އާއިލާއިން ހަމަޖައްސައިގެން ކުރާ ކައިވެނިތައް ނުވަތަ "އެރޭންޖް މެރިޖް"އާމެދު ކުރިން ހިތުގައި ސުވާލުތައް އުފެދުނު ނަމަވެސް މިހާރު ދޭނެ ލަފަ އަކީ އާއިލާއިން އެދޭގޮތަށް އެރޭންޖް މެރިޖް އަކަށް ދިއުމަށް ކަމަށް އެކްޓަރު ޝާހިދު ކަޕޫރު ބުނެފިއެވެ.
ފިލްމު "ދޭވާ"އާ ގުޅޭގޮތުން ކުރިއަށްދިޔަ މީޑިއާ އިންޓަވިއުއެއްގައި ޝާހިދު ބުނީ، 2006ވަނަ އަހަރު ރިލީޒްކުރި ފިލްމު "ވިވާހް"އަކީ އެރޭންޖް މެރިޖްއެއްގެ އެންމެ ފުރިހަމަ ނަމޫނާ ކަމަށާއި އެއީ ހަގީގަތުގައި ޝާހިދުގެ "ޕްރެކްޓިސް ސެޝަން"އެއް ގޮތަށް ސިފަވާ ކަމަށެވެ.
ފިލްމު "ވިވާހް"ގެ ބައެއް މަންޒަރުތައް ނަގަމުންދިޔައިރު އެ މަންޒަރުތަކަށް ޖޯކު ޖެހި ކަމަށާއި އެންމެ ފަހުން ހަގީގީ ދިރިއުޅުމުގައި ވެސް އެ މަންޒަރުތައް ކުޅެން އޭނާއަށް ޖެހުނު ކަމަށް އެކްޓަރު ބުނެފައިވެއެވެ.
ޝާހިދު ކަޕޫރު އަންހެނުން މީރާ ކަޕޫރާ އެކު--ފޮޓޯ/ޓައިމްސްނައު
ބަތަލާ ކަރީނާ ކަޕޫރާ އެކު އަހަރުތަކެއް ވަންދެން ވަރަށް ސީރިއަސް ލޯބީގެ ގުޅުމެއް ބޭއްވުމަށްފަހު އެ ގުޅުން ނިމުމަކަށް އައުމުން ޝާހިދު އެންމެ ފަހުން ނިންމީ އާއިލާއިން އެކްޓަރަށް ތައާރަފުކުރި މީހަކާ ކައިވެނި ކުރުމަށެވެ.
ޝާހިދަށް ވުރެ އުމުރުން 14 އަހަރު ހަގު މީރާ ރާޖް ކަޕޫރާ ޝާހިދު ކައިވެނި ކުރީ 2015ވަނަ އަހަރުއެވެ. ކައިވެންޏަށް ދެ ކު ދިން ލިބިފައިވާއިރު ޝާހިދު ބުނެފައި ވަނީ މިރާއާ ކައިވެނި ކުރަން ނިންމި ނިންމުމަކީ ދިރިއުޅުމުގައި މިހާތަނަށް ނިންމި އެންމެ ރަގަޅު ނިންމުން ކަމަށެވެ.
ޝާހިދުއާ މީރާ ބައްދަލުވިއިރު މީރާގެ އުމުރަކީ އެންމެ 20 އަހަރު ކަމަށާއި މަތީ ތައުލީމު އުނގެނި ހުރި އަންހެން ކުއްޖަކު އެރޭންޖް މެރިޖްގެ ވިސްނުމަށް ތާއީދު ކުރުމުން އެކަމާ ވަރަށް ބޮޑަށް ހައިރާންވި ކަމަށް ޝާހިދު ވަނީ ބުނެފައެވެ.
ޝާހިދު މިހާރު އެރޭންޖް މެރިޖް އެންޑޯސްކުރާ ކަމަށާއި ލޯބީގެ ގޮތުން ގުޅިގެން އުޅުމަށްފަހު ކުރާ ކައިވެންޏާ އޭނާ ދެކޮޅު ނޫން ކަމަށް ވެސް މި އިންޓަވިއުގައި ވަނީ ބުނެފައެވެ. ޝާހިދު ވަރަށް ވަރުގަދަ ރޯލަކުން ފެންނަ އެކްޝަން ތުރިލާ "ދޭވާ" ސިނަމާތަކަށް ގެންނަން ނިންމާފައި ވަނީ މި މަހުގެ 31ގައެވެ.