އަންނަ ފެބްރުއަރީ މަހުގެ 14ވަނަ ދުވަހު ޕްރިމިއާކުރަން ތައްޔާރަށް އޮތް ފިލްމު "ދޫމް ދާމް"ގެ ޓްރެއިލާ ދައްކާލައިފިއެވެ.
ބަތަލާ ޔާމީ ގޯތަމް އަދި ޕްރަތީކް ގާނދީ ލީޑް ރޯލުން ފެންނަ މި ފިލްމަކީ ރޮމޭންޓިކް ކޮމެޑީއެކެވެ. ރިޝަބް ސެތު ޑައިރެކްޓްކޮށް އަދިތިޔަ ދަރު އަދި ލޮކޭޝް ދަރު ޕްރޮޑިއުސްކުރާ މި ފިލްމަކީ އަލަތު ދަރިފުޅު ލިބުނުތާ އަހަރެއްހާ ދުވަސް ފަހުން، ޔާމީ މަސައްކަތް ކުރާ ފުރަތަމަ ފިލްމެވެ.
އަންނަ މަހު ގިނަ ބަޔަކު ފާހަގަކުރާ ލޯބިވެރިންގެ ދުވަހާ ގުޅުވައިގެން ޕްރީމިއާކުރަން ހަމަޖެހިފައިވާ "ދޫމް ދާމް"ގައި ޔާމީ ކުޅެފައިވާ ރޯލަކީ މި ޖީލުގެ ވަރަށް ގިނަ ޒުވާން އަންހެން ކުދިންގެ ދިރިއުޅުމާ ގުޅުން ހުންނާނެ ކަހަލަ ގޮތަކަށް ފަރުމާ ކުރެވިފައިވާ ކެރެކްޓާއެއް ކަމަށް ބަތަލާ ވަނީ ބުނެފައެވެ.
ޔާމީ އަދި ޕްރަތީކް ގާނދީ ފިލްމު "ދޫމް ދާމް"ގެ ޓްރެއިލާގެ މަންޒަރެއްގައި--ފޮޓޯ/ބޮލީވުޑްހަންގާމާ
މި ފިލްމުގެ ވާހަކަ ބިނާކުރިގޮތާ ބެހޭގޮތުން ޑައިރެކްޓަރު ރިޝަބް ސެތު ބުނީ، މިއީ ހަމައެކަނި ލޯބީގެ ވާހަކައެއް ނޫން ކަމަށާއި ފިލްމުގައި ދެވޭ މުހިއްމު މެސެޖަކީ ގޮންޖެހުންތަކާ އެކު ވެސް ދެ މީހަކު ލޯބީގެ ގުޅުން ދަމަހައްޓަން ކުރާ މަސައްކަތް ކަމަށެވެ.
ނެޓްފްލިކްސްގައި މި ފިލްމު ޕްރީމިއާ ކުރަން ހަމަޖެހިފައިވާއިރު މިއީ އެކްޓަރު ޕްރަތީކް ގާނދީއާ އެކު ޔާމީ މަސައްކަތް ކުރާ ފުރަތަމަ ފިލްމެވެ.
ފިލްމު ޑައިރެކްޓަރު އަދިތިޔަ ދަރުގެ އަންހެނުން ޔާމީ އެންމެ ފަހުން ބެލުންތެރިންނަށް ފެނިފައި ވަނީ މިދިޔަ އަހަރުގެ ފެބްރުއަރީ މަހު ރިލީޒްކުރި ޕޮލިޓިކަލް އެކްޝަން ތުރިލާ "އާޓިކަލް 370"އިންނެވެ.