ދިވެހި ބަސް ނޭނގޭ އުމުރުން 19 އަހަރުގެ ދިވެއްސަކު ކޯޓުގައި ތަރުޖަމާނެއްގެ އެހީ ހޯދައިފިއެވެ.
އެއީ ނ. ލަންދޫއަށް އުފަން އަފްލާހް އަސްލަމް ނަމަކަށް ކިޔާ ޒުވާނެކެވެ. މަކަރާއި ހީލަތް ހެދުމުގެ ތުހުމަތުގައި އޭނާ ފުރަތަމަ ހައްޔަރު ކުރީ، މިމަހުގެ 13ވަނަ ދުވަހުއެވެ. އޭރު އޭނާގެ ބަންދަށް ހަތް ދުވަސް ޖެހުމަށްފަހު އެ މުއްދަތު ހަމަވުމުން އިއްޔެ ވަނީ ބަންދަށް 15ދުވަސް އިތުރު ކޮށްފައެވެ.
އޭނާއަށް ދިވެހިބަސް ރަނގަޅަށް ފަހުމް ނުވާތީ އަޑުއެހުން ކުރިއަށްހެން ގެންދިޔައީ ތަރުޖަމާނެއްގެ އެހީގައެވެ.
ކޯޓު އަމުރުގައި ވާގޮތުން މި މައްސަލައިގައި ލައްކައަކަށް ވުރެ ގިނަ ފައިސާ މަކަރާއި ހީލަތުން ނަގާފައިވާއިރު، އޭގެތެރެއިން ގިނަ ފައިސާ މީނާގެ އެކައުންޓަށް ޖަމާކޮށްފައިވެއެވެ. އަދި އޭގެފަހުން އިތުރު މީހުންނަށް އެ ފައިސާ ޓްރާންސްފާ ކޮށްފައިވާކަމަށާއި އެމީހުން ފައިސާ ނަގައިދީފައި ވަނީ މީނާ ބުނެގެން ކަމަށް ބަޔާންދީފައި ވާކަމަށް ވެސް ކޯޓު އަމުރުގައި އައިއޯ ފާހަގަކޮށްފައި ވެއެވެ.
އައިއޯ ފާހަގަކޮށްފައިވާ ގޮތުގައި މި މައްސަލައިގައި ތުހުމަތު ކުރެވޭ އިތުރު ފަރާތެއްގެ އަތުން މީނާގެ ކޭޝް ކާޑު ވަނީ ފެނިފައެވެ.
ތުހުމަތުތަކަށް ރައްދުދީ އޭނާ ބުނެފައި ވަނީ، މިކަމުގައި ހިމެނޭ މީހުންނަކީ އޭނާ ދަންނަ މީހުން ނޫންކަމަށާއި އެކަން ކުރުވީ އޭނާއަށް ބިރުދައްކައިގެން ކަމަށެވެ.