ރ. އަތޮޅުގައި ހިންގާ ރިޒޯޓެއްގެ މުވައްޒަފަކު ސްނޯކްލިންއަށް ގޮސް އުޅެނިކޮށް ގެއްލިއްޖެއެވެ.
ފުލުހުން މީޑިއާތަކާ ހިއްސާކުރި މެސެޖެއްގައި ބުނީ، ރިޒޯޓެއްގެ މުވައްޒަފަކު މޫދަށް އެރި އުޅެނިކޮށް އިއްޔެ 15:35ހާއިރު ގެއްލިފައިވާ މައްސަލައެއް، އިއްޔެ 16:09ހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
ފުލުހުން ބުނީ ގެއްލިގެން ހޯދަމުން ދަނީ އިންޑިއާއަށް ނިސްބަތްވާ, 25 އަހަރުގެ އާފްތާބު ޚާން ކިޔާ ފިރިހެނެއް ކަމަށެވެ.
އެ މީހާ ހޯދުމުގެ މަސައްކަތް އެމްއެންޑީއެފުން ކުރަމުން އަންނައިރު، އޭނާ ގެއްލުނު މައްސަލަ ފުލުހުން ތަހުގީގު ކުރަމުން އަންނަ ކަމަށް ބުންޏެވެ.
މި ހާދިސާ ދިމާވެފައި ވަނީ، ރާއްޖޭގެ އެކި ސަރަހައްދުތަކަށް މޫސުން ގޯސްވެފައިވާ ދަނޑިވަޅެއްގައެވެ. އެގޮތުން އިއްޔެ 10:30 އާއި 16:30އާ ދެމެދު، ރ. އަތޮޅު ހިމެނޭ ގޮތަށް ބޮޑު ސަރަހައްދަކަށް، މޫސުމާ ބެހޭ ގައުމީ އިދާރާއިން ވަނީ ހުދު ސަމާލު ނެރެފައެވެ. އެ ވަގުތުތަކުގައި ބޯކޮށް ވާރޭވެހި، ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށް އެ އޮފީހުން އޮތީ ލަފާކޮށްފައެވެ.