ޕޮލިސް ކޯޕަރޭޓިވް ސޮސައިޓީ (ޕޮލްކޯ)އިން ފުލުހުންނަށް ޚާއްސަކޮށްގެން ހައުސިން ޔުނިޓުތަކެއް އަޅަން ކުރިއަށްގެންދިޔަ މަޝްރޫއާ ގުޅޭ އޮޑިޓް ރިޕޯޓް ދިރާސާކުރުމަށް ފަހު، ފާހަގަވާ ކޮރަޕްޝަނުގެ މައްސަލަތައް ބަލަން އެންޓި ކޮރަޕްޝަން ކޮމިޝަން (އޭސީސީ)އަށް ހުށަހަޅާނެ ކަމަށް ޕޮލިސް ކޮމިޝަނަރު އަލީ ޝުޖާއު މިއަދު ވިދާޅުވެއްޖެއެވެ.
'ބުލޫސް ހައުސިން މަޝްރޫއޫ'ގެ ނަމުގައި ޕޮލްކޯއާ 2013 ވަނަ އަހަރު ހަވާލުކުރި މަޝްރޫއާ ގުޅޭ ރިޕޯޓެއް އޮޑިޓް އޮފީހުން ނެރުނީ މިދިޔަ ބުރާސްފަތީގައެވެ.
އެ ރިޕޯޓުގައިވަނީ އެ މަޝްރޫއަށް އެއް ބިލިއަނަށް ވުރެ ގިނަ ރުފިޔާ ޚަރަދުވެ، އެ ކުންފުނީގެ ކޮރަޕްޝަނާއި ނާގާބިލުކަމުގެ ސަބަބުން ދައުލަތަށް 354.7 މިލިއަން ރުފިޔާގެ ގެއްލުން ލިބިފައިވާ ކަމަށެވެ.
އެ މައްސަލައިގައި، އޭރު ޕޮލްކޯގެ ބޯޑް އޮފް ޑިރެކްޓަރުންގެ ގޮތުގައިއާއި އިސްވެރިންގެ ގޮތުގައި ތިއްބެވި ބޭފުޅުންނަށް ފިޔަވަޅު އަޅަން އޮޑިޓް ރިޕޯޓުގައި ވަނީ ލަފާދީފައެވެ.
އެ ރިޕޯޓާ ގުޅޭ ގޮތުން ސީޕީ "ސަން"އަށް ވިދާޅުވީ، އޮޑިޓް އޮފީހުން ދީފައިވާ ލަފަޔާ އެއްގޮތަށް ފުލުހުންގެ މުއައްސަސާއިން އަމަލުކުރާނެ ކަމަށާއި އެ ރިޕޯޓް ދިރާސާކުރުމަށް އިކޮނޮމިކް ކްރައިމް އިންވެސްޓިގޭޝަންސް ޔުނިޓާ ހަވާލުކޮށްފައިވާ ކަމަށެވެ.
"ރިޕޯޓް ދިރާސާކުރުމަށް ފަހު ކޮރަޕްޝަނާ ގުޅުންހުރި ކަންކަން ބެލުމަށް އޭސީސީއަށް ހުށަހަޅާނެ،" ސީޕީ ވިދާޅުވިއެވެ.
ޕޮލިސް ފްލެޓްތައް: އޮޑިޓް ރިޕޯޓްގައި ވަނީ ޕޮލްކޯގެ ވެރިންނަށް ފިޔަވަޅު އަޅަން ލަފާދީފައި -- ސަން ފޮޓޯ/ މުހައްމަދު ހައްޔާން
އޮޑިޓް ރިޕޯޓުގައި ދީފައިވާ ލަފާތަކުގެ ތެރޭގައި:
- އެ މައްސަލައިގައި ޝާމިލުވާ އެންމެން ހޯދައި ފިޔަވަޅު އެޅުމަށްޓަކައި އެންޓި ކޮރަޕްޝަން ކޮމިޝަނާއި އެހެނިހެން ތަހުގީގީ އިދާރާތަކަށް ހުށަހެޅުން
- އައިލެންޑް އެކްސްޕާޓާއެކު މި މަޝްރޫއަށް ހެދި އެއްބަސްވުން ބާތިލުކުރިއިރު އެ ކުންފުންޏަށް އިތުރަށް ދޫކުރި ފައިސާ ވީހާ ވެސް އަވަހަކަށް ހޯދުން
- އެ ފައިސާ އަނބުރާ ހޯދަން އައިލެންޑް އެކްސްޕާޓާއި އެންސިސްއާއި ތަނބުރުމާ އަދި ޕޮލްކޯއާ ދެމެދު ވެފައިވާ އެއްބަސްވުމަކީ ދައުލަތަށް ގެއްލުންވާ ގޮތަށް ހަދާފައިވާ އެއްބަސްވުމެއްކަމުން އެ މައްސަލައިގައި ވެސް ފިޔަވަޅު އެޅުން
- މި މަޝްރޫއުގެ މަސައްކަތާ ހަވާލުވެ، މަސައްކަތް ނުނިންމުމުގެ ސަބަބުން އެއްބަސްވުން ބާތިލުކުރަން ޖެހުނު ކުންފުނިތަކާ މެދުގައި ފިޔަވަޅު އަޅަން މާލީ ވުޒާރާއަށް ހުށަހެޅުން
- ދައުލަތުން ކުރިއަށް ގެންދާ އިމާރާތްކުރުމުގެ މަޝްރޫއުތަކުގައި އެ މަސައްކަތްތައް އިއުލާނުކުރާއިރު އެ މަސައްކަތާ ގުޅުވައި ރާއްޖެ އެތެރެކުރާ މުދަލުން އިމްޕޯޓު ޑިއުޓީ މާފުކުރާނަމަ، އެކަން ވެސް އިއުލާނުން ސާފުކޮށް އެނގޭ ގޮތް ހެދުން
- ޕޮލްކޯ ފަދަ ކޯޕަރޭޓިވް ސޮސައިޓީތަކުގެ ބަދަލުގައި ކަމާ ގުޅުންހުރި މިނިސްޓްރީއެއް މެދުވެރިކޮށް މި ފަދަ މަޝްރޫއުތައް ކުރިއަށް ގެންދިޔުން
ފުލުހުންނަށް ޚާއްސަކޮށްގެން ހުޅުމާލޭގައި ތިން ޓަވަރު އެޅީ ޖުމްލަ 361 ފްލެޓާއި 20 ޕެންޓްހައުސްއާ ވެސް އެކީގައެވެ. ދެހާސް ތޭރައިގައި އަމަލީ މަސައްކަތް ފެށި އެ ފްލެޓުތައް ނިމި، މީހުންނަށް ދިރިއުޅެވޭ ވަރުވީ މިދިޔަ އަހަރު ތެރޭގައެވެ.