ކައުންސިލްތައް މާލީގޮތުން ބާރުވެރިކުރުވުމުގެ ގޮތުން ހަތަރު ފަޅު ރަށެއް، ތިން ކައުންސިލަކާ މިއަދު ހަވާލުކޮށްފިއެވެ.
މި ފަޅު ރަށްތައް ދޫކޮށްފައިވަނީ "މަސްވެރިކަމާއި ދަނޑުވެރިކަމާއި އިގުތިސާދީ ބޭނުންތައް ފިޔަވައި އެ ނޫން ބޭނުންތަކަށް ފަޅު ރަށްރަށް ދޫކުރުމާ ބެހޭ ގަވާއިދު"ގެ ދަށުންނެވެ.
އެގޮތުން، މިއަދު ފަޅު ރަށްތައް ހަވާލުކުރި ކައުންސިލްތަކަކީ:
- ރ. އިނގުރައިދޫ ކައުންސިލް - ހަވާލުކުރި ފަޅު ރަށަކީ ރ. ނެޔޮ
- ދ. އަތޮޅު ކައުންސިލް - ހަވާލުކުރި ފަޅު ރަށްތަކަކީ ދ. މިނިމަސްގަލި އަދި ދ. ފެންފުށި
- ލ. މާވަށު ކައުންސިލް - ހަވާލުކުރި ފަޅު ރަށަކީ ލ. ބޮޑުމާބުޅާލި
ކައުންސިލްތަކަށް ފަޅުރަށްތައް ދޫކުރުމަށް ބޭއްވި ރަސްމިއްޔާތުގެ ތެރެއިން: 4 ފަޅުރަށެއް، 3 ކައުންސިލަކާ ވަނީ ހަވާލުކޮށްފައި -- ސަން ފޮޓޯ/ އަހުމަދު މާނިއު މުހައްމަދު
މިއީ ކައުންސިލްގެ އިޚުތިސާސުން ބޭރުން، ފަޅު ރަށްތައް ކައުންސިލްތަކަށް ދޫކުރެވޭ އެންމެ ފުރަތަމަ ފަހަރެވެ.
މިއަދު ރަށްތައް ކައުންސިލްތަކަށް ދޫކުރުމަށް ބޭއްވި ޚާއްސަ ރަސްމިއްޔާތެއްގައި، އެއްބަސްވުންތަކުގައި ސޮއިކުރައްވާފައިވަނީ ތިން ކައުންސިލްގެ ރައީސުންނެވެ. މި އެއްބަސްވުން ވެފައިވަނީ ކައުންސިލްތަކާއި ފިނޭންސް މިނިސްޓްރީއާ ދެމެދުއެވެ.
ރަސްމިއްޔާތުގައި ވާހަކަދައްކަވަމުން ލޯކަލް ގަވަނަންސް މިނިސްޓަރު އާދަމް ޝަރީފް އުމަރު ވިދާޅުވީ، ވަރަށް ގިނަ ކައުންސިލްތަކެއް ހުރިއިރު މިހާރު ވެސް ފަސް ފަޅު ރަށެއް ހޯދުމަށްޓަކައި ތިން ކައުންސިލަކުން މިނިސްޓްރީއަށް ހުށަހަޅާފައިވާ ކަމަށެވެ.
އެންމެ ފުރަތަމަ އެ މަސައްކަތް ފެށީ ވަރަށް ވެސް ހިތްވަރުގަދަ ތިން ކައުންސިލްކަން ފާހަގަކުރައްވައި މިނިސްޓަރު ވިދާޅުވީ، އިދާރީ ގޮތުން އާ މަސައްކަތަކަށްވުމުން އެކަމުގައި ގޮންޖެހުންތަކެއް ހުންނާނެ ކަމަށެވެ.
ކައުންސިލްތަކަށް ފަޅުރަށްތައް ދޫކުރުމަށް ބޭއްވި ރަސްމިއްޔާތުގެ ތެރެއިން: މިނިސްޓަރު އާދަމް ޝަރީފް ވާހަކަދައްކަވަނީ -- ސަން ފޮޓޯ/ އަހުމަދު މާނިއު މުހައްމަދު
މިނިސްޓަރު އެދިވަޑައިގަތީ، ހަވާލުކުރި ފަޅުރަށްތަކުގެ މަންފާ ރައްޔިތުންނަށް އޭގެ އެންމެ އެދެވޭ ގޮތުގައި ލިބޭނެ ގޮތަކަށް މަސައްކަތްތައް ބައްޓަންކުރުމަށެވެ.
އަޅުގަނޑު ކައުންސިލްތަކަށް ދަންނަވާލަން ބޭނުން ފަޅު ރަށްތައް އޭގެ އެންމެ ފުރިހަމަ ގޮތުގައި އެ ރަށްރަށަށް އަދި އަތޮޅަށް ޚާއްސަވާ ދެ ރަށް އޮތުމާ އެކީ، އަތޮޅުގެ ރައްޔިތުންނަށް އަދި ރަށްރަށަށް ޚާއްސަކޮށް ހޯދި ފަޅު ރަށްތައް އެ ރަށްރަށުގެ މީހުންނަށް އޭގެ އެންމެ ފުރިހަމަ ގޮތުގައި ފައިދާކުރަނިވި ގޮތެއްގައި ކުރިއަށް ގެންދިއުމަށް މަސައްކަތްކޮށްދެއްވުމަކީ ސަރުކާރުގެ ވަރަށް ބޮޑު އިލްތިމާސެއް، ލޯކަލް ގަވަނަންސް މިނިސްޓަރު އާދަމް ޝަރީފް އުމަރު
ލޯކަލް ގަވަނަންސް މިނިސްޓްރީން ބުނި ގޮތުގައި މިއީ ލާމަރުކަޒީ ނިޒާމުގެ ތާރީޚުގައި ދައުލަތުގެ ވަސީލަތްތައް ލާމަރުކަޒުކުރެވި، ކައުންސިލްތައް ބާރުވެރިކުރެވޭ ފުރަތަމަ ފަހަރެވެ. މިއީ، ލާމަރުކަޒީ ނިޒާމު ހަރުދަނާކުރުމަށް ޕްލޭނަކާ އެކު ވަކި ވިސްނުމެއްގައި ކުރެވޭ މަސައްކަތެއް ކަމަށް އެ މިނިސްޓްރީން ބުންޏެވެ.
ކައުންސިލްތަކަށް ފަޅުރަށްތައް ދޫކުރުމަށް ބޭއްވި ރަސްމިއްޔާތުގެ ތެރެއިން: 4 ފަޅުރަށެއް، 3 ކައުންސިލަކާ ވަނީ ހަވާލުކޮށްފައި -- ސަން ފޮޓޯ/ އަހުމަދު މާނިއު މުހައްމަދު
ކައުންސިލްތަކަށް ފަޅު ރަށްތައް ދޫކުރުމުގެ ފުރުސަތު މިހާރު ވެސް އޮތީ ހުޅުވާލައިފައެވެ. ކައުންސިލްތަކުން ރައްޔިތުންނާ އެކު އިސްނަގައި، މި ފުރުސަތުގެ ބޭނުން ހިފުމަށް އަވަސްވުމަކީ ރައީސްގެ އުންމީދެއް ކަމަށް އެ ކައުންސިލް ބުންޏެވެ.
ފާހަގަކޮށްލެވޭ ގޮތުގައި މި ކަމަކީ ރައީސް ޑރ. މުހައްމަދު މުއިއްޒުގެ 100 ދުވަހުގެ ވައުދުތަކުގެ ތެރޭގައި ހިމަނުނު ކަމެކެވެ. އޭރު ގަވާއިދު އިސްލާހުކުރުމަށް ފަހު ފުރުސަތަށް ހުޅުވާލައި، ކައުންސިލްތައް ބާރުވެރިކުރުވުމަށް މަސައްކަތްކުރެވި، މިއަދު ރަށްތަކެއް ހަވާލުކުރިއިރު މިއީ ރާއްޖޭގެ އެންމެ އަގު ބޮޑު އެސެޓްތައް ލާމަރުކަޒުކުރެވި ރައްޔިތުންގެ އަތްމައްޗަށް ދޫކޮށްލެވޭ ފުރަތަމަ ފަހަރެވެ.
ކައުންސިލްތަކަށް ދޫކުރުމަށް 28 ރަށެއް ކަނޑައެޅާފައިވާއިރު އެ ރަށްތަކާމެދު އަމަލުކުރާނެ ގޮތް ކަނޑައަޅައި، އެ ރަށްތަކުގެ މަންފާ ސީދާ ރައްޔިތުންނަށް ވަނީ ޚާއްސަކޮށްފައެވެ.