތުތަކެއް ކޮށްފިއެވެ.
ފާއިތުވި ބައި ގަރުނެއްގެ ތެރޭގައި ނެރުނު އެންމެ ނުފޫޒު ގަދަ ވާހަކަތަކާއި ކޮމިކް ފޮތްތައް އުފައްދާފައިވާ ގެއިމަން އާ ދެކޮޅަށް ވަނީ ދާދި ފަހުން ގިނަ އަންހެނުންތަކެއް ޖިންސީ ގޯނާގެ ތުހުމަތުތަކެއް ކޮށްފައެވެ.
މިދިޔަ އަހަރުގެ ޖުލައި މަހުގެ ތެރޭގައި އެންމެ ފުރަތަމަ އޭނާ އާ ދެކޮޅަށް ތުހުމަތުތަކެއް ވަނީ ކޮށްފައެވެ. ނަމަވެސް ދާދިފަހުން ވަނީ އިތުރު ތިން އަންހެނަކު އެފަދަ ގިނަ ތުހުމަތުތަކާ އެކު އައިސްފައެވެ. މި މައްސަލަ މިހާރު ފުލުހުން ބަލަމުން ގެންދާއިރު ވަރަށް އަވަހަށް ކޯޓު މަރުހަލާ ފެށުމަށް ރެޑީވާނެކަމަށް ރިޕޯޓުތަކުން ބުނެއެވެ.
މި ތުހުމަތުތަކާ ގުޅިގެން ވަރަށް ގިނަ ދުވަސް ވަންދެއް އެއްވެސް އެއްޗެއް ނުބުނެ އޭނާ ހުއްޓެވެ. ނަމަވެސް ދާދިފަހުން ނެރުނު ބަޔާނެއްގައި އޭނާވަނީ އޭނާއާ ދެކޮޅަށް ކުރާ ތުހުމަތުތައް ދޮގުކޮށްފައެވެ. އަދި އެއްވެސް މީހެއްގެ ހުއްދައާ ނުލައި އެއްވެސް ކަހަލަ ޖިންސީ ގުޅުމެއް ހިންގާފައި ނުވާނެ ކަމަށް ވެސް އޭނާ ވަނީ ބުނެފައެވެ.
"ސޭންޑް މޭން" އާއި "ގުޑް އޮމެންސް" ފަދަ ބޮޑެތި ވާހަކަތައް އުފައްދާފައިވާ ގެއިމަންއަކީ ބޮޑެތި ޕަބްލިޝިން ކުންފުނިތަކާއެކު އެއްބަސްވުން އޮންނަ މީހެކެވެ.
އެގޮތުން އެމެރިކާގެ ޕަބްލިޝިން ކުންފުންޏެއް ކަމަށްވާ "ޑާކް ހޯސް"އިން ވަނީ ދާދިފަހުން އޭނާ އާއެކު އޮތް އެއްބަސްވުން އުވާލާފައެވެ. އަދި އޭގެ އިތުރުން އެހެން ކުންފުނިތަކުން މިކަމާ ގުޅޭގޮތުން ވަކި އެއްޗެއް އަދި ބުނެފައެއް ނުވެއެވެ.