ދިވެހިރާއްޖޭގެ ފިލްމީ ދާއިރާގައި މިހާތަނަށް އުފެދުނު އެންމެ ވަރުގަދަ އެއް ތަރި ކަމަށްވާ ނިއުމާ މުހައްމަދު ފިލްމީ ދާއިރާއިން އެއްކޮށް ދުރުވެ, މާލެއިން ދިރިއުޅުން ދޫކޮށްލައި އެހެން ރަށަކަށް ދިރިއުޅުން ބަދަލުކޮށްފިއެވެ.
ދިވެހި ފިލްމު އިންޑަސްޓްރީގައި އެތައް ފިލްމުތަކާއި ޓީވީ ޝޯތައް އަދި މިއުޒިކް ވީޑިއޯތައް ކުޅެފައިވާ ނިއުމާ އެކްޓިން ދޫކޮށްލާފައިވަނީ 2019 ވަނަ އަހަރެވެ. އެއަށް ފަހު އޭނާ އަމިއްލަ ސްޓޫޑިއޯއެއް ތައާރަފުކޮށް ފުރަތަމަ ފިލްމެއް ނެރެފައިވަނީ 2023 ވަނަ އަހަރެވެ.
ނަމަވެސް، ދާދިފަހުން ސޯޝަލް މީޑިއާގައި އާންމުކޮށްފައިވާ ޕޯސްޓެއްގައި ނިއުމާ ބުނެފައިވަނީ، އެތައް ޒަމާނެއް ވަންދެއް ދިރިއުޅެމުން އައި މާލެ ދޫކޮށްލުމަށް ފަހު އެހެން ރަށަކަށް ދިރިއުޅުން ބަދަލުކުރަން ނިންމާފައިވާ ކަމަށެވެ. ދިރިއުޅުން ބަދަލުކޮށްފައިވަނީ ކޮން ތަނަކަށް ކަމެއް އޭނާ ހާމަކޮށްފައެއް ނުވެއެވެ.
މައުލޫމާތު ލިބިފައިވާ ގޮތުގައި އޭނާގެ ދިރިއުޅުން ބަދަލުކޮށްފައިވަނީ ފ. ނިލަންދޫއަށެވެ. އޭނާގެ ދިރިއުޅުން މާލެއިން ދުރަށް ބަދަލުކޮށްފައިވަނީ އޭނާގެ ދަރިފުޅު ޒޯޔާ ހަސަންއާ އެކުގައެވެ.
ނިއުމާގެ ޕޯސްޓުގައި އިތުރަށް ކިޔައިދީފައިވަނީ މާލެ ދޫކޮށް ދިރިއުޅުން ބަދަލުކޮށްފައިވަނީ އޭނާ "ހާލުގައި ޖެއްސުމުން" ކަމަށެވެ. ނަމަވެސް، އެކަމާ ގުޅޭގޮތުން އިތުރަށް މައުލޫމާތު ދީފައެއް ނުވެއެވެ.
ނިއުމާ އިތުރަށް ބުނެފައިވަނީ ނިއުމާއާ މެދު ގޯސްކޮށް ކަންތައް ކޮށްފައިވާ މީހުންނާ މެދު އެއްވެސް ޝަކުވާއެއް ނެތް ކަމަށެވެ. އެހެންނަމަވެސް، ފާއިތުވި ތިން އަހަރު ތެރޭގައި ލިބިފައިވާ ހިތި ތަޖުރިބާތަކުން ފިލާވަޅު ނަގައި ދިރިއުޅުން ބަދަލުކުރަން ނިންމީ ކަމަށް އޭނާ ބުންޏެވެ.
ނިއުމާ އޭނާގެ ދަރިފުޅާ އެކު އެހެން ރަށަކަށް ދިރިއުޅުން ބަދަލުކުރިއިރު މިދިޔަ އަހަރަކީ ޒޯޔާއަށް ބޮޑު އަހަރެކެވެ. އެއީ، އެކްޓިން ކެރިއަރުގެ ތެރެއަށް ވަދެ އޭނާ ފުރަތަމަ ފިލްމުން ފެނުނު އަހަރަށް ވީމައެވެ. ޒޯޔާ ވަނީ މިދިޔަ އަހަރު މުހައްމަދު ނިޔާޒު (ޓެޑްރީ)ގެ "ލަސްވިޔަސް"ގައި މުހިއްމު ރޯލަކުން ފެނިފައެވެ.
މާލެއިން ދުރަށް ދިރިއުޅުން ބަދަލުކުރިއިރު ނިއުމާއަކީ 1994 ވަނަ އަހަރުން ފެށިގެން ދިވެހި ފިލްމު އިންޑަސްޓްރީގައި މަސައްކަތް ކުރަމުން އައި ތަރިއެކެވެ. އޭނާ އެންމެ ފުރަތަމަ ފެނިފައިވަނީ "ހިތި ތަޖުރިބާ" ނަމަކަށް ކިޔާ ޑްރާމާ ޝޯއަކުންނެވެ.
ނިއުމާ މިގޮތަށް ރަށަށް ބަދަލުވިއިރު ކުރީގެ މަޝްހޫރު ޑިރެކްޓަރު އަބްދުލް ފައްތާހު ވެސް ވަނީ ކުއްލި ގޮތަކަށް އޭނާގެ މަސައްކަތްތައް މެދުކަނޑާލައި އިންޑަސްޓްރީއިން ދުރަށް ގޮސްފައެވެ. އޭނާ 2017 ވަނަ އަހަރު ދާއިރާ ދޫކޮށް ދިޔަ ގޮތަށް ދިރިއުޅުން ބަދަލުކޮށްފައިވަނީ އޭނާގެ އުފަން ރަށް ހއ. ކެލާއަށެވެ.