މެޓާގެ އޭއައި ޗެޓްބޮޓަށް މެމޮރީ ފީޗާއެއް އިތުރުކޮށް އަމިއްލަ މައުލޫމާތު ރައްކާކުރެވޭ ގޮތް ތަޢާރަފުކޮށްފިއެވެ. މި ފީޗާ މެދުވެރިކޮށް އޭއައި ޗެޓްބޮޓުގައި ޔޫޒަރުންގެ ބައެއް މައުލޫމާތު ރައްކާކުރެވޭނެއެވެ.
މެޓާގެ ބްލޮގް ޕޯސްޓެއްގައި ބުނެފައިވާ ގޮތުން މި ފީޗާ މެދުވެރިކޮށް އޭއައިއަށް މަޢުލޫމާތު ރައްކާކުރެވޭނީ ވަކިވަކި ޗެޓްތަކުގައެވެ. އަދި މިގޮތަށް މަޢުލޫމާތު ރައްކާކުރެވޭނީ އޭއައިއަށް ވަކިން އެންގުމުން ނުވަތަ މުޢާމަލާތުގެ ތެރޭގައި އޮޓޮމެޓިކުންނެވެ.
މިސާލަކަށް ނާސްތާގެ ޚިޔާލަކަށް އެދުމުން އޭ.އައި އިން އޮމްލެޓް ހުށަހަޅައިފިނަމަ، ޔޫޒާއަކީ ވެޖިޓޭރިއަނެއްކަން އަންގައިފިނަމަ، އޭ.އައި އިން އެ މަޢުލޫމާތު ރައްކާކޮށް، ދެން އެފަދަ ހުށަހެޅުމެއް ހުށަހަޅާނީ ވެޖިޓޭރިއަނުންނަށް އެކަށީގެންވާ ކާނާއެވެ.
ސްޓޯރޭޖް ފީޗާގެއިތުރުން މެޓާއިން މިވަނީ އަމިއްލަ ހުށަހެޅުންތަކުގެ ފީޗަރއެއްވެސް އިތުރުކޮށޤފައެވެ. މި ފީޗާ މެދުވެރިކޮށް އޭއައިއިން ފޭސްބުކް އަދި އިންސްޓަގްރާމްގެ ޕްރޮފައިލްތަކުންނާއި، ރީލްސް ބެލުމާއި ޕޯސްޓްތަކަށް ލައިކް ދީ އަދި ކޮމެންޓް ކުރުން ފަދަ ހަރަކާތްތަކުން މަޢުލޫމާތު އެއްކުރާނެއެވެ.
މިހާރު މި ދެ ފީޗާ ވެސް ތަޢާރަފުކޮށްފައިވަނީ އެމެރިކާ އަދި ކެނެޑާގައި ބޭނުންކުރުމަށެވެ. މެމޮރީ ފީޗާ ލިބެން ހުންނާނީ ފޭސްބުކް، މެސެންޖާ އަދި ވަޓްސްއެޕްގެ އައިއޯއެސް އަދި އެންޑްރޮއިޑް ވާޝަންތަކުގައެވެ. އަދި އަމިއްލަ ހުށަހެޅުންތަކުގެ ފީޗާ ބޭނުންކުރެވޭނީ ފޭސްބުކް، މެސެންޖާ އަދި އިންސްޓަގްރާމްގައެވެ.
އެހެންނަމަވެސް މި ފީޗާތަކާ ގުޅިގެން މަޢުލޫމާތު ރައްކާކުރުމުގައި ގެންގުޅޭނެ މިންގަނޑުތަކާއި، ސެންސިޓިވް މަޢުލޫމާތު ރައްކާކުރެވޭނެ ގޮތާ ގުޅޭ އިތުރު މަޢުލޫމާތެއް މެޓާއިން ހާމަކޮށްފައެއް ނުވެއެވެ.
އަދި މި ފީޗާތަކުގައި މަޢުލޫމާތު ހިއްސާކުރުމުގައި ޔޫޒަރުންނަށް ޗޮއިސްއެއް އޮންނާނެކަމާމެދު ވެސް އެއްވެސް ވާހަކައެއް ދައްކާފައެއް ނުވެއެވެ.