މިދިޔަ ޑިސެމްބަރު މަހު ވެއްޓުނު ދެކުނު ކޮރެއާގެ މަތިންދާބޯޓު ވެއްޓުނީ ދޫނި ބައިގަނޑެއްގައި ޖެހިގެން ކަމުގެ ހެކި ފެނިފައިވާ ކަމަށް އެ މައްސަލަ ތަހުގީގު ކުރާ ފަރާތްތަކުން ހާމަކޮށްފިއެވެ.
އެ ހާދިސާގައި ބޯޓުގައި ތިބި 179 މީހުން ވަނީ މަރުވެފައެވެ.
ޖެޖޫ އެއާގެ މަތިންދާބޯޓުގެ ދެ އިންޖީނުން ވެސް ދޫނީގެ ފިޔަތަކާއި ލޭ ފެނިފައިވާ ކަމަށާއި އެއީ ހިޖުރަކުރާ ވައްތަރުގެ ދޫންޏެއް ކަމަށްވާ ބައިކަލް ޓީލް ކިޔާ ދޫނީގެ ބައިގަނޑެއް ކަމަށް ވެސް މިއަދު އާންމުކޮށްފައިވާ ތަހުގީގު ރިޕޯޓުގައި ބުނެފައިވެއެވެ.
ބޯޓު ވެއްޓެން މެދުވެރިވީ ދޫނި ބައިގަނޑެއްގައި ޖެހުމުން ކަމަށް މީގެކުރިން ވެސް ވަނީ ލަފާކޮށްފައެވެ.
ބޯޓު ވެއްޓުނު ހާދިސާއާ ގުޅޭ ތަހުގީގުގައި ދެން ބަލާނީ، ރަންވޭ ނިމޭ ހިސާބުގައި ހުރި ގޮނގުރިޓު ބެރިއަރެއްގެ މައްސަލައެވެ. އެ ތަހުގީގުގައި މަތިންދާބޯޓުގެ އިންޖީނު ރޫޅައި ވެސް އިތުރަށް ދިރާސާކުރާނެ ކަމަށް ކަމާ ގުޅުންހުރި އޮފިޝަލުން ވިދާޅުވިއެވެ.
ކަމާބެހޭ ފަރާތްތަކުން ކުރިން ބުނެފައި ވަނީ ހާދިސާ ހިނގުމުގެ ގާތްގަނޑަކަށް ހަތަރު މިނެޓް ކުރިން ބޯޓުގެ ފްލައިޓް ޑޭޓާ އާއި ކޮކްޕިޓް ވޮއިސް ރެކޯޑަރުތައް ހުއްޓިފައިވާ ކަމަށެވެ.
ބޯޓު ވެއްޓުމުގެ ހާދިސާގެ ތަހުގީގުގައި ބައިވެރިވި، އެ ބާވަތުގެ މަތިންދާބޯޓުތައް ދުއްވި ތަޖުރިބާކާރުން ވެސް ވަނީ ރަންވޭގައި ގޮނގުރިޓު ބެރިއަރުތައް ހުރީ ކީއްވެތޯ ސުވާލު އުފައްދާފައެވެ. ބައެއް މީހުން ލަފާކުރާ ގޮތުގައި އެ ތަންތަން ނެތްނަމަ މަރުވި މީހުންގެ އަދަދު މަދުވާނެއެވެ.
އެ ބެރިއަރުތައް ބަހައްޓާފައިވަނީ މަތިންދާބޯޓު ޖެއްސުމަށް އެހީތެރިވެދޭ ނެވިގޭޝަން ސިސްޓަމެއްގެ ގޮތުގައެވެ.
ދެކުނު ކޮރެއާގެ ދަތުރުފަތުރާބެހޭ ވުޒާރާއިން ބުނީ އޭގެ ނެވިގޭޝަން ސިސްޓަމް އެ ގައުމާއި ބޭރު ގައުމުތަކުގެ ވައިގެ ބަނދަރުތަކުން ވެސް ފެންނަ ކަމަށެވެ.
އެ ތަހުގީގު ރިޕޯޓު މިހާރު ވަނީ އ.ދގެ އޭވިއޭޝަން އެޖެންސީއަށާއި އެމެރިކާއާއި ފުރާންސާއި ތައިލެންޑްގެ ކަމާބެހޭ ފަރާތްތަކަށް ހުށަހަޅާފައެވެ.
ބެންކޮކުން ފުރައިގެން މުއާން އިންޓަނޭޝަނަލް އެއާޕޯޓަށް ދަތުރުކުރަމުންދިޔަ އެ ބޯޓު ވެއްޓި އަލިފާން ރޯވީ ޑިސެމްބަރު މަހުގެ 29 ވަނަ ދުވަހެވެ.