ބޮލީވުޑްގެ މަޝްހޫރު ބަތަލާ ޝިލްޕާ ޝެޓީ ޗުއްޓީ ހޭދަކޮށްލަން އާއިލާއާ އެކު ރާއްޖެ އަތުވެއްޖެއެވެ.
ޝިލްޕާ ރާއްޖެ އައިސްފައިވަނީ ފިރިމީހާ ރާޖް ކުންދުރާ އަދި ދެ ކުދިންނާ އެކުގައެވެ. ދެމަފިރިން ވެސް ރާއްޖޭގައި ޗުއްޓީ ހޭދަކުރަމުން އަންނަ މަންޒަރު ފެންނަ ވީޑިއޯތަކާއި ފޮޓޯތައް އަމިއްލަ ސޯޝަލް މީޑިއާގައި ޕޯސްޓުކޮށްފައިވާއިރު ރާއްޖެ އައި ދުވަހެއް ހާމަކޮށްފައެއް ނެތެވެ.
ޝިލްޕާގެ އާއިލާއިން ޗުއްޓީ ހޭދަކުރަމުން އަންނަނީ މާލެ ކައިރިން އުތުރު އަތޮޅުގައި އޮންނަ ފަސް ތަރީގެ ރިސޯޓެއް ކަމަށްވާ ޖުމެއިރާ އޮޅަހަލި އައިލެންޑްގައެވެ.
View this post on Instagram
ބޮލީވުޑްގެ 90އިގެ އަހަރުތަކުގައި ގިނަ ފިލްމުތަކުން ފެނުނު ބަތަލާ އެންމެ ފަހުން ރާއްޖެ ޒިޔާރަތްކޮށްފައިވަނީ 2023 ވަނަ އަހަރެވެ. އެ އަހަރު ޝިލްޕާ އާއިލާއާ އެކު ޗުއްޓީ ހޭދަކޮށްފައިވަނީ ކުޑަ ވިލިނގިލި ރިސޯޓުގައެވެ.
ރައީސް ޑރ. މުހައްމަދު މުއިއްޒު މިދިޔަ އަހަރުގެ އޮކްޓޯބަރު މަހު އިންޑިއާއަށް ކުރެއްވި ފުރަމާނަ ދަތުރުފުޅުގައި މުމްބާއީއަށް ވަޑައިގެން ރާއްޖޭގެ ޓޫރިޒަމް ޕްރޮމޯޓު ކުރެއްވުމަށް ބޭއްވި ހަފުލާގައި ވެސް ބަތަލާ ޝިލްޕާ ޝެޓީ ވަނީ ބައިވެރިވެފައެވެ.
ޝިލްޕާ ޝެޓީ ރާއްޖޭގެ ރައީސުލް ޖުމްހޫރިއްޔާގެ ދެކަނބަލުންނާ އެކު--ފޮޓޯ/ޕިންކްވިލާ
މި ހަފުލާގައި މީޑިއާއަށް ދިން އިންޓަވިއުއެއްގައި ޝިލްޕާ ބުނެފައިވަނީ ރާއްޖެއަކީ ޗުއްޓީ ހޭދަކުރަން އޭނާ ދަތުރުކުރަން ބޭނުންވާ، އޭނާއަށް އެންމެ ކަމުދާ މަންޒިލު ކަމަށެވެ. ޝިލްޕާ އޭރު ބުނެފައިވަނީ ކޮންމެ އަހަރަކު އެއްފަހަރު ރާއްޖެއަށް ޗުއްޓީ ހޭދަކުރަން އަންނަ ކަމަށާއި ހަމައެކަނި ރާއްޖެއަށް ނާދެވުނީ މިދިޔަ އަހަރު އެކަނި ކަމަށެވެ.
އެހެންނަމަވެސް، ވަރަށް އަވަހަށް ރާއްޖެއަށް ޒިޔާރަތްކުރަން ރާވާފައިވާ ކަމަށް ބަތަލާ އޭރު ވަނީ ބުނެފައެވެ.
ޗުއްޓީ ހޭދަކޮށްލަން ޝިލްޕާ އާއިލާއާ އެކު ރާއްޖެ އައިސްފައިވަނީ އާ އަހަރުގެ ޗުއްޓީ އިނގިރޭސިވިލާތުގެ ލަންޑަންގައި ހޭދަކޮށްލުމަށް ފަހެވެ.