ކޮންމެ މީހަކަށް ވެސް ދެއްވާފައިވާ ބުއްދީގެ ބޭނުން ހިފައިގެން، ކަންކަމާމެދު ގޮތް ނިންމަންވާނީ ކޮންމެ މީހަކު ވެސް އަމިއްލައަށް ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
އެ މަނިކުފާނު މިހެން ވިދާޅުވީ ހއ. ދިއްދޫގެ ރައްޔިތުންނާ ބައްދަލު ކުރެއްވުމަށް މިރޭ އެ ރަށުގައި ބޭއްވި ޖަލްސާގައެވެ.
ރައީސްގެ ވާހަކަފުޅުގައިވަނީ ކަންކަން ނިންމުމުގައްޔާއި ގަބޫލު ކުރުމުގެ ކުރިން ރަނގަޅަށް ކަމުގެ ހަގީގަތް ބެލުމުގެ މުހިންމުކަމުގެ މައްޗަށް އަލިއަޅުއްވާ ލައްވައިފައެވެ. ސިޔާސީ ގޮތުން ޚިޔާލު ތަފާތަސް، ކޮންމެ މީހަކީ ވެސް މުސްލިމެއްކަން ފާހަގަ ކުރައްވައި، ބުއްދީގެ ބޭނުން ހެޔޮ ގޮތުގައި ނުހިފާނަމަ، އެ ކަމާމެދު ކޮންމެ މީހަކާ މަހުޝަރު ދުވަހުން ސުވާލު ވެވޭނެކަން ރައީސް ހަނދާންކޮށްދެއްވިއެވެ.
"ތިމަންނައަށް ދެއްވާފައިވާ ބުއްދީގެ ބޭނުން ހިފައިގެން، ކަންކަމާމެދު ނިންމާނެ ގޮތް ވިސްނަންޖެހޭނީ ތިމަންނަކަން. އެހެން މީހަކު ނޫންކަން ތިމަންނައަށް ވިސްނައިދޭން ޖެހޭނީ، އެބަޖެހޭ ގަބޫލުކުރަން. ހަމަ މީހަކު ބުނާހާ އެއްޗެއް އެއީ ތިމަންނާ ގަބޫލު ކުރާ އެއްޗަކަށް ވާކަށް ނުވާނެކަން ވަރަށް ސާފުކޮށް އެބަ އޮތް ދީނުގައި،" ރައީސް ވިދާޅުވިއެވެ.
ރައީސް ވިދާޅުވި ގޮތުގައި ވަށައިޖެހޭ ތަރައްގީއަށް ގައުމަށް ގެނެވޭނީ ރައްޔިތުންނަކީ ރަނގަޅަށް ވިސްނާ ބަޔަކަށް ވެގެންނެވެ. ގެނެވޭ އުމްރާނީ ތަރައްގީއާއެކު ރައްޔިތުންގެ ވިސްނުން ތަރައްގީވާން ޖެހޭނެކަން ރައީސް ފާހަގަ ކުރެއްވިއެވެ. ސިކުނޑިތައް ތަރައްގީ ނުވާނަމަ، އުމްރާނީ ތަރައްގީގެ މާނައެއް ނެތް ކަމަށް ރައީސް ވިދާޅުވިއެވެ.
ރައީސްގެ ވާހަކަފުޅު ނިންމަވައިލައްވަމުންވަނީ ދިވެހީންނަކީ އިސްލާމުން ކަމަށްވީތީ، އެ ކަމުގެ ޒިންމާ ވެސް ހަނދާންކޮށް، ގައުމީ ވިސްނުމެއް އިސްކުރެއްވުމަށް އެދިވަޑައިގެންފައެވެ. އެ ގޮތުން އެންމެން އެއްބައިވެގެން، ގައުމާއިގެން ކުރިޔަށް ދިއުމަށް ރައީސް ގޮވައިލެއްވިއެވެ.
އެ މަނިކުފާނު އެ މޭރުމުން ވާހަކަ ދެއްކެވިއިރު، ރައީސްގެ އެންމެ އަރިސް އެއް ބޭފުޅާގެ ގޮތުގައި ހުންނެވި، ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲއާ ގުޅުން ގޯސްވެފައިވާ ކަމުގެ އަޑުތައް ވަނީ ގަދަވެފައެވެ. އަބްދުއްރަހީމްގެ ދަރިކަލުން، އިބްރާހީމް ފައިސަލް ޓޫރިޒަމް މިނިސްޓަރުކަމުން މިއަދު ވަކިކުރުމާއެކު އެ ވާހަކަތަކަށް ވަނީ އިތުރަށް ބާރު ލިބިފައެވެ.
ފައިސަލް މަގާމުން ވަކިކުރި ފަހުން "ސަން"އާ ވާހަކަ ދައްކަވަމުން ވަނީ، ސިޔާސީ މަސައްކަތްތަކުން މާ ގަދަކޮށް ފެންނާނެކަމަށާއި ދެން ކުރިއަށްދާނެ ވަކި ގޮތެއް ނިންމަވާނީ ބައްޕާފުޅު އަބްދުއްރަހީމާ ވެސް މަަޝްވަރާކުރެއްވުމަށް ފަހުގައި ކަމަށް ވިދާޅުވެފައެވެ.
ފައިސަލް މަގާމުން ވަކިކުރެއްވިއިރު މެލޭޝިއާގައި ހުންނެވި އަބްދުއްރަހީމް ވަނީ މިރޭ އެނބުރި ރާއްޖެ ވަޑައިގެންފައެވެ. އެ މަނިކުފާނާ ވެލާނާ އިންޓަނޭޝަނަލް އެއާޕޯޓުން ނޫސްވެރިން ބައްދަލުކުރަން މަސައްކަތް ކުރި ނަމަވެސް އެ މަނިކުފާނު ވަނީ ބޯޓުން ފައިބައިވަޑައިގެންނެވި ގޮތަށް ކާރުކޮޅަށް އަރައިވަޑައިގެންފައެވެ.