ލުބުނާނު ހަނގުރާމަ ހުއްޓާލުމުގެ އެއްބަސްވުން އަންނަ ފެބްރުއަރީ މަހުގެ 18ވަނަ ދުވަހުގެ ނިޔަލަށް އިތުރުކޮށްފިއެވެ.
އެ އެއްބަސްވުމުގެ މުއްދަތު ހަމަވެފައި ވަނީ އިއްޔެއެވެ.
އާދިއްތަ ދުވަހު ވައިޓް ހައުސްއިން ނެރުނު ބަޔާނެއްގައި ވަނީ، 2023ވަނަ އަހަރުގެ އޮކްޓޯބަރު ހަތްވަނަ ދުވަހުގެ ފަހުން ހައްޔަރުކޮށްފައިވާ ލުބްނާނު އަސީރުން ދޫކޮށްލުމުގެ މަޝްވަރާތައް އިޒްރޭލު ސަރުކާރާއި، ލުބްނާނުގެ ސަރުކާރު އަދި އެމެރިކާއިން ކުރާނެ ކަމަށެވެ.
އާދީއްތަ ދުވަހު ލުބުނާނުގެ ސިއްޙަތާބެހޭ ވުޒާރާއިން ބުނީ އެގައުމުގެ ދެކުނުގައި ދިރިއުޅޭ ރައްޔިތުން ގެތަކަށް ދާން މަސައްކަތް ކުރަނިކޮށް 22 މީހުން މަރާލައި 124 މީހަކު ޒަޚަމްކޮށްލާފައިވާ ކަމަށެވެ.
ނޮވެމްބަރު މަހުގެ ފަހުކޮޅު އިއުލާންކުރި ހަނގުރާމަ ހުއްޓާލުމުގެ ފުރަތަމަ ޕްލޭންގެ ސަބަބުން އިސްރާއީލާއި ލުބުނާނުގެ ހަތިޔާރު އެޅި ޖަމާއަތް ހިޒްބުاللهއާ ދެމެދު 14 މަސް ދުވަހު ހިނގި ހަމަނުޖެހުންތަކަށް ނިމުމެއް އައެވެ.
އެމެރިކާ އާއި ފްރާންސް މެދުވެރިވެގެން ކުރިއަށް ގެންދިޔަ އެ އެއްބަސްވުމުގެ ދަށުން ލުބުނާނުގެ ދެކުނުގައި ހަރަކާތްތެރިވި ހިޒްބުﷲގެ ހަނގުރާމަވެރިން އެ ސަރަހައްދުން ފައިބަން 60 ދުވަހުގެ މުއްދަތެއް ދީފައިވާއިރު، ހަމަ އެ މުއްދަތުގައި އިސްރާއީލުގެ ސިފައިން ވެސް ލުބުނާނުން ފައިބަންޖެހެއެވެ.
އެ އެއްބަސްވުން އިއުލާން ކުރައްވަމުން އެމެރިކާގެ އޭރުގެ ރައީސް ޖޯ ބައިޑަން ވިދާޅުވީ އެއީ ދެފަރާތުގެ ދެމެދުގައި އޮންނަ އަދާވާތްތެރިކަން ދާއިމީކޮށް ހުއްޓާލުމަށް ފަރުމާކޮށްފައިވާ އެއްބަސްވުމެއް ކަމަށެވެ.
އެ އެއްބަސްވުމުގައި ތަންފީޒު ކުރި ފަހުން ލުބުނާނުގެ އެތައް ހާސް ރައްޔިތުން ބޯޑަރު ކައިރީގައިވާ ރަށްތަކަށް އެނބުރި ގޮސްފައިވާއިރު، އެ ސަރަހައްދު އަދިވެސް ރައްކާތެރި ނޫން ކަމަށް ކަމާބެހޭ ފަރާތްތަކުން ބުނެއެވެ.
އިސްރާއީލާއި ހިޒްބުاللهއާއި ދެމެދު ދިގު މުއްދަތެއް ވަންދެން އޮތް ހަމަނުޖެހުންތައް މިދިޔަ ސެޕްޓެމްބަރު މަހު ވަނީ އިތުރުވެފައެވެ. އިސްރާއީލުން ވަނީ ލުބުނާނަށް އަމާޒުކޮށް ވަރުގަދަ ވައިގެ ހަމަލާތަކެއް ދީ އެއްގަމު މަގުން ލުބުނާނުގެ ދެކުނަށް އަރާފައެވެ. އިސްރާއީލުން ވަނީ ހިޒްބުﷲގެ އިސް ލީޑަރުން ވެސް ޝަހީދުކޮށްލާފައެވެ.
ހަމަލާތަކުގައި ލުބުނާނުގައި ގާތްގަނޑަކަށް 4،000 މީހުން މަރުވެ 1.2 މިލިއަނަށް ވުރެ ގިނަ ރައްޔިތުން ގެދޮރު ގެއްލިގެން ދިޔައެވެ.